Nunina delẹ nọ họakuẹ na mí, na mẹhe to otẹn aṣẹpipa tọn mẹ kavi mẹhe mí nọ na sisi taun de wẹ na mí wutu. Ṣigba, nunina devo he ma tlẹ vẹahi sọmọ delẹ nọ yin bowlena, na yé wá sọn hagbẹ whẹndo tọn vivẹ́ kavi họntọn dejidego de dè. Lehe e yì do na nunina he Russell na Jordan he yin nùdego to hosọ he wayi mẹ niyẹn. Nawẹ ehe gando nunina ofligọ tọn lọ go gbọn?

Tintan, Biblu dọ dọ “Jiwheyẹwhe do Visunnu detọ́n dopo akàn etọn hlan aihọn mẹ, na mí nido sọgan mọ ogbẹ̀ gbọn ewọ gblamẹ.” (1 Johanu 4:9) Nuhe zọ́n bọ nunina ehe do họakuẹ taun niyẹn. Mẹde ma tindo aṣẹpipa hú Jiwheyẹwhe. Salmu-kantọ Heblu de dọ gando ewọ go dọmọ: “Hiẹ, mẹhe oyín towe nọ yin Jehovah, hiẹ dopo kẹdẹ wẹ yin Gigogán to aigba lẹpo ji.” (Salmu lẹ 83:18) Asisa he yiaga humọ de ma tin he mẹ mí sọgan mọ nunina de yí sọn.

Awetọ, Jiwheyẹwhe wẹ “Otọ́ mítọn.” (Isaia 63:16) Gbọnna? Ewọ na mí ogbẹ̀. Humọ, e nọ yí nugbonọ-yinyin do penukundo mí go dile otọ́ mẹtọnhopọntọ de nọ wà na ovi etọn lẹ do. To whenue Jiwheyẹwhe to hodọ gando omẹ etọn hohowhenu tọn Eflaimi tọn lẹ go, e kanse dọmọ: “Be e ma yin visunnu vivẹ́, yèdọ ovi yiwanna de wẹ Eflaimi yin na mi ya? . . . Onú etọn . . . biọlanmẹna mi sinsinyẹn. E sọ họnwun dọ yẹn na wàlẹblanuna ẹn.” (Jelemia 31:20) Numọtolanmẹ dopolọ wẹ  Jiwheyẹwhe gbẹ́ nọ tindo gando sinsẹ̀n-basitọ etọn lẹ go. Ewọ ma yin Didatọ ganhunupotọ mítọn kẹdẹ gba, amọ́ e sọ yin Otọ́ po Họntọn nugbonọ de po. Eyin mọwẹ, be nunina he mí nọ mọyi sọn e dè lẹ ma dona nọ họakuẹ na mí taun ya?

Nunina delẹ nọ họakuẹ, na yé yin nina po owanyi nugbo po, e ma yin gánnugánnu. Mẹde he nanúmẹ matin ṣejannabi ma nọ donukun ahọsumẹ.

Jiwheyẹwhe ze Visunnu etọn jo do ota mítọn mẹ, na e yiwanna mí. “Gbọn ehe dali wẹ owanyi Jiwheyẹwhe tọn ko yin didehia to whẹho mítọn mẹ, dọ Jiwheyẹwhe do Visunnu detọ́n dopo akàn etọn hlan,” wẹ Biblu dọ. Etẹwutu? “Na mí nido sọgan mọ ogbẹ̀ gbọn ewọ gblamẹ.” (1 Johanu 4:9) Be dandan wẹ dọ Jiwheyẹwhe ni wàmọ ya? Paali! “Ofligọ he Klisti Jesu suahọ etọn” lọ yin dohia “nukundagbe majẹhẹ” Jiwheyẹwhe tọn.—Lomunu lẹ 3:24.

Naegbọn nunina lọ do yin nuyiwa “nukundagbe majẹhẹ” tọn? Biblu dọmọ: “Jiwheyẹwhe do owanyi ede tọn hia mí to enẹ mẹ dọ, dile mí gbẹ́ to ylandonọ yin, Klisti kú na mí.” (Lomunu lẹ 5:8) Owanyi matin ṣejannabi wẹ whàn Jiwheyẹwhe nado yinuwado gbẹtọvi madogánnọ, agbátọnọ podọ ylandonọ lẹ tamẹ. Mí ma jẹna owanyi enẹ, podọ mí ma sọgan suahọ etọn gbede. Nunina lọ yin dohia owanyi tọn he klohugan to whenuho mẹ.

