Maysa nga Apocalipsis ken Juan 3:1-22
3 “Isuratmo iti anghel ti kongregasion idiay Sardis: Dagitoy ti imbaga daydiay addaan iti pito nga espiritu ti Dios+ ken iti pito a bituen:+ ‘Ammok dagiti aramidmo, nga addaanka iti nagan* a sibibiagka, ngem natayka.+
2 Agalertoka+ ken pabilgem ti nabatbati a bambanag a dandanin matay, ta diak nakita a naileppasmo* dagiti aramidmo iti sanguanan ti Diosko.
3 Itultuloymo ngarud a panunoten* ti inawat ken nangngegmo, ken itultuloymo a suroten dayta, ken agbabawika.+ Sigurado a no dika agriing, umayak a kasla mannanakaw,+ ket dimonto pulos ammo ti oras nga iyaayko.+
4 “‘Ngem adda sumagmamano kadakayo* dita Sardis a saanda nga impalubos a marugitan ti badoda,+ ket makipagnadanto kaniak a nakabado iti puraw+ ta maikarida.
5 Ti agballigi+ ket makawesanto iti puraw,+ ken diakto pulos ikkaten* ti naganna iti libro ti biag.+ Ibagakto iti sanguanan ni Amak ken iti sanguanan dagiti anghelna nga am-ammok ti naganna.+
6 Denggen koma ti asinoman nga adda lapayagna ti ibaga ti espiritu kadagiti kongregasion.’
7 “Isuratmo iti anghel ti kongregasion idiay Filadelfia: Dagitoy ti imbaga daydiay nasantuan+ ken napudno,+ nga addaan iti tulbek ni David,+ a manglukat tapno awan ti makairikep, ken mangirikep tapno awan ti makailukat:
8 ‘Ammok dagiti aramidmo—kitaem! Adda ridaw a linukatak iti sanguanam,+ nga awan ti asinoman a makairikep. Ammok nga adda bassit pannakabalinmo ket tinungpalmo ti saok ken dimo inlibak ti naganko.
9 Kitaem! Dagidiay adda iti sinagoga ni Satanas a mangibagbaga a Judioda ngem saanda a Judio,+ no di ket agul-ulbodda—kitaem! Paumayek ken pagdumogekto* ida iti sanguanan dagiti sakam, ket ipakaammokto kadakuada nga inay-ayatka.
10 Gapu ta tinuladmo dagiti nangngegmo maipapan iti panagibturko,*+ aywanankanto met iti oras ti pannakasubok,+ a mapasamak iti intero a daga, tapno masubok dagiti agnanaed iti daga.
11 Um-umayakon a sidadaras.+ Pagtalinaedem dagiti adda kenka, tapno awan ti mangala iti koronam.+
12 “‘Daydiay agballigi ket pagbalinekto nga adigi iti templo ti Diosko, ket saanton a pulos rummuar iti dayta, ket isuratkonto kenkuana ti nagan ti Diosko+ ken ti nagan ti siudad ti Diosko, ti baro a Jerusalem+ a bumaba manipud langit nga aggapu iti Diosko, ken ti mismo a baro a naganko.+
13 Denggen koma ti asinoman nga adda lapayagna ti ibaga ti espiritu kadagiti kongregasion.’
14 “Isuratmo iti anghel ti kongregasion idiay Laodicea:+ Dagitoy ti imbaga ti Amen,+ ti matalek ken napudno+ a saksi,+ ti pangrugian ti panamarsua ti Dios:+
15 ‘Ammok dagiti aramidmo, a saanka a nalamiis wenno saanka met a napudot. Kayatko a nalamiiska koma wenno napudotka.
16 Isu a gapu ta apaganem-emka ken saanka a napudot+ wenno saanka a nalamiis,+ ituprakanto.
17 Gapu ta ibagbagam: “Nabaknangak+ ken nakaurnongak iti kinabaknang ken awanen ti banag a kasapulak pay,” ngem dimo ammo a nakapimpiman, nakakaasi, napanglaw, bulsek, ken lamolamoka,
18 ibalakadko a gumatangka kaniak iti balitok a napasudi iti apuy tapno bumaknangka, ken puraw a bado tapno makawesanka ken saan a makita ti nakababain a kinalamolamom,+ ken sapsapo ti mata nga iyaprosmo kadagita matam+ tapno makakitaka.+
19 “‘Tubngarek ken disiplinaek ti amin nga ipatpategko.+ Isu nga agregtaka ken agbabawika.+
20 Kitaem! Agtaktakderak iti ridaw ken agtuktuktokak. Asinoman a makangngeg iti timekko ket luktanna ti ridaw, sumrekakto iti balayna ken makipangrabiiak kenkuana ken makikadua kaniak a mangan.
21 Daydiay agballigi+ ket palubosakto a makikatugaw kaniak iti tronok,+ kas iti panagballigik ken pannakikatugawko+ ken Amak iti tronona.
22 Denggen koma ti asinoman nga adda lapayagna ti ibaga ti espiritu kadagiti kongregasion.’”
Footnotes
^ Wenno “reputasion.”
^ Wenno “nakompletom.”
^ Wenno “laglagipen.”
^ Lit., “sumagmamano a nagan.”
^ Wenno “buraen.”
^ Wenno “pagruknoyekto.”
^ Wenno mabalin a, “sinurotmo ti inyulidanko a panagibtur.”
