Betul enggau Salah: Bup Kudus—Iring ke Ulih Dipechaya

TEBAH

Kitai enda ulih pasti pemutus ke digaga kitai pasal utai ti betul enggau salah bisi asil ti manah enti kitai nitihka asai ati kitai empu tauka orang bukai. Bup Kudus udah madahka kebuah iya, tang ukai semina nya aja. Bup Kudus ngembuan iring ke ulih dipechaya ke nulung kitai nemu utai ti betul enggau salah, sereta ngasuh kitai gaga ati.

KITAI BEGUNAKA IRING ARI PETARA

Ba Bup Kudus, Petara Jehovah a nerangka mensia begunaka iring ari Iya lalu sida enda ulih ngatur pengidup diri. (Jeremiah 10:23) Nya kebuah Iya nyediaka iring pasal utai ti betul enggau salah dalam Bup Kudus. Iya rinduka semua mensia lalu Iya enggai kitai ngaga pemutus ti salah ke ulih ngemediska kitai ti ngujungka pengidup kitai tusah. (Ulang Adat 5:29; 1 John 4:8) Kelimpah ari nya, sebagai Penempa kitai, Iya bisi penemu-dalam kena meri kitai jaku lalau ti pemadu manah pasal utai ti betul enggau salah. (Masmur 100:3; 104:24) Taja pia, Petara enda kala mejal orang idup nitihka standard Iya.

Jehovah meri semua utai ke diguna lelaki enggau indu keterubah iya nya Adam enggau Awa, ngambika seduai iya gaga ati. (Pemungkal 1:28, 29; 2:8, 15) Iya mega meri sida atur ke senang ke patut dititihka sida. Taja pia, Iya nejuka sida empu milih sekalika sida deka nitihka atur tu tauka enda. (Pemungkal 2:9, 16, 17) Tang sayau, Adam enggau Awa milih nitihka standard diri empu ari ke nitihka standard Petara. (Pemungkal 3:6) Nama asil iya? Kati mensia ulih gaga ati ngereja utai ke dikumbai sida betul? Enda. Sepemanjai sejarah mensia, kitai udah meda bukti orang ke enda pedulika standard Petara nadai bulih pengelantang sereta ati ti puas.—Pengajar 8:9.

Bup Kudus meri kitai iring kena ngaga pemutus ti manah enda ngira dini kitai diau tauka latar belakang diri sebilik kitai. (2 Timoti 3:16, 17; peda kutak “ Bup ke Semua Orang.”) Peratika chara Bup Kudus ulih ngereja tu.

Pelajarka mayuh agi kebuah Bup Kudus dikumbai “jaku Petara.”—1 Tesalonika 2:13. Peda video Sapa Pengarang Bup Kudus? ba jw.org/iba.

KEBUAH SEKEDA ORANG NGASAIKA BUP KUDUS ENDA ULIH NULUNG

Sekeda orang ngumbai Bup Kudus enda ulih meri iring pasal utai ti betul enggau salah. Tu meh sekeda utai ke engka disebut orang.

Jaku Sakal: “Utai ke disebut dalam Bup Kudus enda sejalai.”

Iya ke Amat: Sekeda begian dalam Bup Kudus baka ke enda sejalai enggau pangan diri. Tang pengudah nuan belajarka baka ni enggau kemaya nya ditulis, nuan deka meda nya amat sejalai enti nuan beratika konteks, sejarah, adat, runding penulis Bup Kudus, enggau utai bukai.

Kena nemu mayuh agi, bacha artikel “Adakah Maklumat dalam Bible Bercanggahan?” ba jw.org/ms.

Jaku Sakal: “Orang ke ngumbai diri nitihka ajar Bup Kudus ngereja pengawa ti jai. Nyadi, iring ari Bup Kudus nya enda manah.”

Iya ke Amat: Kitai enda ulih nyalahka Bup Kudus enti orang enda ngereja utai ke diajar ngagai sida. Endang udah ditulis, mayuh orang nyengkaum tuai pengarap ke ngumbai diri nitihka ajar Bup Kudus, deka ngereja utai ti enda sejalai enggau ajar Bup Kudus. Ketegal tu, ulah sida udah “bejaika ajar ti bendar” ke datai ari Bup Kudus.—2 Peter 2:1, 2.

