Proverbio 20:1-30
20 Nauyaw ti arak,+ naariwawa ti naingel nga inumen;+Saan a masirib ti agpayaw-awan kadagita.+
2 Ti panagbuteng iti ari ket kas iti ngernger ti leon;*+Agpeggad ti biag ti asinoman a mamagpungtot kenkuana.+
3 Pakaidayawan ti tao no liklikanna ti riri,+Ngem makiraman iti dayta dagiti maag.+
4 Saan nga agarado ti sadut iti tiempo ti lam-ek,Isu nga agpalimos bayat ti panagani inton awananen.*+
5 Dagiti panunot* ti puso ti tao ket kas iti adalem a danum,Ngem iyaon dagita ti tao nga adda pannakatarusna.
6 Ipakaammo ti adu a tao ti napudno nga ayatda,Ngem asino ti makasarak iti matalek a tao?
7 Magmagna ti nalinteg nga awan pagkuranganna.+
Naragsak ti annakna* a sumurot kenkuana.+
8 No agtugaw ti ari iti trono tapno mangukom,+Kumita a naimbag tapno iwarana ti amin a kinadakes.+
9 Asino ti makaibaga: “Dinalusak ti pusok;+Nadalusakon, awanen ti basolko”?+
10 Ti suitik a timbangan ken saur a pagsukatan*Ket agpada a kagura ni Jehova.+
11 Maam-ammo ti ubing* babaen ti ar-aramidna,No nadalus ken umiso ti kababalinna.+
12 Ti makangngeg a lapayag ken makakita a mataKet agpada nga inaramid ni Jehova.+
13 Saanmo nga ayaten ti turog, tapno dika pumanglaw.+
Luktam dagiti matam, tapno mapnekka iti tinapay.+
14 “Madi dayta, madi!” kuna ti gumatgatang;Kalpasanna, pumanaw ket agpannakkel.+
15 Adda balitok, ken adu a korales,*Ngem ti bibig ti pannakaammo ket nakapatpateg.+
16 Alaem ti bado ti lalaki no itedna kas garantia para iti maysa nga estranghero;+Alaem kenkuana ti pammatalged no itedna para iti ganggannaet a babai.*+
17 Naimas iti maysa a tao ti tinapay a sinisuitik a naala,Ngem kalpasanna mapnonto ti ngiwatna iti graba.+
18 Agballigi* dagiti plano no adda panagsasarita,*+Ket makigubatka babaen ti nasayaat* a panangiwanwan.+
19 Ti manangpadakes mapanna ibagabaga ti kompidensial a saritaan;+Dika makikadkadua iti daydiay pagaayatna ti agtsismis.*
20 Asinoman a mangilunod iti ama ken inana,Maiddepto ti lamparana iti kasipngetan.+
21 Uray no maala ti tao ti tawidna iti inaagum a pamay-anSaanto a mabendisionan iti kamaudiananna.+
22 Saanmo nga ibaga: “Agibalesakto iti dakes!”+
Mangnamnamaka ken Jehova,+ ket isalakannakanto.+
23 Kagura ni Jehova ti suitik a timbangan,*Ken saan a nasayaat ti saur a pagsukatan.
24 Iturong ni Jehova dagiti addang ti tao;+Kasano a matarusan ti tao ti bukodna a dalan?*
25 Maysa a silo iti tao no sidadarasudos nga ipukkawna, “Nasantuan!”+
Sa agpanunot kalpasan a nagkari.+
26 Ti masirib nga ari isinana dagiti dakes+Ket pilidanna ida iti pagirik.+
27 Ti anges ti tao ket kas lampara ni Jehova,A mangsukimat iti kinataona.
28 Napudno nga ayat ken kinamatalek ti mangsalaknib iti ari;+Mataginayonna ti tronona babaen ti napudno nga ayat.+
29 Ti dayag ti agtutubo a lallaki ket ti pigsada,+Ken ti kinangayed ti lallakay ket ti ubanda.+
30 Dagiti dunor ken sugat ti mangikkat* iti dakes,+Ken dagiti saplit ti mangdalus iti kaunggan ti maysa a tao.
Footnotes
^ Wenno “burboran a bumaro a leon.”
^ Wenno mabalin nga, “Agbirokto bayat ti panagani ngem awan ti masarakanna.”
^ Wenno “plano.” Lit., “balakad.”
^ Lit., “annak a lallaki.”
^ Wenno “Ti dua a nagduma a padagsen a bato ken dua a nagduma a pagsukatan.”
^ Wenno “ubing a lalaki.”
^ Wenno “iti ganggannaet.”
^ Wenno “Tumibker.”
^ Wenno “balakad.”
^ Wenno “nainsiriban.”
^ Wenno “daydiay mangallukoy babaen ti bibigna.”
^ Wenno “dua a nagduma a padagsen a bato.”
^ Wenno “ti dalan a papananna.”
^ Wenno “mangkarus.”
