Hadibaia Tauna 7:1-29
7 Ladana namona ese dava bada dehoro ia hereaia,+ bona ta ena mase dinana ese ena vara dinana ia hereaia.
2 Taitai rumana dekenai oi lao be namo, to aria rumana dekenai oi lao be dika.+ Badina taunimanima ibounai be do idia mase, bona idia mauri noho taudia ese unai idia laloatao be namo.
3 Lalohisihisi ese kiri ia hereaia,+ badina tau ta ena lalohisihisi toana ese ena lalona do ia hanamoa.+
4 Taitai rumana dekenai ia noho aonega tauna be mauri bona mase ia laloa dobu. To kavakava tauna be hanaihanai moale karadia sibona ia laloa.+
5 Aonega tauna ena sisiba oi kamonai henia be mai ena namo,+ to kavakava tauna ena hanamoa herevadia* oi kamonai henia be dika.
6 Uro henunai idia araia noho au ginigini edia regena be kavakava taudia edia kiri ena regena hegeregerena,+ bona unai danu be anina lasi momokani.
7 To aonega tauna be ta ese ia hahisia neganai kerere ia karaia diba, bona laloani monina ese ta ena kudouna ia hadikaia diba.+
8 Kara ta ena dokona ese ena matamana ia hereaia. Manau tauna ese hekokoroku tauna ena kara ia hereaia.+
9 Do oi badu haraga lasi,+ badina vaia ia badu haraga tauna be kavakava tauna.*+
10 Namo lasi oi gwau, “Dahaka dainai guna negadia be namo, to hari be lasi?” Badina unai bamona oi henanadai be aonega karana lasi.+
11 Aonega tauna ese ahuna ia abia neganai unai be namo. Idia mauri taudia* dekenai unai be heduru gauna.
12 Badina aonega ese oi ia gimaia diba,+ moni ese oi ia gimaia hegeregerena,+ to diba bona aonega edia namo be edia biaguna idia hamauria diba.+
13 Dirava momokanina ena gaukara oi laloa, ia hagagevaia gauna be daika ese ia hamaoromaoroa diba?+
14 Dina namodia ai, kara namodia oi karaia,+ to dika negadia ai, namona be oi laloatao Dirava momokanina ese unai gaudia ia koua lasi.+ Unai ese ia hahedinaraia taunimanima be vaira nega ai idia dekenai do idia vara gaudia idia diba lasi.+
15 Egu anina lasi maurina lalonai,+ lau ese inai gau ibounai lau itaia: Kara maoromaoro tauna be kara maoromaoro ia karaia,+ to ia mase bona kara dika tauna be kara dika ia karaia, to ia mauri daudau.+
16 Namo lasi oi laloa oi sibona be kara maoromaoro tauna+ bona namo lasi sibona emu aonega oi heagilaia momo.+ Dahaka dainai sibona oi hadikaia noho?+
17 Metaira oi kara dika bona oi kara kava.+ Dahaka dainai oi do matamata negana ai oi mase haraga?+
18 Namona be sisiba ginigunana* oi badinaia bona sisiba iharuana* oi dogoatao,+ badina Dirava ia gari henia tauna ese unai sisiba rua do ia badinaia.
19 Aonega ese aonega tauna do ia hasiahua, vadaeni ena goada ese siti ena tatau goadadia 10 ia hereaia.+
20 Badina tanobada ai kara namo sibona ia karaia kara maoromaoro tauna ta ia noho lasi, ia danu be do ia kara dika.+
21 Danu, taunimanima ese idia gwauraia herevadia ibounai oi laloa momo lasi.+ Dika, oiemu hesiai tauna ese oi dekenai ia gwauraia hadikaia herevana oi kamonai,
22 badina oi diba danu, nega momo oi danu be ma haida oi gwauraia dika.+
23 Mai aonega ida gau ibounai lau stadilaia, bona lau gwau: “Lau be do lau aonega.” To lau hegeregere lasi.
24 Idia vara gaudia ibounai lau lalopararalaia be auka, idia be hegeregere dobu momokani gabuna dekenai idia noho. Tau ta ese ia lalopararalaia diba lasi.+
25 Egu lalona* lau hadaia aonega do lau tahua, bona idia vara gaudia edia badina do lau diba namonamo badina lau ura kavakava karadia bona anina lasi karadia lau lalopararalaia.+
26 Bena inai gauna lau davaria: Hahine be mase ena idita mamina ia hanaia. Ia be labana tauna ena tarapu bamona, iena kudouna be reke bamona, bona iena imana be dibura ruma ena seini bamona. Dirava momokanina ia ura hamoalea tauna be unai hahine amo do ia heau,+ to kara dika tauna be unai hahine ese do ia guia.+
27 Hadibaia tauna* ia gwau:+ “Kamonai, lau lalopararalaia gauna be inai. Lau tahua gauna lau davaria totona gau idauidau lau stadilaia,
28 to lau tahua goadagoada gauna be lau davaria lasi. Tatau 1,000 amo kara maoromaoro tauna tamona lau davaria, to hahine ibounai 1,000 amo kara maoromaoro hahinena ta be lasi.
29 Inai sibona lau davaria: Dirava momokanina ese taunimanima be mai kara maoromaoro ida ia havaraia,+ to idia sibona ese edia dala idauidau idia abia hidi.”+
Futnout
^ Heb., “ane.”
^ Eiava reana, “kavakava tauna ena toana.”
^ Heb., “dina idia itaia taudia.”
^ Unai be, siri 16 ese ia herevalaia gauna.
^ Unai be, siri 17 ese ia herevalaia gauna.
^ Heb., “kudouna.”
^ Heb., “Taunimanima ia haboua tauna.”
