To aihọn lọ mẹ to egbehe, nugbodidọ sọgan taidi nuhe ma doale. Mẹdelẹ tlẹ sọgan nọ na whẹjijọ dọmọ:

•   ‘Eyin n’ma nọ dolalo na mẹjitọ ṣie lẹ, yé gán nọ dosẹ́n nudelẹ tọn na mi.’

•   ‘Eyin n’ma finwepọ́n, n’ma gán dín na tẹnpọn ehe.’

•   ‘Eyin n’ma tẹnpọn bo fìn onú ehe din, akuẹ ján n’na wá jọ whẹpo do họ̀ ẹ.’

 Mẹdelẹ sọgan kanse dọ: ‘Bọ etẹwẹ ko ylan to enẹ mẹ? Be e ma yin mẹlẹpo wẹ nọ dolalo to egbé din ya?’

 Lala wẹ gblọndo kanbiọ enẹ tọn. Mẹsusu, etlẹ yin jọja susu, wẹ yise dọ nugbodidọ doale, podọ yé tindo whẹwhinwhẹ́n dagbe nado yí enẹ sè. Biblu dọ dọ, “Nudepope he gbẹtọ to didó, ehe wẹ e na gbẹ̀n ga.” (Galatianu lẹ 6:7) To hogbe devo mẹ, nuhe mí nọ wà lẹpo wẹ nọ hẹn kọdetọn de wá, e sọgan yin dagbe kavi ylankan.

 Di apajlẹ, lẹnnupọndo kọdetọn ylankan he lalodido ko hẹnwa na mẹdelẹ ji.

  “N’dolalo na onọ̀ ṣie gando dẹpẹ de he n’nọ dọho hẹ go. Onọ̀ ṣie ko wle hoho dọ n’ma to nugbo dọ na emi. Whla atọ̀ntọ he n’dolalo na Mama gando whẹho lọ go, e gblehomẹ taun. Nado domẹplọnlọ go e, e dosẹ́n nudelẹ tọn na mi na osẹ awe bọ n’ma tlẹ gán zan alokan ṣie kavi pọ́n televiziọn na osun dopo. Bẹsọn whenẹnu n’masọ dolalo na mẹjitọ ṣie lẹ pọ́n!”​—Anita.

 Lẹnnupọndo ehe ji: Naegbọn e sọgan biọ whenu vude whẹpo onọ̀ Anita tọn nido vọ́ jidedo ewọ go?

 Biblu dọmọ: “Todin he mì ko klọ́n lalodido dai, dopodopo mìtọn ni nọ dọ nugbo hẹ kọmẹnu etọn.”​—Efesunu lẹ 4:25.

  “N’dolalo na mẹjitọ ṣie lẹ bo lẹndọ n’ko blẹ yé dù wẹ sin, kakajẹ whedevonu he yé biọ to asi e nado vọ́ nue n’dọ wayi lọ dọ. Lalo he n’do lọ klo sọmọ bọ n’ma tlẹ penugo nado flin nue n’dọ wayi lẹpo. Eyin yè yawu dọ nugbo jẹnukọn, yè ma nọ wá biọ nuhahun enẹ nkọ mẹ!”​—Anthony.

 Lẹnnupọndo ehe ji: Etẹwẹ sọgan ko gọalọna Anthony nado dapana ninọmẹ sinsinyẹn ehe?

 Biblu dọmọ: “Osùnú de to OKLUNỌ nukun mẹ wẹ nùflo lalo tọn: ṣigba yé he to dagbewà lẹ wẹ homẹhun etọn.”​—Howhinwhẹn lẹ 12:22.

  “N’do họntọn yọnnu de he nọ dósin ohó ji. E nọ jlẹhó sọmọ bọ hodidọ etọn lẹ nọ wá zẹ̀pá. N’yiwanna ẹn podọ n’nọ tẹnpọn ma nado tindo ayihaawe gando nuhe e nọ dọ lẹpo go. Amọ́, e nọ vẹawu taun nado yí nuhe e dọ lẹ sè kavi nado dejido ewọ go.”​—Yvonne.