Peratika siti chunto baka ni mayuh tuai pengarap udah limpang ari ajar ti bendar dalam Bup Kudus, peda meh artikel ke betajuk “Kati Agama Nya Chara Kena Bedagang?” ba jw.org/iba.

Jaku Sakal: “Orang ke nitihka ajar Bup Kudus enda bebasaka orang bukai ke bebida enggau sida.”

Iya ke Amat: Bup Kudus meransang kitai ngelayan orang enggau basa. Bup Kudus enda nerima ulah ke. . .

ngumbai diri manah agi ari orang bukai. —Pilipi 2:3.
enda bebasaka orang bukai ti bebida runding pasal utai ti betul enggau salah.—1 Peter 2:17.
mejal orang bukai besetuju enggau utai ke dipechaya kitai.—Matthew 10:14.

Bup Kudus nunjukka Petara seruran ngelayan orang bukai enggau manah sereta adil. Pia mega, Petara dekaka kitai ngereja utai ti sama.—Rome 9:14.

Kena nemu mayuh agi, bacha artikel “Bersikap Toleransi—Bagaimana Bible Dapat Membantu” ba jw.org/ms.

BAKA NI IRING ARI PETARA DIAYANKA NENGAH BUP KUDUS

Bup Kudus madahka kitai pasal kaul Petara enggau mensia kenyau ari pun. Pia mega, Bup Kudus nulung kitai faham pasal runding Petara ba utai ti betul enggau salah, sereta utai ti meri penguntung tauka ngemedis. (Masmur 19:7, 11) Utai ke dipelajarka kitai seruran ulih diguna lalu nulung kitai ngaga pemutus ti manah, pasal utai ti betul enggau salah ba pengidup kitai ninting hari.

Ngambika chunto, peratika jaku lalau ba Jaku-Dalam 13:20, “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bepangan enggau orang ke beli, nuan deka rusak.” Prinsip ba ayat tu tetap sama. Iya agi ulih dikena ba jeman kitai baka jeman kelia. Bup Kudus penuh enggau prinsip ke ulih nulung sereta amat beguna.—Peda kutak “Penemu-Dalam ba Bup Kudus Seruran Ulih Diguna.”

Engka nuan berunding, ‘Nama kebuah aku pasti iring ari Bup Kudus ulih nulung aku kemayaharitu?’ Ba artikel ke nangkan deka madahka pengalaman sekeda orang.

a Jehovah nama Petara ke bisi ayan ba Bup Kudus, senentang Jaku Penerang.

PENEMU-DALAM BA BUP KUDUS SERURAN ULIH DIGUNA

Taja pan Bup Kudus udah ditulis nyauka 2,000 taun suba, tang iya agi ulih diguna nyentukka kemayaharitu. Mensia agi seruran dekaka pengidup ti lantang ati sereta puas ati. (Pengajar 1:9) Penemu-dalam ba Bup Kudus ulih nulung kitai nyapai juluk ati tu.

Jujur

“Kami deka ngereja semua utai enggau lurus.”—Hebrew 13:18.
“Orang ke ngenchuri patut badu ngenchuri. Iya patut bagas gawa sereta ngereja utai ti manah ngena jari iya.”—Epesus 4:28.

Chara Begulai enggau Orang Bukai

“Awakka tiap iku orang seruran ngereja utai ke penguntung orang bukai, ukai ke penguntung diri empu.”—1 Korint 10:24.
“Terus meh liat ati enggau pangan diri sereta ngampunka pangan diri ari ati.”—Kolosi 3:13.

Ngaga Pemutus

“Orang ke beli deka arapka sebarang utai, tang orang ke pintar deka nyingkang enggau bejimat.”—Jaku-Dalam 14:15.
“Orang ke nemu berunding deka meda penusah datai, lalu belalai; tang orang ke enda berunding deka terus bejalai lalu tetempuhka penusah nya, lalu merinsa ketegal nya.” —Jaku-Dalam 22:3.

MENARA JAGA