Enda. Perintah Petara ukai dalam ati orang Kristian. a Dalam Bup Kudus bisi madahka dini alai perintah tu, lalu ngumbai tu “Perintah serega.” (Matthew 4:17) Aram kitai beratika, nama kebuah Bup Kudus ngumbai Perintah Petara siti perintah ke merintah ari serega.

•   Perintah Petara bisi pemerintah, rayat, sereta undang-undang. Tuju perintah tu ditumbuhka, kena ngereja semua peneka Petara ba serega enggau ba dunya.—Matthew 6:10; Pemandang 5:10.

•   Perintah Petara deka merintah semua orang ari mayuh menua, bansa sereta jaku. (Daniel 7:13, 14) Kuasa perintah tu ukai datai ari rayat, tang datai ari Petara.—Masmur 2:4-6; Isaiah 9:7.

•   Jesus madahka bala rasul iya, sida deka niki ke serega lalu sama merintah enggau iya.—Luke 22:28, 30.

•   Perintah Petara bisi munsuh, lalu perintah tu deka munaska semua munsuh iya.—Masmur 2:1, 2, 8, 9; 110:1, 2; 1 Korint 15:25, 26.

 Sekeda orang pechaya, Perintah Petara bisi ba ati sida, tauka sida mega ngumbai perintah tu merintah nengah ati sida. Tang ajar Bup Kudus enda nyukung penemu tu. Laban dalam Bup Kudus bisi madahka, “ninga jaku pasal Perintah Petara” tauka “Berita Manah pasal Perintah Petara” deka meri kesan ti manah dalam ati kitai lalu ulih ngubah pengidup kitai.—Matthew 13:19; 24:14.

Nama reti ‘perintah Petara bisi ba ati nuan’?

 Bisi orang charut runding pasal dini alai Perintah Petara pengudah sida macha sekeda salin Bup Kudus. Chunto iya, bisi salin Bup Kudus, ba Luke 17:21 madahka, ‘Perintah Petara bisi ba tengah-tengah kita.’ Enti deka nemu nama reti ayat tu, kitai patut mansik cherita penuh iya.

 Jesus benung bejaku enggau orang Parisi, iya nya seraban tuai pengarap ke begedika iya, lalu bepakat deka munuh iya. (Matthew 12:14; Luke 17:20) Enti nitihka penyai sida, kati ulih kitai ngumbai Perintah Petara bisi ba ati sida, taja pan ati sida amat kieh baka batu? Tentu enda, enda pia! Ku Jesus nyebut ngagai sida, “Ati kita penuh enggau pemula sereta penyai.”—Matthew 23:27, 28.

 Bisi beberapa iti salin Bup Kudus udah nyalin jaku ba Luke 17:21 enggau betul. Chunto iya, Bup Kudus Salin Dunya Baru nyalin, “Perintah Petara bisi ba entara kita.” Salin tu ngena agi laban leka jaku “entara” nunjukka, Jesus iya nya orang ke dipilih Petara nyadi Raja ba Perintah Iya, bisi semak sereta enggau sida.—Luke 1:32, 33.