Luke 22:1-71
-
Bala imam ngiga jalai munuh Jesus (1-6)
-
Nyediaka utai kena Pengerami Paska ti penudi (7-13)
-
Ngepunka Makai Malam Tuan (14-20)
-
“Orang ke deka nyerahka aku ngagai munsuh bisi enggau aku ba mija” (21-23)
-
Balat bekelikuh pasal sapa ke pemadu besai (24-27)
-
Jesus ngaga sempekat pasal siti perintah (28-30)
-
Pengawa Peter ke besangkalka Jesus dipadahka (31-34)
-
Patut besedia; dua iti pedang (35-38)
-
Sampi Jesus ba Bukit Kana (39-46)
-
Jesus ditangkap (47-53)
-
Peter enggai ngaku ngelala Jesus (54-62)
-
Jesus dikelese (63-65)
-
Dipechara ba mua Raban Kunsil Orang Judah (66-71)
22 Pengerami Roti ti Enda Beragi, ke mega dikumbai Pengerami Paska, nyau semak.
2 Bala tuai imam enggau bala penulis Adat ngiga chara ti pemadu manah kena munuh Jesus, laban sida takutka orang mayuh.
3 Udah nya, Sitan nyungkak ati siku ari 12 iku rasul Jesus ke benama Judas Iskariot.
4 Nya alai, Judas mupuk lalu berandau enggau bala tuai imam sereta ketuai jejaga Rumah Sembiang pasal chara iya deka nyerahka Jesus ngagai sida.
5 Sida gaga ati lalu besetuju deka meri iya duit pirak.
6 Iya pan besetuju, lalu berengkah begigaka peluang ti manah kena nyerahka Jesus ngagai sida enggau chara belalai ngambika enda ditemu orang mayuh.
7 Maya Pengerami Roti ti Enda Beragi sereta lebuh jelu ke dikena ngintu Pengerami Paska dibunuh,
8 Jesus bejaku ngagai Peter enggau John: “Mupuk seduai lalu sediaka pemakai kena kitai ngintu Pengerami Paska.”
9 Ku seduai iya nanya Jesus: “Dini nuan deka kami nyediaka utai nya?”
10 Ku iya madah ngagai seduai iya: “Lebuh seduai tama ngagai Jerusalem, siku lelaki ke mai kebuk* ai deka betemu enggau seduai. Titihka iya ngagai rumah ti endur iya tama.
11 Udah nya sebut ngagai orang ke bempu rumah nya, ‘Pengajar nanya nuan: “Dini alai bilik temuai endur aku ulih makai maya Pengerami Paska enggau bala murid aku?”’
12 Lalu iya deka nunjukka seduai siti bilik besai ba tingkat atas ke udah disedia lalu tau dikena. Sediaka pemakai Pengerami Paska ke kitai ba dia.”
13 Nya alai, seduai iya mupuk lalu beratika semua utai amat nyadi baka ke dipadah Jesus ngagai seduai iya. Udah nya, seduai iya nyediaka pemakai ke Pengerami Paska.
14 Lebuh maya nya datai, Jesus duduk makai ba mija enggau bala rasul iya.
15 Iya madah ngagai sida: “Aku keran amat deka makai enggau kita maya Pengerami Paska tu sebedau aku merinsa,
16 laban aku madah ngagai kita: Aku enda agi makai ba Pengerami Paska nyentukka semua utai ke bekaul enggau pengerami nya dikeamatka ba Perintah Petara.”
17 Pengudah mangkuk disuaka ngagai iya, iya besampi meri terima kasih lalu madahka: “Ambi mangkuk tu lalu sadung ngagai tiap iku kita,
18 laban aku madah ngagai kita: Berengkah ari diatu, aku enda agi ngirup wain nyentuk ngagai Perintah Petara datai.”
19 Pia mega, iya ngambi roti, besampi meri terima kasih, mechahka roti nya, lalu nyuaka roti nya ngagai sida. Ku iya madahka: “Roti tu ngambarka tubuh aku, ke deka diserahka ke kita. Terus meh ngereja tu kena ngingatka aku.”
20 Pia mega, pengudah sida makai malam, iya ngambi mangkuk lalu madahka: “Mangkuk tu ngambarka sempekat baru ke ditanggam ngena darah aku, ti deka dituang ke kita.
