Ebanghelio ni Juan 8:12-59
8 12 Kinuna manen ni Jesus kadakuada: “Siak ti silaw ti lubong.+ Ti sumurot kaniak saanto a pulos magna iti kinasipnget, no di ket addanto kenkuana ti lawag+ a mangted iti biag.”
13 Gapuna, kinuna dagiti Fariseo: “Saksaksiam ti bagim; ket saan a pudno ti ibagbagam.”
14 Insungbat ni Jesus: “Uray no saksaksiak ti bagik, pudno ti ibagbagak, ta ammok ti naggapuak ken ti papanak.+ Ngem saanyo nga ammo ti naggapuak ken ti papanak.
15 Mangukomkayo sigun iti panagpampanunot ti tao;*+ saanak a pulos mangukom iti asinoman a tao.
16 Ngem no mangukomak, umiso ti panangukomko, ta saanak a mangukom nga agmaymaysa no di ket kaduak ti Ama a nangibaon kaniak.+
17 Naisurat met iti Lintegyo: ‘No adda dua a testigo, pudno ti pammaneknekda.’+
18 Agsasaoak maipapan iti bagik, ken agsasao met maipapan kaniak ti Ama a nangibaon kaniak.”+
19 Gapuna, insaludsodda: “Ayan ti Amam?” Insungbat ni Jesus: “Saandak nga am-ammo ken ti Amak.+ Ta no am-ammodak, am-ammoyo met koma ti Amak.”+
20 Imbagana dagitoy iti asideg ti pagidulinan iti gameng+ bayat a mangisursuro iti templo. Ngem awan ti nangtiliw kenkuana, ta saan pay a dimteng ti orasna.+
21 Kinunana manen kadakuada: “Pumanawak, ket sapulendakto, ngem mataykayto a sibabasol.+ Saankayo a makaumay iti papanak.”+
22 Gapuna, kinuna dagiti Judio: “Agpakamatay ngata ta imbagana, ‘Saankayo a makaumay iti papanak’?”
23 Kinuna ni Jesus: “Naggapukayo ditoy daga, ngem naggapuak idiay langit.+ Naggapukayo iti daytoy a lubong, ngem saanak a naggapu iti daytoy a lubong.
24 Isu nga imbagak kadakayo: Mataykayto a sibabasol. Ta no saankayo a mamati a siak daydiay ibagbagak, mataykayto a sibabasol.”
25 Gapuna, kinunada kenkuana: “Asinoka?” Insungbat ni Jesus: “Awan serserbina a makisarsaritaak kadakayo.
26 Adu ti kayatko nga ibaga maipapan kadakayo ken adu a banag ti rumbeng nga ukomek. Kinapudnona, ibagbagak dagiti mismo a nangngegko iti Daydiay nangibaon kaniak ditoy lubong, a kanayon nga agsao iti pudno.”+
27 Saanda a naawatan a ti Ama ti tuktukoyenna.
28 Gapuna, kinuna ni Jesus: “Inton maibitinyo iti kayo ti Anak ti tao,+ maammuanyonto a siak daydiay,+ ket awan ti aramidek iti bukodko a nakem;+ no di ket dagiti laeng insuro ti Ama nga ibagak.
29 Kaduak Daydiay nangibaon kaniak; saannak a binaybay-an nga agmaymaysa, ta kanayon nga ar-aramidek ti makaay-ayo kenkuana.”+
30 Bayat nga ibagbagana dagitoy, adu ti namati kenkuana.
31 Kalpasanna, kinuna ni Jesus kadagiti Judio a namati kenkuana: “No agtalinaedkayo iti saok, pudno a dakayo dagiti adalak,
32 ket maammuanyonto ti kinapudno,+ ket ti kinapudno wayawayaannakayto.”+
33 Insungbatda: “Kaputotannakami ni Abraham ket pulos a saankami a nagbalin nga adipen ti asinoman. Apay koma nga ibagam a mawayawayaankamto?”
