Mẹnu Wẹ Johanu Baptizitọ Lọ?
Gblọndo Biblu tọn
Yẹwhegán Jiwheyẹwhe tọn wẹ Johanu Baptizitọ yin. (Luku 1:76) E yin jiji to ojlẹ kleun de jẹnukọnna vivọnu owhe kanweko tintan J.W.M. tọn, podọ e nọgbẹ̀ jẹ owhe kanweko tintan W.M. tọn. Jiwheyẹwe deazọ́nna ẹn nado jla aliho do na Mẹsia lọ kavi Klisti. Johanu wà ehe bo do owẹ̀n Jiwheyẹwhe tọn Juvi hatọ etọn lẹ, na yé nido lẹkọ do Jiwheyẹwhe dè.—Malku 1:1-4; Luku 1:13, 16, 17.
Owẹ̀n Johanu tọn na gọalọna mẹhe tindo ahun dagbe bo to todo e lẹ nado yọnẹn dọ Jesu Nazalẹti tọn wẹ Mẹsia dopagbe lọ. (Matiu 11:10) Johanu na tuli mẹhe to todo e lẹ nado lẹnvọjọ sọn ylando yetọn lẹ mẹ, podọ nado yí baptẹm taidi ohia lẹnvọjọ yetọn tọn. (Luku 3:3-6) Na Johanu yí baptẹm na mẹsusu wutu, e yin yiylọdọ Johanu Baptizitọ lọ kavi Johanu Baptizi. Baptẹm titengbe hugan he Johanu bayi wẹ dehe e bayi na Jesu. a—Malku 1:9.
To hosọ ehe mẹ
Etẹwẹ zọ́n bọ Johanu Baptizitọ lọ do yin omẹ vonọtaun?
Azọ́n he e na wà yin didọ jẹnukọn: Yẹwheho he Johanu dọ zọ́n bọ e hẹn dọdai he gando wẹnsagun Jehovah tọn go lọ di. (Malaki 3:1; Matiu 3:1-3) Gbẹzan etọn dohia dọ ewọ wẹ yin mẹlọ he “wleawu mẹhe jẹ lẹ tọn dai na Jehovah,”—enẹ wẹ yindọ e jla aliho do na Juvi hatọ etọn lẹ na yé nido kẹalọyi owẹ̀n Jesu Klisti he yin afọzedaitọ tangan Jehovah tọn.—Luku 1:17.
Ale he e na mọ: Jesu dọ dọ omẹ “depope ma ko sọawuhia he klohu Johanu Baptizitọ, ṣigba mẹhe whè hú to Ahọluduta olọn tọn mẹ klohu ewọ.” (Matiu 11:11) Gbọnvona dọ Johanu yin yẹwhegán de, e sọ yin “wẹnsagun,” he dọdai etọn yin didọ lọ, enẹwutu devizọnwatọ Jiwheyẹwhe tọn he nọgbẹ̀ jẹnukọnna ẹn de ma klo hugan ẹn. Hodidọ Jesu tọn lẹ sọ dohia dọ Johanu ma na tin to Ahọluduta olọn tọn mẹ. b Yẹwhegán nugbonọ ehe kú whẹpo Klisti do hùn ali gbẹninọ to olọn mẹ tọn dote. (Heblu lẹ 10:19, 20) Amọ́, Johanu na yin dopo to mẹhe ji Ahọluduta Jiwheyẹwhe tọn na dugán do to aigba ji lẹ mẹ, bo na tindo todido lọ nado nọgbẹ̀ kakadoi to Paladisi mẹ.—Salmu lẹ 37:29; Luku 23:43.
Mẹnu lẹ wẹ mẹjitọ Johanu Baptizitọ lọ tọn?
Mẹjitọ Johanu tọn lẹ yin asu po asi po de he nọ yin Zekalia po Elizabẹti po. Yẹwhenọ Juvi de wẹ Zekalia yin. Azọ́njiawu gblamẹ wẹ Johanu yin jiji te, na wẹnsinọ de wẹ onọ̀ etọn bo ma sọgan jivi. Podọ, owhe ewọ po Zekalia po tọn “ko sẹyì taun.”—Luku 1:5-7, 13.
Mẹnu wẹ zọ́n bọ Johanu Baptizitọ do yin hùhù?
Ahọlu Hẹlọdi Antipa wẹ nagbè dọ yè ni gbòtana Johanu. Asi etọn Hẹlọdia wẹ sisẹ́ ẹ nado wà ehe. Yọnnu lọ gbẹwanna Johanu na e dọna Hẹlọdi he nọ mọ ede di Ju de, dọ alọwle etọn po e po ma sọgbe hẹ osẹ́n Ju lẹ tọn.—Matiu 14:1-12; Malku 6:16-19.
Be Johanu Baptizitọ lọ po Jesu po whlẹnagbà hẹ yede wẹ ya?
Linlẹn lọ dọ yé whlẹnagbà hẹ yede ma sọawuhia to fide to Biblu mẹ. (Johanu 3:25-30) Na nugbo tọn, Johanu yọnẹn ganji dọ azọngban emitọn wẹ nado jla ali do na Mẹsia lọ, e ma yin nado whlẹnagbà hẹ ẹ. Johanu dọmọ: “Yẹn yí osin do to omẹ lẹ baptizi . . . na ewọ nido sọgan yin hinhẹn sọawuhia Islaeli.” Enẹgodo, e yidogọ dọmọ: “Omẹ ehe lọ wẹ Visunnu Jiwheyẹwhe tọn.” (Johanu 1:26-34) Enẹwutu, homẹ Johanu tọn hùn taun whenue e sè dọ Jesu to kọdetọn dagbe do to lizọnyizọn etọn mẹ.
a Jesu “ma waylando depope.” (1 Pita 2:21, 22) Enẹwutu e yin bibaptizi, e ma yin na e dona lẹnvọjọ wutu gba, ṣigba na e ze ede jo nado wà ojlo Jiwheyẹwhe tọn. Enẹ wẹ zọ́n bọ Jesu do ze ogbẹ̀ etọn jo do otà mítọn mẹ.—Heblu lẹ 10:7-10.
b Pọ́n hosọ lọ “Qui va au ciel?”
A Gán Sọ Pọ́n Hosọ Ehelẹ
JESU—ALIHO LỌ, NUGBO LỌ PO OGBẸ̀ PO
Johanu Baptizitọ lọ Jla Aliho lọ Do
To whenue Falesi po Sadusi delẹ po wá Johanu dè, e gblewhẹdo yé. Etẹwutu?
NUHE BIBLU PLỌN MÍ
Tẹ́n Tito Biblu Pinplọn Tọn Mítọn Pọ́n
A gán plọnnu vọnu hẹ mẹplọntọ de nukun sọ nukun nado mọ ayinamẹ sinai do Biblu ji lẹ yí.