• Dipilih Petara. “Aku udah nyiri raja Aku . . . Aku deka ngaga mayuh bengkah bansa nyadika pesaka nuan, lalu semua dunya deka diempu nuan.”—Masmur 2:6, 8.

• Peturun Raja David. “Siku anak mit udah ada ke kitai! Siku anak lelaki udah diberi ngagai kitai! . . . Kuasa diraja iya deka majak mansang. Perintah iya deka seruran bisi pemaik. Iya deka megai perintah nganti Raja David, nudukka kuasa iya ba atur ti ngena sereta lurus, kenyau ari diatu nyentuk ngagai pengujung dunya.”—Isaiah 9:6, 7.

• Diadaka ba Betlehem. “Betlehem Epratah, . . . ari nuan Aku deka mansutka siku pemerintah ke orang Israel, . . . semua mensia di serata dunya deka ngaku iya endang besai kuasa.”—Mikah 5:2, 4.

• Disakal sereta dibunuh mensia. “Nadai orang deka malik ngagai iya, kitai enggai ibuhka iya. . . . Iya bakal ketegal dosa kitai, lalu iya dipalu ketegal penyai kitai.”—Isaiah 53:3, 5.

• Diangkatka ari pemati sereta dimuliaka. “Nuan nyaga aku ari kuasa pemati. . . . Nuan enda ninggalka aku di dunya pemati. . . . Ati aku gaga laban Nuan bisi enggau aku lalu ati aku lantang belama iya.”—Masmur 16:10, 11.

Sepemanjai sejarah mensia, nadai orang bukai kelimpah ari Jesus, ulih nyadi pemerintah ti pemadu manah. Sebedau iya ada, seiku melikat udah madahka indai iya Maria, ‘Petara Jehovah deka meri iya kerusi diraja aki iya David. . . . lalu Perintah iya enda nemu abis!’—Luke 1:31-33.

Jesus ukai nyadi Raja ba dunya. Iya deka nyadi Raja ba Perintah Petara lalu merintah mensia ari serega. Nama kebuah Jesus ulih nyadi Pemerintah ti pemadu manah? Peratika utai ti udah digaga iya maya ba dunya.

•   Jesus ibuhka orang bukai. Jesus deka nulung semua orang enda ngira sekalika sida lelaki tauka indu, tuai tauka biak, sereta ari chara pengidup ti bebida. (Matthew 9:36; Mark 10:16) Lebuh seiku lelaki ke sakit lan bejaku ngagai iya, ‘Enti nuan deka, nuan ulih ngasuh aku tuchi,’ Jesus berasai sinu lalu ngeraika iya.—Mark 1:40-42.

• Jesus ngajar kitai chara ngagaka ati Petara. Iya madah, ‘Kita enda ulih betuaika Petara enggau duit.’ Jesus mega ngajar pasal siti prinsip ti endang udah ditemu mayuh orang iya nya, kitai patut ngereja utai ngagai orang baka ke dikedekaka kitai kereja orang ngagai kitai. Kelimpah ari nya, Jesus nunjukka Petara ukai semina beratika ulah kitai, tang mega runding enggau ati kitai. Nya alai, enti deka ngagaka ati Petara, kitai patut nagang runding sereta ati kitai. (Matthew 5:28; 6:24; 7:12) Enti deka idup enggau lantang, kitai patut belajar pasal peneka Petara sereta nitihka ajar nya.—Luke 11:28.

• Jesus ngajar kitai chara ngayanka pengerindu. Jaku enggau pengawa Jesus negu ati orang ke ningaka iya. ‘Orang mayuh alit ati ke ajar iya, laban iya ngajar sida baka orang ke bisi kuasa.’ (Matthew 7:28, 29) Jesus ngajar sida ngambika, “rinduka munsuh kita.” Jesus empu mega nyadika teladan ba pengawa tu. Jesus besampi ngambika Petara ngampunka orang ke munuh iya. Iya besampi, “Apai, ampun sida, laban sida enda nemu utai ti dikereja diri.”—Matthew 5:44; Luke 23:34.

Terang amat, Jesus orang ti pemadu manah ati sereta rindu nulung orang bukai. Nya alai, iya meh pemadu layak merintah dunya. Tang, kemaya Jesus deka nyadi Raja?