Satu Peter 2:1-25
2 Nya alai, buai semua penyai, pemula, sereta semua jaku ti ngemediska ati. Badu agi kepapas sereta pura-pura.
2 Baka anak mit ke baru ada, kemansangka meh pengingin deka ke ai tusu ti tulin ke bisi ba jaku Petara, ngambika kita ulih mansang besai lalu ulih diselamatka,
3 laban kita udah ngasaika pemanah ati Tuan.
4 Iya batu ti idup ke dibuai mensia. Tang iya dipilih Petara sereta berega ba Petara. Lebuh kita datai ngagai iya,
5 kita batu ti idup, benung didirika nyadi rumah ngena kuasa kudus Petara, ngambika kita nyadi seraban imam ti kudus. Enggau nya, kita ulih nyerahka pemeri ke sejalai enggau kuasa kudus Petara sereta ke diterima Iya nengah Jesus Kristus.
6 Ayat Bup Kudus madahka: “Peda! Aku deka ngengkahka ba Sion sigi batu ke dipilih. Batu nya batu sukut ti pemadu beguna sereta berega. Barang sapa ke arapka batu nya enda berasai asa.”*
7 Nya alai, iya berega ba kita laban kita pechaya. Tang ba orang ke enda pechaya, “batu ti dibuai tukang rumah udah nyadi batu sukut ti pemadu beguna”
8 sereta “sigi batu ke ngasuh orang labuh enggau sigi batu ke mempang jalai sida.” Sida labuh laban sida enda ngasika jaku Petara. Nya meh pengujung orang ke baka nya.
9 Tang “kita bansa ti dipilih, seraban imam ke gawa nyadi raja, bansa ti kudus, sereta nembiak ti istimewa ke diempu Petara. Nya alai, kita patut nusui mulia”* Iya ke ngangauka kita pansut ari pemetang, lalu tama ngagai penampak Iya ti ngalitka ati.
10 Suba kita ukai nembiak Petara, tang diatu kita nembiak Iya. Suba kita enda bulih pengasih ari Petara, tang diatu kita bulih pengasih ari Iya.
11 Bala menyadi ke dikerindu, aku bebendar minta kita ke nyadi orang asing sereta orang ke diau enda lama ba dunya tu, ngambika kita terus nyeliahka pengingin ti bedosa ke beperang ngelaban kita.
12 Awakka kita seruran ngayanka ulah ti manah lebuh begulai enggau orang bansa bukai. Enggau nya, sida deka meda pengawa kita ti manah taja pan sida nuduh kita ngereja penyalah, lalu nya deka ngasuh sida ngemuliaka Petara lebuh Iya datai ngakim.*
13 Ketegal kita nitihka pengingin Tuan, ngasi meh ke semua orang ke bekuasa,* enda ngira raja ke tinggi pangkat ari kita,
14 tauka gabenor ke diasuh raja ngukum orang ke ngereja penyalah sereta muji orang ke ngereja utai ti manah.
15 Nya ketegal Petara deka kita ngereja utai ti manah, ngambika kita ulih nutup* mulut orang ke enda nemu berunding ke mansutka jaku ti beli.
16 Nyadi meh orang ke bibas. Tang kena meh pengelepas kita nya nyadi ulun Petara, ukai ngena nya nyadika alasan kena ngereja* penyalah.
17 Bebasa meh ke semua macham orang, rindu meh ke semua menyadi ke sepengarap, nangi meh ke Petara, sereta bebasa meh ke raja.
18 Awakka bala ulun ngasi sereta bebasaka tuan sida ti manah sereta bisi runding ti masuk akal. Enti sema sida tusah deka ngelantangka ati tuan sida, sida mega agi patut ngasi sereta bebasaka tuan sida.
19 Petara lantang ati ngagai orang ke tan ngenatka penusah* sereta merinsa napi utai ke enda adil ketegal deka bulih ati* ti beresi ba mua Petara.
20 Kati kita patut dipuji enti kita tan ngenatka diri dipalu ketegal ngereja dosa? Tang, enti kita tan ngenatka pemerinsa ketegal ngereja utai ti manah, Petara lantang ati enggau kita.
21 Kebendar iya, kita dikangau ngambika nengah jalai pengidup tu, laban Kristus empu udah merinsa ke penguntung kita. Iya udah nyadi teladan ke kita ngambika kita ulih bebendar nitihka singkang iya ba semua pekara.
22 Iya enda ngereja dosa sereta enda nyebut utai ti bula.
23 Lebuh dikelese,* iya enda malas ngena jaku kelese.* Lebuh iya merinsa, iya enda ngugut orang. Tang iya nyerahka semua nya ngagai Hakim ti lurus.
24 Iya mai dosa kitai ngena tubuh iya empu lebuh iya dipantang ba tiang,* ngambika kitai dilepaska ari* dosa, lalu idup ngereja utai ti lurus. “Ketegal telih iya, kita digeraika.”
25 Suba kita baka bedus ti tesat, tang diatu kita udah pulai baru ngagai pengibun bedus sereta penyaga pengidup kita.
Nota Kaki
^ Jaku Asal, “dikemaluka.”
^ Jaku Asal, “pemanah,” iya nya, sifat enggau pengawa Iya ke patut dipuji.
^ Tauka “meresa.”
^ Tauka “semua gerempung ke ditumbuhka mensia.”
^ Jaku Asal, “mampul.”
^ Tauka “ukai ngena nya nutup.”
^ Tauka “penusah ati; pemedis.”
^ Jaku Gerika, “sy·neiʹde·sis.” Peda Penerang Leka Jaku, “Sy·neiʹde·sis.”
^ Tauka “Lebuh orang kasar jaku enggau iya.”
^ Tauka “jaku ti kasar.”
^ Tauka “pun kayu.”
^ Tauka “nadai agi kaul enggau.”
