Nyauka semua orang setuju sekeda pengawa nya berupai betul tauka berupai salah. Ngambika chunto, munuh, ngerugul, ngemediska anak mit enggau chara seksual endang sigi ditemu salah. Taja pia pengawa ti lurus, pemanah enggau penyiru sigi dipuji. Tang baka ni enggau pemutus ke bekaul enggau pengawa seks, ulah ti jujur, tauka chara ngemesaika anak? Mayuh orang berunding, nadai betul enggau salah, nya pilihan tiap iku orang. Kesuah iya, mayuh orang ngaga pemutus nitihka asai ati sida enggau asai ati orang ke ngelingi sida pasal pekara nya. Kati tu chara ti betul?

Kesuah iya, kitai ngaga pemutus nitihka utai ke diasaika kitai. (Rome 2:​14, 15) Indah anak mit pan ulih nemu bisi utai ke adil tauka enda adil. Sida mega berasai besalah enti sida ngereja penyalah. Seraya kitai mansang besai, kitai belajarka utai ti betul enggau salah ari orang ke semak kitai, iya nya diri sebilik, bala kaban, cikgu, orang ke ngelingi kitai, agama, sereta adat kitai. Lebuh kitai ngaga pemutus, asai ati kitai ulih madah sekalika pemutus ke digaga kitai ngam ke enda enggau utai ke dipechayaka kitai.

Asai ati kitai pasal utai ti betul enggau salah meransang kitai ngayanka penyinu, nemu beterima kasih, ngayanka pengelurus, sereta nemu kasihka orang bukai. Tu mega nagang kitai ari ngereja utai ke ulih ngemediska orang ke dikesayauka kitai, tauka utai ke ulih ngasuh kitai empu malu sereta berasai besalah.

Kati utai ke diasaika kitai nya seruran ulih dipechaya? Maya Garrick agi biak, iya milih pengidup ke ngasuh iya madah, “Aku ulih ngereja sebarang utai kedeka aku.” Tang iya ngasaika, ngereja utai ke dikumbai iya betul enda mai asil ti manah. Iya madah, pengidup iya amat enda gaga ati ketegal penuh enggau pengawa ti kamah, makai dadah, mabuk, sereta ganas.

Kelimpah ari asai ati diri empu, maya kitai ngaga pemutus kesuah iya kitai nitihka runding orang bukai. Enggau chara tu, nya meri kitai penguntung ari pengalaman sereta penemu-dalam sida. Enti kitai ngereja utai ti betul ba runding diri sebilik, bala kaban sereta orang ke ngelingi kitai, kitai deka bulih basa ari sida.

Kati utai ke diasaika orang bukai nya seruran ulih dipechaya? Lebuh Priscila agi biak, iya ngereja ulah ti popular ba entara nembiak serambau iya, iya nya ulah seks sebedau kawin. Taja pan utai ke dikereja iya nya betul ba runding orang bukai, tang nya enda meri iya pengaga ati. Ku iya madah, “Ngereja ulah ke dikereja orang bukai enda ngasuh aku gaga ati. Tu ngujungka aku ngereja pengawa ti beli sereta bahaya.”

Lebuh kitai mutuska utai ti betul enggau salah, asai ati kitai empu sereta asai ati orang bukai nya penting. Tang ukai reti iya seruran mai asil ti manah. Kekadang kitai engka ulih ngemediska diri empu tauka orang bukai, laban kitai enda ulih meda enggau jauh pasal pemutus ke digaga. (Jaku-dalam 14:12) Lalu taja pan kitai enggau orang bukai ngasaika pemutus nya betul, bedau tentu pemutus nya nadai mai nama-nama kesan ti enda manah. Iya ke amat, sekeda ulah ke kala dikumbai orang salah suba, diatu udah diterima. Lalu ulah ke kala dikumbai orang betul suba, diatu nyau enda diterima.

Kati bisi chara ke manah agi kena nentuka utai ti betul enggau utai ti salah? Kati bisi standard moral ke ulih dititihka kitai kemayaharitu, ke enda ngasuh kitai asa ati dudi hari ila?

Baik meh, bisi iring ke ulih dipechayaka kitai ke ngena ba semua orang enda ngira dini endur. Ba artikel ke nangkan kitai deka berandauka dini alai kitai ulih tetemuka iring ke ulih dipechaya kena nentuka utai ti betul enggau salah.