 Lẹnnupọndo ehe ji: Nawẹ hójijlẹ po lalo “flinflin” lẹ po sọgan zọ́n bọ họntọn Yvonne tọn na jẹyín ylankan gbọn?

 Biblu dọmọ: “Mí jlo nado nọ yinuwa po ahundopo po to onú lẹpo mẹ.”​—Heblu lẹ 13:18.

 Todin, lẹnnupọndo kọdetọn dagbe delẹ he nugbodidọ sọgan hẹnwa na we ji.

  “Nawe de to zọnlinzin to nukọn ṣie bọ akuẹ flẹ do e. N’dawhá ylọ ẹ bo gọ̀ akuẹ lọ jo na ẹn. E vivi na ẹn sọmọ bọ e to nudọdo mi mapote. E dọmọ: ‘E na ṣẹ na we taun. Mẹhe na yin nugbonọ kaka bo na wà nue a wà todin lẹ ma sù.’ Homẹ nọ hùnmẹ taun eyin mẹdevo lẹ doayi dagbe he wà yè te go!”​—Vivian.

 Lẹnnupọndo ehe ji: Naegbọn nugbodidọ Vivian tọn sọgan ko paṣa nawe lọ? Nawẹ nugbodidọ hẹn ale wá na Vivian gbọn?

 Biblu dọmọ: “[Ayajẹnọ] wẹ mẹhe . . . wà dodo to ojlẹ lẹpo mẹ.”​—Psalm 106:3.

  “Whẹndo mítọn blebu wẹ nọ wazọ́n taidi họmẹjladotọ na azọ́nwhé lẹ, bọ to whedelẹnu eyin mí to nusẹdo to azọ́nwatẹn de, mí nọ mọ ṣẹ́ngi delẹ to aigba. Eyin e jọ domọ, mí nọ gọ̀ akuẹ lọ do tafo he sin apá mí mọ ẹn te ji. Azọ́nwatọ dopo to finẹ bọ homẹ etọn ma nọ hùn sọmọ na obá he mẹ mí nọ dọ nugbo jẹ. E nọ dọmọ: ‘Akuẹ enẹ ma ka sọtẹ́n nẹ!’ Amọ́, be mì yọ́n ale he mí mọyi a? E yọ́n mí di mẹhe go yè sọgan nọ dejido.”​—Julia.

 Lẹnnupọndo ehe ji: Nawẹ nugbodidọ Julia tọn sọgan hẹn ale wá na ẹn gbọn eyin e wá to azọ́n dín to fidevo bọ e biọ dọ yè ni kanhose azọ́nwhé he e wazọ́n na wayi gando jẹhẹnu etọn lẹ go?

 Biblu dọmọ: “Nọ wà nuhe go a pé lẹpo nado do dewe hia di mẹhe Jiwheyẹwhe kẹalọyi, yèdọ azọ́nwatọ de he ma nọ kuwinyan nudepope tọn.”​—2 Timoti 2:15.

  “N’wazọ́n na gànhiho 64, bọ yè ka sú akuẹ azọ́n gànhiho 80 tọn na mi. E sọgan ko yọ́n dọ n’ma hẹn nú ṣie go poun, amọ́ n’ma gán wàmọ poun bọ hó fó. N’do e hia mẹhe nọ suahọ mí, podọ homẹ etọn hùn do go e taun. Azọ́nwhé lọ nọ mọ akuẹ taun, amọ́ e ma yin enẹwutu wẹ n’nado hẹn akuẹ lọ go bo na wá tindo numọtolanmẹ taidi dọ ajo wẹ n’jẹ nkọ.”​—Bethany.

 Lẹnnupọndo ehe ji: Be ajojijẹ do azọ́nwhé de ma ylan sọ ajojijẹ do gbẹtọ tata de wẹ ya?

 Biblu dọmọ: “Osùnú de wẹ tasinyẹntọ yin hlan OKLUNỌ: ṣigba aṣli etọn tin [to] dodonọ lẹ dè.”​—Howhinwhẹn lẹ 3:32.