21 “Tang orang ke deka nyerahka aku ngagai munsuh bisi enggau aku ba mija tu.
22 Anak Mensia endang deka mati baka ke udah dipadahka Petara. Tang tulah meh orang ke nyerahka iya ngagai munsuh!”
23 Lebuh bala rasul ninga nya, sida lalu berandau enggau pangan diri deka nemu sapa entara sida ke sanggup ngereja nya.
24 Tang udah nya, sida balat bekelikuh pasal sapa entara sida ke pemadu besai.
25 Tang ku Jesus madah ngagai sida: “Bala raja orang bansa bukai bekuasa atas pengidup rayat sida, lalu sida ke merintah dikumbai orang ke ngereja utai ti manah ngagai orang bukai.
26 Tang kita enda tau baka nya. Barang sapa ke pemadu besai ba bala kita patut nyadi iya ke pemadu biak, lalu orang ke ngulu patut nyadi orang ke ngintu orang bukai.
27 Ni bagi orang ke besai agi? Orang ke makai ba mija tauka orang ke ngintu iya? Tentu orang ke makai ba mija nya besai agi, enda pia? Tang ba bala kitai, aku meh ke ngintu kita.
28 “Taja pia, kita meh ke mengkang enggau aku lebuh aku napi penguji.
29 Baka Apai aku ke udah ngaga sempekat enggau aku deka meri aku siti perintah, aku mega deka ngaga sempekat enggau kita,
30 ngambika kita ulih makai enggau ngirup ba mija aku dalam Perintah aku sereta duduk ba kerusi diraja, lalu ngakim 12 raban bansa orang Israel.
31 “Simon, Simon, Sitan udah minta deka nampi semua kita baka gandum.
32 Tang aku udah bebendar minta ngagai Petara ngarika nuan, ngambika nuan enda lenyau pengarap. Sepengudah nuan nesal ati, keringka pengarap bala menyadi nuan.”
33 Udah nya Peter madah ngagai iya: “Tuan, aku udah besedia deka dijil sereta sama mati enggau nuan.”
34 Tang ku Jesus madah ngagai iya: “Peter, aku madah ngagai nuan: Sebedau manuk engkukuk seharitu, nuan deka tiga kali madahka diri enda ngelala aku.”
35 Iya mega madah ngagai sida: “Lebuh aku enda ngasuh kita mai kambut duit, kambut pemakai, enggau kasut maya kita bejalai, kati kita bisi kurang nama-nama utai?” Ku sida madahka: “Nadai!”
36 Ku iya madah: “Tang diatu, orang ke bisi kambut duit tauka kambut pemakai patut mai utai nya. Lalu orang ke nadai pedang, patut nyual gari luar iya kena meli pedang.
37 Endang udah ditulis: ‘Iya deka dikumbai orang jai.’ Aku madah ngagai kita, ayat tu bejaku pasal aku. Kebendar nya, utai ke ditulis pasal aku tu benung dikeamatka.”
38 Udah nya sida madah ngagai iya: “Tuan, peda nuan. Ditu bisi dua iti pedang.” Iya madah ngagai sida: “Nya pan udah chukup.”
39 Udah nya, Jesus pansut lalu mupuk ngagai Bukit Kana baka selama. Bala murid iya mega nitihka iya.
40 Sepengudah datai ba dia, iya madah ngagai sida: “Anang ngetu besampi ngambika kita enda alah laban penguji.”
41 Udah nya, pengudah iya mupuk jauh mimit* ari sida, iya besugang lalu besampi.
42 Ku iya: “Apai, enti Nuan deka, ambi meh mangkuk* tu ari aku. Taja pia, anang nitihka peneka aku, tang awakka peneka Nuan nyadi.”
43 Udah nya, siku melikat datai ari serega lalu ngeringka ati iya.
44 Tang ketegal runding iya balat charut sereta ati iya balat tusah, nya alai iya majak bendar agi besampi nyentukka peluh iya nyau nyadi baka darah ke neritik ngagai tanah.
45 Pengudah iya besampi, iya pulai baru ngagai bala murid iya. Tang iya meda sida benung tinduk laban sida lelak ketegal kelalu balat tusah ati.
