•  Naegbọn a dona nọ basi tito lehe a na zan whenu towe do tọn?

•  Nuhe a gán wà

•  Nuhe ogbẹ́ towe lẹ nọ dọ

•   Whenu taidi akuẹ. Eyin a hẹn ẹn gú, a ma na mọ ẹn zan to whenue a do hudo etọn. To alọ devo mẹ, eyin a nọ basi tito na whenu towe, a na mọ whenu dogọ nado wà nuhe nọ hẹn we jaya lẹ!

   Nunọwhinnusẹ́n Biblu tọn: “Adidọnọ nọ jlonu, ṣogan e ma tindo nude, ṣigba, mẹhe nọ dovivẹnu na yin pekọhẹnwana to gigọ́ mẹ.”—Howhinwhẹn lẹ 13:4.

   Nuagokun lọ die: Tito bibasi na whenu towe na yidogọna mẹdekannujẹ towe, e ma na de e pò.

•   Pinplọn nado nọ basi tito gando whenu towe go yin nugopipe de he na yọ́n-na-yizan na we to whenue a whẹ́n. E tlẹ gán zọ́n bọ a na penugo nado hẹn agbasazọ́n de go. Lẹnnupọndo ehe ji, eyin azọ́nmẹyimẹdotọ de wẹ a yin, be a na yí azọ́nwatọ he nọ saba gbọwhenu de do azọ́n mẹ wẹ ya?

   Nunọwhinnusẹ́n Biblu tọn: “Mẹhe yin nugbonọ to onú pẹvi pete mẹ yin nugbonọ to nususu mẹ ga.”—Luku 16:10.

   Nuagokun lọ die: Nugopipe lọ nado nọ basi tito gando whenu towe yiyizan go nọ do mẹhe nkọ a yin hia.

 Amọ́, nado dọ hójọhó, tito bibasi na whenu mẹtọn yiyizan ma nọ bọawu. Lẹnnupọndo aliglọnnamẹnu he bọdego lẹ ji.

 Aliglọnnamẹnu #1: Họntọn Lẹ

 “Eyin họntọn lẹ biọ dọ ma yì fide hẹ yé, n’nọ saba yigbe eyin n’ma tlẹ tindo whenu nado wàmọ. N’nọ lẹndọ, ‘N’gán yawu wazọ́n he n’jodo lẹ eyin n’lẹkọwa whégbè.’ Amọ́, nulẹ ma nọ saba yì domọ, podọ ninọmẹ lọ nọ wá vantan to godo mẹ.”—Cynthia.

 Aliglọnnamẹnu #2: Ayidedai Lẹ

 “Televiziọn nọ taidi maṣinu he nọ gbọ́n ogbó. E nọ gbọ́n whenu mẹtọn gbọn video po sinima etọn lẹ po gblamẹ, yèdọ nudelẹ he ji e nọ vẹawu nado dute.”—Ivy.

 “Tablẹti yiyizan nọ hẹn whenu gú na mi. Eyin huhlọn bateli etọn tọn vọ̀ wẹ n’nọ wá doalọte bọ n’nọ jẹ whẹ̀do dee ji dọ n’ko hẹn whenu ṣie gú.”—Marie.

 Aliglọnnamẹnu #3: Gbàndindọn

 “N’nọ dọngbàn bo ma nọ yawu wà azọ́ndenamẹ wehọmẹ tọn lẹ po nudevo depope he n’dona wà lẹ po do mẹwhenu. N’nọ hẹn whenu gú to numadinu lẹ kọ̀n bo nọ dọngbàn kakajẹ ogàn godo tọn he mẹ n’dona hẹn azọ́ndenamẹ ṣie di te—e ma ka sọgbe domọ.”—Beth.

1.   Basi todohukanji azọ́n he a dona wà lẹ tọn. Di apajlẹ, a gán yí whégbè-zọ́n po azọ́ndenamẹ wehọmẹ tọn lẹ po dogọ. Basi kandai ojlẹ he a na yizan nado wà azọ́n dopodopo dotana to osẹ dopo mẹ tọn.

    Nunọwhinnusẹ́n Biblu tọn: “Mọdona nuhe yin nujọnu hugan lẹ.”—Filipinu lẹ 1:10.

2.   Basi todohukanji nuhe a nọ jlo na wà to whenue a vò lẹ tọn. Ehe sọgan bẹ nudelẹ hẹn taidi nọtẹn gbẹdido tọn Intẹnẹt ji tọn lẹ yiyizan po televiziọn pinpọn po. Sọ basi kandai gànhiho nẹmu he a na yizan na dopodopo onú enẹlẹ tọn to osẹ dopo mẹ tọn.

    Nunọwhinnusẹ́n Biblu tọn: “Mì nọ yí nuyọnẹn do to zọnlinzin . . . , bo nọ yí whenu mìtọn zan to aliho dagbe hugan mẹ.”—Kolosinu lẹ 4:5.

3.   Basi tito-to-whinnu de. Vọ́ todohukanji awe he a basi lọ lẹ pọ́n. Be gànmẹ he pé wẹ a de na azọ́n titengbe lẹ ya? Be a dona de whenu ayidedai lẹ tọn pò wẹ ya?

    Ayinamẹ: Basi tito nuhe a na wà to gbèdopo lẹ tọn bo nọ dohiagona azọ́n dopodopo to whenue a fó e.

    Nunọwhinnusẹ́n Biblu tọn: “Tito mẹhe nọ dovivẹnu tọn lẹ nọ tindo kọdetọn dagbe dandan.”—Howhinwhẹn lẹ 21:5.

4.   Vọ́ tito towe lẹ gbeje pọ́n. Nado dọ hójọhó, e gán biọ dọ a ni plọn bẹsọn din nado nọ gbẹ́ oylọ-basinamẹ hagbẹ lẹ tọn dai nado wà nujọnu hugan lẹ. Amọ́ to godo mẹ, a na mọdọ whenu susu na tin na we bọ a na duvivi etọn ganji.

    Nunọwhinnusẹ́n Biblu tọn: “Mì nọ yin vivẹnudotọ, mì nọ dọngbàn to azọ́n mìtọn kọ̀n blo.”—Lomunu lẹ 12:11, nudọnamẹ odò tọn.

5.   Ma nọ nọ̀ whlẹndo ji nado duvivi whenu he pò lọ tọn blo. “To whedelẹnu, n’nọ wà onú awe de dotana to tito ṣie lẹ mẹ,” wẹ jọja yọnnu de he nọ yin Tara dọ, “podọ to enẹgodo n’nọ dọna dee dọ, ‘Din, n’gán yì pọ́n tele na nukunwhiwhe 15 bo lẹkọwa azọ́n kọ̀n.’ Amọ́, nukunwhiwhe 15 lọ nọ lẹzun 30, bọ nukunwhiwhe 30 nọ wá lẹzun gànhiho dopo, podọ whẹpo n’nado yọnẹn n’ko nọ hẹn gànhiho awe gú to tele pinpọn kọ̀n!”

    Etẹwẹ na gọalọna we? Nọ pọ́n ayidedai hlan taidi ale he a na mọyi eyin a ko hẹn azọ́ndenamẹ towe lẹ di godo—e ma yin taidi dandannu de na azán dopodopo.

    Nunọwhinnusẹ́n Biblu tọn: “Nude ma yọ́n na gbẹtọ hú nado . . . mọ awuvivi to azọ́n sinsinyẹn etọn mẹ.”—Yẹwhehodọtọ 2:24.