34 Insungbat ni Jesus: “Pudno unay kunak kadakayo, asinoman nga agar-aramid iti basol ket adipen ti basol.+
35 Kasta met, ti adipen saan nga agnaed nga agnanayon iti balay ti amona; ngem ti anak agnaed iti dayta nga agnanayon.
36 Gapuna, no wayawayaannakayo ti Anak, pudno a mawayawayaankayo.
37 Ammok a kaputotannakayo ni Abraham. Ngem kayatdak a patayen, gapu ta saanyo nga awaten ti pannursurok.
38 Ibagak dagiti nakitak bayat a kaduak ni Amak;+ ngem aramidenyo dagiti nangngegyo iti amayo.”
39 Insungbatda kenkuana: “Ni Abraham ti amami.” Kinuna ni Jesus: “No annaknakayo ni Abraham,+ aramidenyo met koma dagiti inaramidna.
40 Ngem ita, kayatdak a patayen, siak a nangibaga kadakayo iti kinapudno a nangngegko iti Dios.+ Saan nga inaramid dayta ni Abraham.
41 Ar-aramidenyo dagiti aramid ti amayo.” Kinunada ken Jesus: “Saankami a nayanak gapu iti immoralidad;* maymaysa ti Amami, ti Dios.”
42 Kinuna ni Jesus: “No ti Dios ti Amayo, ayatendak koma,+ ta naggapuak iti Dios ket addaak ditoy gapu kenkuana. Saanak nga immay iti bukodko a nakem, no di ket imbaonnak.+
43 Apay a saanyo a matarusan ti ibagbagak? Gapu ta saanyo nga awaten ti pannursurok.
44 Naggapukayo iti Diablo nga amayo, ket kayatyo nga aramiden dagiti tarigagay ni amayo.+ Nagbalin a mammapatay idi nangrugi,*+ ken saan a nagtalinaed iti kinapudno, ta saanna a kayat ti kinapudno. Agsao iti ulbod ta kasta ti kababalinna. Ulbod ken isu ti ama ti kinaulbod.+
45 Ngem gapu ta ibagbagak ti kinapudno, saandak a patien.
46 Siasino kadakayo ti makapaneknek a nakabasolak? No ibagak ti kinapudno, apay a saandak a patien?
47 Ti aggapu iti Dios denggenna ti sasao ti Dios.+ Saanyo a kayat ti dumngeg, ta saankayo a naggapu iti Dios.”+
48 Kinuna dagiti Judio: “Saan aya a pudno ti ibagbagami a ‘Samaritanoka+ ken nalugananka iti demonio’?”+
49 Insungbat ni Jesus: “Saanak a naluganan iti demonio, no di ket idaydayawko ni Amak, ngem ibabaindak.
50 Saanko nga idaydayaw ti bagik;+ adda Maysa a mayat a mangidayaw kaniak ken isu ti ukom.
51 Pudno unay kunak kadakayo, saanto a pulos matay ti asinoman a mangtungpal iti saok.”+
52 Kinuna dagiti Judio: “Talaga a nalugananka iti demonio! Natayen ni Abraham ken dagiti propeta, ngem ibagam ketdin, ‘Saanto a pulos matay ti asinoman a mangtungpal iti saok.’
53 Natantan-okka aya ngem ni amami nga Abraham a natayen? Natay metten dagiti propeta. Asinoka iti panagkunam?”
54 Insungbat ni Jesus: “No ipadayagko ti bagik, awan serserbi ti dayagko. Ni Amak ti mangipadayag kaniak,+ daydiay ibagbagayo a Diosyo.
55 Saanyo nga am-ammo,+ ngem am-ammok.+ No ibagak a diak am-ammo, ulbodak metten a kas kadakayo. Ngem am-ammok ken tungtungpalek ti saona.
56 Magagaran unay ni Abraham nga amayo a makakita iti iyaayko, ket nakitana dayta ken nagrag-o.”+
57 Gapuna, kinuna dagiti Judio: “Awan pay 50 ti tawenmo, ibagam ketdin a nakitamon ni Abraham!”
58 Insungbat ni Jesus: “Pudno unay kunak kadakayo, addaakon sakbay pay a nayanak ni Abraham.”+
59 Gapuna, nagpidutda iti bato a panguborda ken Jesus, ngem naglemmeng ket rimmuar iti templo.
