Isaia 60:1 ia gwau: “Hahine e, oi toreisi, diari oi halasia, badina emu diari ia mai vadaeni. Iehova ena hairai be oi latanai.” Siri ese ia hahedinaraia unai “hahine” be Siona, eiava Ierusalema, unai negai Iuda ena siti badana. (Isa. 60:14; 62:1, 2) Unai siti ese Israela ena bese ibounai ia laulaulaia. Unai siri totona henanadai rua do ita haerelaia: Ginigunana be, edena negai bona edena dala ai Ierusalema ia “toreisi” bona laulau dalanai diari ia halasia? Iharuana be, Isaia ena hereva be hari dala badana ai ia guguru, a?

Edena negai bona edena dala ai Ierusalema ia “toreisi” bona laulau dalanai diari ia halasia? Ierusalema bona ena dubu helaga idia hadikaia, unai negai Iuda taudia be lagani 70 lalonai Babulonia ai igui hesiai taudia bamona idia noho. To Mede bona Parasa ese Babulonia idia halusia murinai, Babulonia Basileiana henunai idia noho Israela taudia be edia tano dekenai idia giroa bona tomadiho momokanina idia haginia lou. (Esr. 1:1-4) Lagani 537 B.C.E. ena matamana ai, Israela ena iduhu 12 amo abidadama taudia be unai idia karaia. (Isa. 60:4) Iehova dekenai boubou gaudia idia henia, aria badadia idia moalelaia, bona dubu helaga idia haginia lou. (Esr. 3:1-4, 7-11; 6:16-22) Iehova ena hairai be Ierusalema eiava iena taunimanima latanai ia hedinarai lou. Unai dainai laulau dalanai, Iehova idia diba lasi besedia dekenai idia be diari bamona.

To unai negai, Isaia ena peroveta herevana be dala maragina ai ia guguru. Israela taudia momo be Dirava idia badinaia lasi. (Neh. 13:27; Mal. 1:6-8; 2:13, 14; Mat. 15:7-9) Gabeai, Mesia, Iesu Keriso idia dadaraia danu. (Mat. 27:1, 2) Lagani 70 C.E. ai, Ierusalema bona ena dubu helaga be nega iharuana idia hadikaia lou.

Iehova ia peroveta unai do ia vara. (Dan. 9:24-27) Momokani, Isaia karoa 60 ese ia perovetalaia hanamoa lou karana be tanobada Ierusalema dekenai, kahana ibounai do ia guguru karana be Iehova ena ura lasi.

Isaia ena hereva ena kahana badana be iseda negai ia guguru, a? Oibe, to laulau dalanai, hahine ma ta dekenai ia vara noho, unai be—“ataiai Ierusalema.” Aposetolo Paulo ese unai hahine ia gwauraia: “Ia be iseda sinana.” (Gal. 4:26) Ataiai Ierusalema be Dirava ena guba oreana bona kamonai anerudia be unai orea lalonai idia noho. Ena natudia be Iesu bona 144,000 horoa Keristani taudia, Paulo bamona idia danu be guba helarona idia abia. Horoa Keristani taudia be “bese helagana” lalonai idia noho, “Dirava ena Israela unai.”—1 Pet. 2:9; Gal. 6:16.

Edena dala ai ataiai Ierusalema ia “toreisi” bona ‘diari ia halasia’? Tanobada ai, iena horoa natudia amo unai ia karaia. Do oi itaia idia karaia gaudia be Isaia karoa 60 ai ia noho peroveta herevana bamona.

Aposetolo taudia idia mase murinai, aposteit karana ia bada, bona laulau dalanai horoa Keristani taudia be dibura lalonai idia noho bamona, unai dainai idia “toreisi” be namo. (Mat. 13:37-43) Unai nega ai idia be Babulonia Badana, tomadiho koikoi ena igui henunai idia noho. Horoa taudia be igui hesiai taudia bamona idia noho ela bona “nega oromana ena dokona,” unai nega be lagani 1914 amo ia matamaia. (Mat. 13:39, 40) Daudau lasi murinai, lagani  1919 ai, tomadiho koikoi ena igui amo idia ruhaia bona karaharaga, Basileia ena sivarai namona idia harorolaia, unai amo laulau dalanai diari idia halasia matamaia. a Lagani momo ia hanaia lalonai, bese ibounai amo taunimanima be unai diari dekenai idia mai, Dirava ena Israela taudia oreadia danu, idia be Isaia 60:3 ese ia herevalaia “king taudia.”—Apok. 5:9, 10.

Vaira negai, horoa Keristani taudia be Iehova amo diari do idia halasia. Edena dala ai? Tanobada ai idia mase neganai, idia be “Ierusalema Matamatana” eiava Keriso ena adavana, unai be 144,000 taudia ai do idia lao, bena king bona hahelaga gaukara do idia karaia.—Apok. 14:1; 21:1, 2, 24; 22:3-5.

Ierusalema Matamatana be Isaia 60:1 ena peroveta herevana ena kahana badana do ia hagugurua. (Isaia 60:1, 3, 5, 11, 19, 20 bona Apokalupo 21:2, 9-11, 22-26 oi hahegeregerea.) Idaunegai Israela ai,Ierusalema be gavamani ia noho gabuna, unai dainai Ierusalema Matamatana bona Keriso be tanobada matamata ena gavamani ai do idia lao. Edena dala ai Ierusalema Matamatana be “guba amo ia diho mai, Dirava dekena amo”? Tanobada ai idia noho taudia totona gau namona ta do ia karaia. Bese ibounai amo, Dirava idia gari henia taudia be “ena diari lalonai do idia raka.” Kara dika bona mase ena igui amo idia do ia ruhaia. (Apok. 21:3, 4, 24) Unai ena anina be ‘gau ibounai do ia hanamoa lou,’ Isaia bona peroveta taudia ma haida edia peroveta herevana hegeregerena. (Kara 3:21) Keriso be King ai ia lao neganai, unai hanamoa lou gaukarana ia matamaia bona ena Lohia Lagani 1,000 ena dokonai, unai gaukara do ia ore.