Nicolas bona Céline be hekwakwanai idauna idia davaria. France brens amo asainmen ta idia abia dae bona kongrigeisen matamata dekenai idia lao. Idia gwau: “Matamanai ai moale bada, to gabeai emai turadia ai reaia matamaia. Emai kongrigeisen matamata dekenai tadikaka taihu ai do dibaia namonamo lasi.” a Kongrigeisen matamata dekenai oi lao be mai ena hekwarahi, to dahaka oi karaia diba oi moale noho totona? Haida be dahaka idia karaia diba oi idia durua totona? Bona edena dala ai, ma haida do oi hagoadaia bona oi idia hagoadaia diba?

OI IA DURUA DIBA HAKAUA HEREVADIA FOA

1. Iehova dekenai oi tabekau. (Sal. 37:5) Japan ai, taihu ta, Kazumi be lagani 20 ia noho kongrigeisen ia rakatania, badina ena adavana ena moni gaukara dainai gabu ma ta dekenai idia lao. Edena dala ai, ‘ena mauri be Iehova ena imana ai ia atoa’? Ia gwau: “Iehova dekenai egu lalohekwarahi, egu gari bona sibona lau noho hemamina lau gwauraia. Hanaihanai unai lau karaia neganai, lau dekenai goada ia henia.”

Edena dala ai mai kudouna ibounai ida Iehova dekenai oi tabekau diba? Tubutubu gaudia be ranu bona tano namona ai idia tubu namonamo hegeregerena, iseda abidadama ia hagoadaia gaudia ita karaia. Matamanai ita herevalaia tadikaka, Nicolas, be Aberahamo, Iesu, bona Paulo edia haheitalai ia laloa dobu, idia be gau momo idia dadaraia, Dirava ena ura idia karaia totona. Unai ese Nicolas ia hagoadaia bona ia abia dae Iehova ese do ia durua. Dina ta ta ai Baibel oi stadilaia karana ese oi do ia durua, emu mauri ai idia vara senisi do oi haheaukalaia bona oi dibaia gaudia  be emu kongrigeisen matamata dekenai do oi gaukaralaia.

2. Emu kongrigeisen gunana oi hahegeregerea lasi. (Had. 7:10) Jules be Benin amo United States dekenai ia lao neganai, unai tano ena mauri dalana ia diba be namo. Ia gwau, “Lau mamia lau hedavari henia taudia ta ta dekenai egu sivarai ibounai lau gwauraia.” Ia dekenai unai be gau matamata, unai dainai tadikaka taihu ia bamoa lasi. To idia ia diba namonamo murinai, ena lalohadai ia haidaua. Ia gwau: “Lau laloparara ena be tano ma ta dekenai ita noho, to taunimanima ibounai be hegeregere. To edia kara bona hereva dalana sibona be idau. Bona unai ita abia dae be gau badana.” Unai dainai emu kongrigeisen gunana be matamatana ida oi hahegeregerea lasi. Painia taihu ta, Anne-Lise, ia gwau: “Kongrigeisen ma ta dekenai lau lao ena badina be lau ura gau matamata lau dibaia. Bona lau rakatania gaudia lau laloa lasi.”

Danu elda taudia ese edia kongrigeisen gunana be matamatana ida idia hahegeregerea lasi be namo. Gau haida idia karaia dalana be idau, bona unai be kerere lasi. Namona be oi lao gabuna ena noho dalana oi diba namonamo guna, bona emu lalohadai oi gwauraia. (Had. 3:1, 7b) Emu tadikaka dekenai haheitalai namona oi hahedinaraia, to namo lasi idia oi doria emu lalohadai idia badinaia totona.—2 Kor. 1:24.

3. Emu kongrigeisen matamata dekenai oi bisi. (Fili. 1:27) Gabu ma ta dekenai oi lao totona, gau momo do oi karaia bona nega bada oi henia, to emu kongrigeisen matamata ena hebou dekenai oi lao haraga be namo. Unai amo tadikaka taihu be oi do idia dibaia bona heduru idia henia diba. Lucinda bona ena natuna kekeni rua be South Africa ena siti badana ta dekenai idia lao, ia gwau: “Egu turadia ese lau idia hagoadaia egu kongrigeisen matamata ai tadikaka taihu lau dibaia be namo, haroro gaukara ai ma haida lau bamoa bona hebou dekenai do lau haere. Danu tadikaka taihu ai hamaoroa haroro grup ena hebou totona, emai ruma idia gaukaralaia diba.”

Kongrigeisen dekenai “ta ta ida umui gaukara hebou” karana ese oi do ia durua, oi sibona bona ma haida oi hagoadaia totona. Matamanai ita herevalaia taihu, Anne-Lise be elda taudia ese idia hagoadaia tadikaka taihu ibounai ida ia haroro hebou totona. Dahaka namo ia vara? Ia gwau: “Lau laloparara unai be dala namona kongrigeisen taudia lau diba namonamo totona. Danu, idia oi durua diba, hegeregere, Kingdom Hall oi hagoevaia bona hanamoa, unai amo oi hahedinaraia unai be emu kongrigeisen. Bema unai oi karaia, tadikaka taihu be oi do idia diba namonamo bona do oi mamia idia be emu famili matamata.

