Apokalupo—Ioane Ia Abia Herevana 21:1-27
21 Bona guba matamata bona tanobada matamata lau itaia.+ Guba gunana bona tanobada gunana be idia boio vadaeni,+ bona davara+ danu be ia boio.
2 Siti helagana lau itaia, Ierusalema Matamatana unai, guba amo ia diho mai, Dirava dekena amo.+ Ia be headava matamata kekeni bamona, sibona ia hahairaia bona do ia adavaia tauna totona ia hegaegae.+
3 Vadaeni gado badana ta be terona amo lau kamonai, ia gwau: “Dirava ena palai rumana be taunimanima ida ia noho, bona ia be idia ida do ia noho, bona idia be ena taunimanima ai do idia lao. Bona Dirava be idia ida do ia noho.+
4 Bona ia ese mata ranu ibounai be edia matana amo do ia dahua ore,+ bona mase, lalohisihisi, taitai, bona hisihisi be do idia ore.+ Gau gunadia be idia ore vadaeni.”
5 Bona terona latanai ia helai Diravana+ ia gwau: “Lau ese gau ibounai lau hamatamataia noho.”+ Danu ia gwau: “Inai hereva oi torea, badina idia be taunimanima ese idia abia dae diba bona idia be momokani.”
6 Bona ia be lau dekenai ia gwau: “Unai hereva be idia guguru vadaeni! Lau be Alepa bona Omega,* matamana bona dokona.+ Lau ese ranu mase tauna dekenai ia lohilohi mauri ranuna do lau henia, davana lasi.+
7 Ia kwalimu tauna ese unai gaudia do ia abia, bona lau be iena Dirava ai do lau lao, bona ia be egu natuna ai do ia lao.
8 To gari taudia, abidadama lasi taudia,+ goeva lasi bona kara bodagadia idia karaia taudia, ala-ala taudia,+ matabodaga taudia,*+ meamea taudia, kaivakuku tomadiho henia taudia, bona koikoi taudia ibounai,+ edia davana be ia araia noho lahi bona salipa gohuna dekenai do idia lao.+ Unai ena anina be mase iharuana.”+
9 Hisihisi ginigabedia 7 amo idia honu disi 7 idia dogoatao aneru 7 amo,+ aneru ta ia mai bona lau dekenai ia gwau: “Oi mai, bona headava matamata hahine do lau hahedinaraia, ia be Mamoe Natuna ena adavana.”+
10 Vadaeni lauma helaga ena siahu amo, ia ese ororo badana ta dekenai lau ia abia lao. Bona lau dekenai siti helagana, Ierusalema, ia hahedinaraia, unai siti be guba amo ia diho mai, Dirava dekena amo,+
11 bona Dirava ena hairai be ia dekenai ia noho.+ Ia be dava bada nadi bamona ia diaridiari, bona iasipa nadi bamona ia diaridiari, galasi bamona.+
12 Unai siti ena magu be ia bada bona ia lata bona ena iduara be 12. Unai iduara badinai aneru 12 idia gini bona unai iduara dekenai Israela ena iduhu 12 edia ladadia idia torea.
13 Unai magu ena ist kahanai iduara toi idia noho, ena not kahanai iduara toi idia noho, ena saut kahanai iduara toi idia noho, bona ena west kahanai iduara toi idia noho.+
14 Unai siti ena magu ena badina nadidia danu be 12, bona idia latanai be Mamoe Natuna ena aposetolo taudia 12 edia ladana idia noho.+
15 Vadaeni lau ia hereva henia aneruna be hahetohoa gauna ta, golo siriho unai, ia dogoatao, unai siti, ena iduara, bona ena magu ia hahetohoa totona.+
16 Bona unai siti ena kahana 4 edia bada be hegeregere, bona ena lata bona ena lababa be idia hegeregere. Vadaeni unai aneru ese siriho amo unai siti ia hahetohoa, bona ia be 12,000 stadia* bamona, ena lata, ena lababa, bona ena atai be idia hegeregere.
17 Danu, ena magu ena bada ia hahetohoa, bona ia be 144 kiubit.* Unai aneru ese ia gaukaralaia hahetohoa gauna be taunimanima ese idia gaukaralaia gauna hegeregerena.
18 Dirava ese magu be iasipa nadi amo ia karaia,+ bona unai siti be golo goevana amo ia karaia, ia be galasi bamona.
19 Bona Dirava ese unai siti ena badina nadi be dava bada nadi idauidau amo ia hahairaia. Unai badina nadi ginigunana be iasipa, iharuana be sapairo, ihatoina be kalakedo, namba 4 be samaragi,
20 namba 5 be sadonu, namba 6 be sadio, namba 7 be krusolito, namba 8 be berulo, namba 9 be topasio, namba 10 be krusoparaso, namba 11 be huakinto, namba 12 be ametuso.
21 Danu, iduara 12 be pel nadi 12, unai iduara ta ta be pel nadi amo idia karaia. Bona Dirava ese unai siti ena dala badana be golo goevana amo ia karaia, ia be galasi bamona.
22 Unai siti lalonai dubu helaga ta lau itaia lasi, badina Iehova,* Siahu Ibounai Diravana unai,+ be unai siti ena dubu helaga bona Mamoe Natuna danu be unai siti ena dubu helaga.
23 Bona dina bona hua ese unai siti idia hadiaria be anina lasi, badina Dirava ena hairai ese siti ia hadiaria,+ bona ena lamepa be Mamoe Natuna.+
24 Bona bese ibounai be ena diari lalonai do idia raka,+ bona tanobada ena king taudia ese edia hairai be ia lalonai do idia abia vareai.
25 Dina ai ena iduara do idia koua lasi, badina unuseniai hanuaboi be lasi.+
26 Bona bese ibounai edia hairai bona hanamoa be ia lalonai do idia abia vareai.+
27 To miro gauna ta bona gau dika rohorohona ia karaia tauna bona koikoi tauna be unai siti lalonai do idia vareai diba lasi,+ to Mamoe Natuna ena mauri bukana lalonai edia ladana idia noho taudia sibona be do idia vareai.+
Futnout
^ Eiava “A bona Z.” Alepa bona Omega be Grik alfabet ena leta ginigunana bona ginigabena.