46 Iya madah ngagai sida: “Nama kebuah kita tinduk? Dani kita lalu anang ngetu besampi, ngambika kita enda alah laban penguji.”
47 Lebuh Jesus benung bejaku, seraban orang datai. Sida diuluka Judas, siku ari 12 iku rasul iya. Judas mansang ngagai Jesus lalu nyium iya.
48 Tang Jesus madah ngagai iya: “Judas, kati nuan nyium Anak Mensia kena nyerahka iya ngagai munsuh?”
49 Lebuh bala murid Jesus meda utai ke nyadi, sida lalu bejaku: “Tuan, patut kami nyerang sida ngena pedang?”
50 Siku ari sida indah nyerang ulun imam besai, lalu mutuska pending kanan iya.
51 Tang Jesus madahka: “Umbas nya.” Jesus pan negu pending ulun nya lalu ngeraika iya.
52 Udah nya, Jesus bejaku ngagai bala tuai imam, ketuai jejaga Rumah Sembiang, enggau bala tuai bansa orang Judah ke datai deka nangkap iya: “Nama kebuah kita bebaika pedang enggau pemalu baka ke nangkap perumpak?
53 Tiap hari aku begulai enggau kita ba Rumah Sembiang, tang enda ga kita nangkap aku. Taja pia, tu meh maya kita ngereja nya sereta maya pemetang bekuasa.”
54 Udah nya sida nangkap Jesus, lalu mai iya ngagai rumah imam besai. Peter nitihka iya ari jauh.
55 Lebuh sida nungkun api ba tengah laman rumah nya, Peter mega duduk enggau sida.
56 Tang bisi siku ulun indu meda iya duduk semak api. Pengudah beratika iya, ulun indu nya madahka: “Iya tu mega orang ke begulai enggau lelaki nya.”
57 Tang Peter enggai ngaku. Ku iya: “Nadai aku ngelala iya.”
58 Enda lama udah nya, siku agi orang meda iya lalu madahka: “Nuan mega siku ari sida iya.” Tang ku Peter nyaut: “Ukai.”
59 Kira-kira sejam udah nya, siku da agi orang bebendar madahka: “Tentu iya tu orang ke begulai enggau lelaki nya, laban iya pan orang Galili.”
60 Tang Peter nyaut: “Nadai aku nemu utai ku nuan.” Tekala nya mega, lebuh iya benung bejaku, manuk pan engkukuk.
61 Maya nya, Tuan Jesus nguing lalu malik ngagai Peter, lalu Peter teingatka utai ke dipadah Tuan Jesus ngagai iya: “Sebedau manuk engkukuk seharitu, nuan deka tiga kali madahka diri enda ngelala aku.”
62 Peter pan pansut lalu duie-duie nyabak.
63 Sida ke nyaga Jesus belabuh ngeleseka iya sereta malu iya.
64 Pengudah sida mampul mua iya, sida enda ngetu nyebut: “Enti nuan amat nabi, padahka ngagai kami sapa ke malu nuan!”
65 Sida mega majak nyebut mayuh macham utai kena ngemelika iya.
66 Lebuh hari nyau tawas, bala tuai bansa orang Judah, nyengkaum bala tuai imam sereta bala penulis Adat, begelumu lalu mai Jesus ngagai balai Raban Kunsil Orang Judah. Ku sida:
67 “Padahka ngagai kami enti nuan tu Kristus.” Tang ku iya nyaut: “Taja pan aku madah ngagai kita, kita tentu enda pechaya.
68 Pia mega, enti aku nanya kita, kita tentu enggai nyaut.
69 Tang berengkah ari diatu, Anak Mensia deka duduk ba sepiak kanan Petara ti bekuasa.”
70 Lalu semua sida nanya: “Enti pia, kati nuan tu Anak Petara?” Ku iya nyaut: “Kita empu ke ngumbai aku Anak Petara.”
71 Ku sida madahka: “Enti pia, nama kebuah kitai begunaka saksi bukai? Kitai empu udah ninga nya ari mulut iya empu.”
Nota Kaki
^ Endur engkah ai ke digaga ari tanah liat.
^ Tauka “kira-kira sepenyauh sepenikau batu.”
^ Tu ngambarka peneka Petara ke ngemendarka Jesus mati ketegal dituduh bejaku ngelaban Petara.