4. Tura matamatadia oi tahua. (2 Kor. 6:11-13) Tura namodia oi tahua totona dala namona ta be, hebou ia do matamaia lasi bona ia ore murinai ma haida oi hereva henia, unai amo idia do oi diba. Oi hekwarahi edia ladana oi diba totona. Tadikaka bona taihu edia ladana oi laloatao bona  kara namo henia neganai, do idia ura oi idia dibaia bona tura henia.

Namo lasi ma haida ese oi idia abia dae totona oi lalohekwarahi, namona be emu tadikaka bona taihu matamatadia ese emu kara korikorina idia dibaia. Lucinda oi tohotohoa diba, ia gwau: “Dala ai karaia emai ruma dekenai tadikaka taihu ai boiria, unai dainai hari idia be emai tura namodia.”

“TA TA DO UMUI ABIA DAE”

Haida be Kingdom Hall dekenai idia vareai neganai, idia gari. Unai dainai edena dala ai emu kongrigeisen ai idia mai taudia do oi kara henia? Aposetolo Paulo ese ita ia hagoadaia, “ta ta do umui abia dae, Keriso ese ita ia abia dae hegeregerena.” (Roma 15:7) Elda taudia ese Keriso idia tohotohoa neganai, idia mai matamata tadikaka taihu do idia gari lasi. (Maua ladana, “ Gabu Matamata Oi Lao Neganai Dahaka ese Oi Do ia Durua?”) To, kongrigeisen taudia bona natudia danu, be mai edia maduna idia mai matamata taudia idia tura henia totona.

Ma haida ita welkam henia dalana ta be hariharibada karana ita hahedinaraia, to idia ita durua danu. Hegeregere, taihu ta be nega ia atoa ena gabu dekenai ia mai taihu ia durua, bona siti dekenai basi bona trein abia dalana ia hahedinaraia. Unai kara namona dainai, taihu ma ta be ena noho gabuna matamata ia manadalaia.

GABU MATAMATA ENA NAMO

Kwadi be ia bada ia lao neganai ena kopina be nega momo lalonai do ia senisi, bena ena apena do ia goada ia roho totona. Unai hegeregerena, kongrigeisen matamata dekenai oi lao neganai, namona be oi lalohekwarahilaia gaudia oi dadaraia unai amo Iehova ena hesiai gaukara oi karaia diba. Nicolas bona Céline idia gwau: “Kongrigeisen ma ta dekenai lao karana be treinini namona. Taunimanima bona gabu matamata oi dibaia noho karana ese ai ia hagoadaia, kara namodia ma haida oi hahedinaraia totona.” Matamanai ita  herevalaia tadikaka, Jean-Charles be ena ruma bese ese namo idia abia dalana ia herevalaia, ia gwau: “Emai kongrigeisen matamatana dekenai emai natudia be idia goada bona Iehova kahirakahira idia noho. Hua haida murinai, emai natuna kekeni be wiki ena hebou totona asainmen ia abia, bona emai natuna mero be bapatiso lasi pablisa ai ia lao.”

To bema emu noho dalana dainai, oi hegeregere lasi pablisa momo lasi gabuna dekenai oi lao, be edena bamona? Inai atikol ai ita herevalaia gaudia haida oi badinaia, unai amo emu kongrigeisen gunana be kongrigeisen matamata bamona do oi laloa diba. Iehova dekenai oi tabekau noho, dala oi karaia haroro gaukara ai ma haida oi bamoa bona tura matamatadia oi tahua eiava tura gunadia ida emu hetura karana oi hagoadaia. Nega oi atoa emu kongrigeisen ai idia mai matamata taudia eiava heduru idia ura tadikaka taihu ma haida oi durua. Lalokau be Keristani taudia edia kara badana dainai, unai oi karaia neganai, emu hetura karana Iehova ida do ia goada. (Ioa. 13:35) Namona be oi abia dae momokani, “Dirava ese unai bamona boubou karadia ia moalelaia.”—Heb. 13:16.

Ena be kongrigeisen matamata dekenai lao karana be mai ena hekwarahi, to Keristani taudia momo be edia kongrigeisen matamata idia moalelaia bona gaukara namodia momo idia karaia bona oi danu be unai oi karaia diba! Anne-Lise ia gwau: “Kongrigeisen matamatana dekenai lau lao karana ese lau ia durua ma haida lau diba totona.” Hari, Kazumi ia abia dae kongrigeisen matamata dekenai oi lao neganai, “Dala idauidau ai Iehova ena heduru do oi mamia.” Bona Jules be edena bamona? Ia gwau: “Tura matamatadia lau davaria dainai, lau mamia lau be sibona lasi. Hari lau mamia egu kongrigeisen matamatana lau diba namonamo bona ia auka lau rakatania totona.”