Jesu Nọ Whlẹnmẹ—Gbọnna?

MÌ HÒ (video kavi hoyidokanji lọ)

Gblọndo Biblu tọn

Jesu whlẹn gbẹtọvi nugbonọ lẹ to whenue e ze ogbẹ̀ etọn jo taidi avọ́sinsan ofligọ tọn de. (Matiu 20:28) Enẹwutu, Biblu ylọ Jesu dọ “Mẹwhlẹngántọ aihọn tọn.” (1 Johanu 4:14) Biblu sọ dọmọ: “Whlẹngán ma tin to mẹdevo de mẹ, na oyín devo de ma to olọn glọ he ko yin nina gbẹtọ gbọn ehe dali mí sọgan yin whinwhlẹngán.”—Owalọ lẹ 4:12.

Jesu “dọ́ okú pọ́n do gbẹtọ” he tindo yise to ewọ mẹ lẹpo tamẹ. (Heblu lẹ 2:9; Johanu 3:16) Enẹgodo, “Jiwheyẹwhe fọ́n ẹn sọn oṣiọ lẹ mẹ,” bọ e lẹkọyi olọn mẹ taidi nudida gbigbọnọ de. (Owalọ lẹ 3:15) To finẹ, Jesu penugo “nado whlẹn mẹhe to dindọnsẹpọ Jiwheyẹwhe gbọn ewọ gblamẹ lẹ gán mlẹnmlẹn, na ewọ tin to ogbẹ̀ to whepoponu nado vẹvẹ do ota yetọn mẹ wutu.”—Heblu lẹ 7:25.

Naegbọn e do biọ dọ Jesu ni vẹvẹ do ota mítọn mẹ?

Mímẹpo wẹ yin ylandonọ. (Lomunu lẹ 3:23) Ylando taidi dogbó de to míwlẹ po Jiwheyẹwhe po ṣẹnṣẹn bosọ nọ dekọtọn do okú mẹ. (Lomunu lẹ 6:23) Ṣigba, Jesu nọ yinuwa di “whẹ̀yidọtọ de” na mẹhe tindo yise to avọ́sinsan ofligọ tọn etọn mẹ lẹ. (1 Johanu 2:1, nudọnamẹ odò tọn) E nọ vẹvẹ do ota yetọn mẹ bo nọ biọ to Jiwheyẹwhe si nado dotoaina odẹ̀ yetọn lẹ bo jo ylando yetọn lẹ na yé to dodonu okú avọ́sinsan tọn Jesu tọn ji. (Matiu 1:21; Lomunu lẹ 8:34) Jiwheyẹwhe nọ siọ ovẹ̀ Jesu tọn enẹlẹ na yé tin to kọndopọ mẹ hẹ ojlo Etọn wutu. Jiwheyẹwhe wẹ do Jesu hlan aigba ji “na aihọn nido yin whinwhlẹngán gbọn ewọ gblamẹ.”—Johanu 3:17.

Be yise tintindo to Jesu mẹ poun ko pé nado yin whinwhlẹngán ya?

Lala. Nugbo wẹ dọ mí dona yise to Jesu mẹ nado mọ whlẹngán, amọ́ enẹ kẹdẹ ma ko pé. (Owalọ lẹ 16:30, 31) Biblu dọ dọ: “Dile agbasa matin gbigbọ yin oṣiọ do, mọkẹdẹ wẹ yise matin azọ́n lẹ yin oṣiọ do ga.” (Jakọbu 2:26) Nado mọ whlẹngán yí, mí dona:

Plọnnu gando Jesu po Otọ́ etọn, Jehovah po go.—Johanu 17:3.
Tindo yise to yé omẹ awe lẹ mẹ.—Johanu 12:44; 14:1.
Do yise mítọn hia gbọn tonusisena gbedide yetọn lẹ dali. (Luku 6:46; 1 Johanu 2:17) Jesu plọnmẹ dọ e ma yin mẹdepope he ylọ ẹ dọ “Oklunọ” wẹ na yin whinwhlẹngán, adavo mẹhe “to ojlo Otọ́ [etọn] he tin to olọn mẹ tọn wà kẹdẹ.”—Matiu 7:21.
Zindonukọn nado to yise mítọn dohia mahopọnna nuhahun lẹ. Jesu hẹn enẹ họnwun to whenue e dọmọ: “Mẹhe doakọnna kakajẹ opodo wẹ na yin whinwhlẹngán.”—Matiu 24:13.