1. Tikah

Tiap iku orang ngembuan runding ti enda sebaka pasal tikah enggau utai ke diguna kena bulih tikah ti lantang.

RETI IYA: Petara ke ngatur tikah, nya kebuah Iya nemu nama utai ke diguna sepasang laki bini ngambika ulih lantang. (Mark 10:​6-9) Laki bini ulih lantang lebuh sida enda berunding ke penguntung diri empu aja, tang seduai iya patut sama bela berundingka pangan diri kena negapka tikah sida. Laki ke rinduka bini deka ngayanka pengerindu ari chara iya ngelayan enggau nyaga bini iya. Lalu bini ke bebasaka laki deka nunjukka nya nengah chara iya bejaku enggau ulah iya.

IRING ARI BUP KUDUS ULIH NULUNG: Quang enggau Thi ari Vietnam ngasaika, tikah sida sigi enda ulih lantang. Quang selalu enda ngayanka pemanah. Ku iya madah, “Aku enda peduli pasal asai ati Thi, lalu selalu ngemaluka iya.” Thi deka sarak. Ku Thi madah, “Aku ngasaika diri enda ulih pechaya tauka bebasaka laki aku agi.”

Nyau kelama, Quang enggau Thi belajarka ajar Bup Kudus, lalu nitihka lalau ba Epesus 5:33 dalam tikah seduai iya. Ku Quang, “Ayat tu nulung aku nemu, pemesai guna ngayanka pemanah. Aku mega belajar baka ni deka ngasuh Thi berasai dikesayau sereta dikeibuhka ba emosi, fizikal, enggau utai ke diguna iya. Lebuh aku ngereja tu, iya ulih rindu sereta bebasaka aku.” Pia mega Thi madahka, “Majak aku nitihka lalau ba Epesus 5:33 lalu ngayanka basa ngagai laki aku, aku ulih ngasaika iya sayau agi ke aku, nyaga aku sereta ngasuh aku lantang.”

 2. Chara Ngelayan Orang Bukai

Kesuah iya, orang enda ngelayan orang bukai enggau manah ketegal bansa, asal menua, gamal, agama, tauka jantina sesiku orang.

RETI IYA: Bup Kudus enda ngajar kitai begedika orang bukai bepelasarka bansa tauka asal menua, tauka ketegal sida homoseksual. Tang, Bup Kudus meransang kitai bebasaka semua orang, enda ngira nama bansa, asal menua, tauka miskin kaya. (Surat Kereja Rasul 10:34) Indah maya kitai enda setuju enggau utai ke dipechaya tauka ulah orang bukai, tang kitai agi ulih ngelayan sida enggau manah sereta basa.—Matthew 7:12.

IRING ARI BUP KUDUS ULIH NULUNG: Daniel selalu diajar ngumbai orang ke datai ari Asia baka ancaman ngagai menua iya. Iya begedika semua orang ke datai ari Asia, lalu suah ngemaruhka sida ba mua orang mayuh. Ku Daniel madah, “Ba aku, runding enggau ulah aku nya enda salah laban aku nyukung menua aku.”

Udah nya Daniel belajarka ajar Bup Kudus. Ku iya madah, “Aku patut ngubah chara aku berunding. Aku patut meda orang bukai baka chara Petara meda sida. Semua kitai sama enda ngira ari ni penatai kitai.” Daniel madahka baka ni asai ati iya diatu lebuh iya betemu enggau orang. Iya madah, “Ari ni penatai sesiku orang enda penting ba aku. Aku rinduka semua orang enda ngira ari ni asal sida, lalu aku mega bisi kaban rapat ke datai ari serata dunya.”

 3. Duit

Mayuh orang deka nyadi kaya ngambika ulih gaga ati sereta ngembuan pengidup ti manah agi dudi hari.

RETI IYA: Kitai begunaka duit, tang nya enda ulih meri jamin, kitai bulih pengaga ati tauka pengidup ti manah agi dudi hari. (Jaku-Dalam 18:11; 23:​4, 5) Iya ke amat, pengaga ati ti bendar sereta pengidup ti manah bepanggai ba penemu-dalam ke datai ari Petara lalu tu bisi dalam Bup Kudus.—1 Timoti 6:​17-19.

IRING ARI BUP KUDUS ULIH NULUNG: Cardo nya siku lelaki ke asal ari Indonesia. Iya fokus ngagai ngiga pengaya ba pengidup. Ku iya madah, “Aku bisi semua utai ke dikedekaka mayuh orang. Aku mampu raun, meli utai ti mar, mayuh kerita, sereta mayuh rumah.” Tang tu sementara aja. Ku iya nampung baru, “Aku ditipu. Semua duit ke diulih aku enggau bebendar ngelamatu abis ditipu orang enggau sekelip mata aja. Betaun-taun aku bebendar gawa ngambika ulih nyadi kaya, tang pengujung iya utai ke diulih aku nya semina asai ati ti puang, enda beguna sereta asa ati.”

Cardo berengkah nitihka lalau Bup Kudus pasal duit. Iya badu agi kelalu fokus ngena pengering iya ngiga pengaya tang iya milih pengidup ti sederhana. Ku Cardo madah, “Diatu, aku ngasaika pengaya ti bendar laban aku bisi kaul ti manah enggau Petara. Tiap malam aku ulih tinduk jenak, lalu aku amat-amat gaga ati.”

 4. Seks

Mayuh orang bisi runding ke enda sebaka pasal seks.

RETI IYA: Bup Kudus bisi natak chara kitai ulih ngayanka pengingin seks. Rambai jaku “ulah seks ti kamah” mega nyengkaum butang, nyundal, seks sebedau kawin, homoseksual, sereta seks enggau jelu. (1 Korint 6:​9, 10) Pengawa seks siti pemeri ari Petara ke semina ngagai siku lelaki enggau siku indu ke udah jadi enggau pangan diri.—Jaku-Dalam 5:​18, 19.

IRING ARI BUP KUDUS ULIH NULUNG: Ku siku indu ke asal ari Australia iya nya Kylie madahka, “Maya aku dara, aku berunding enti aku bisi hubungan seks sebedau kawin, nya ulih ngasuh aku berasai dikesayau sereta likun. Tang runding aku salah. Aku tusah ati sereta enda berasai likun.”

Udah nya, Kylie belajar lalu nitihka utai ke diajar Bup Kudus pasal seks. Iya madah, “Aku ulih meda standard Petara kena nyaga kitai ari penusah enggau pemedis. Diatu, aku berasai likun sereta dikesayau ketegal ngereja utai ke dikedekaka Jehovah ari kitai. Nitihka iring Bup Kudus udah nulung aku nyeliahka diri ari penusah ati.”