Nunina delẹ nọ họakuẹ, na yé nọ biọ avọ́sinsan susu to nunamẹtọ lọ si wutu. To whenue mẹde desọn ojlo mẹ bo na nuhọakuẹ etọn de mí, mí nọ wlebòna ẹn taun, na avọ́sinsan he e biọ wutu.

Jiwheyẹwhe “namẹ Visunnu detọ́n dopo akàn etọn.” (Johanu 3:16) Mẹdevo de ma vẹ́ na ẹn humọ he e sọgan na mí. To owhe susu lẹ die he Jiwheyẹwhe to wẹkẹ lọ dá, Jesu wazọ́n dopọ hẹ ẹ bo lẹzun ‘mẹhe go homẹ etọn nọ hùn do.’ (Howhinwhẹn lẹ 8:30) Jesu yin “Visunnu yiwanna” Jiwheyẹwhe tọn podọ “apajlẹ Jiwheyẹwhe mayinukundomọ lọ tọn.” (Kolosinu lẹ 1:13-15) Haṣinṣan pẹkipẹki mọnkọ ma ko tin to nudida awe ṣẹnṣẹn pọ́n.

Etomọṣo, Jiwheyẹwhe “ma tlẹ whlá Visunnu etọn titi.” (Lomunu lẹ 8:32) Jehovah na mí onú vivẹ́ hugan etọn. Nunina de ma ko họakuẹ na ẹn sọmọ pọ́n.

Nunina delẹ nọ họakuẹ, na yé sú odò nuhudo tangan kavi niyaniya tọn de. Di apajlẹ, be a ma na yọ́n pinpẹn etọn taun eyin mẹde desọn ojlo mẹ bo họ̀ amasin de he a ma penugo nado họ̀ nado whlẹn ogbẹ̀ towe ya? E họnwun dọ nunina enẹ na họakuẹ na we taun!

“Kẹdẹdile mẹlẹpo to kúkú to Adam mẹ, mọdopolọ wẹ mẹlẹpo na yin hinhẹnwa ogbẹ̀ to Klisti mẹ do ga.” (1 Kọlintinu lẹ 15:22) Taidi kúnkan Adam tọn, mímẹpo wẹ to “kúkú” bo ma penugo nado họ̀ngán sọn azọ̀n po okú po si kavi gbọwhẹ hẹ Jiwheyẹwhe na míde bo ma nasọ yin whẹhutọ to nukọn etọn. Podọ taidi gbẹtọvi tata lẹ, mí ma sọgan hẹn míde kavi mẹdevo do “ogbẹ̀.” Biblu dọmọ: “Depope to yé mẹ ma sọgan fli nọvisunnu etọn gọ̀ gbede kavi na ofligọ de Jiwheyẹwhe do ota etọn mẹ . . . E nọ zẹ̀ nugopipe yetọn go.” (Salmu lẹ 49:7, 8) Mí tindo nuhudo alọgọ tọn sinsinyẹn, na mí ma sọgan suahọ ofligọ lọ tọn wutu. Míwlẹ kẹdẹ ma pé nude go.

Gbọn owanyi daho etọn dali, Jehovah desọn ojlo mẹ bo suahọ de nado whlẹn ogbẹ̀ mítọn, bọ “mẹlẹpo na yin hinhẹnwa ogbẹ̀” gbọn Jesu gblamẹ. Nawẹ ofligọ lọ wà ehe dotana gbọn? “Ohùn Jesu  Visunnu etọn tọn nọ klọ́ mí wé sọn ylando lẹpo mẹ.” Yise to ohùn Jesu tọn mẹ nọ hùn dotẹnmẹ dote nado mọ jona ylando tọn bo mọ ogbẹ̀ madopodo. (1 Johanu 1:7; 5:13) Podọ etẹwẹ ofligọ lọ na wà na mẹvivẹ mítọn he kú lẹ? “To whenuena e yindọ mẹdopo gblamẹ wẹ okú gbọn wá, mẹdopo [Jesu] gblamẹ wẹ fọnsọnku oṣiọ lẹ tọn lọsu gbọn wá ga.”—1 Kọlintinu lẹ 15:21. *

Nunina de ma ko yin ninamẹ sọn asisa daho hugan de mẹ kavi po owanyi daho po pọ́n bo klohu avọ́sinsan Jesu tọn. Mẹde ma ko na nude mí pọ́n he klohu nuhe Jehovah Jiwheyẹwhe na mí. Podọ nunina de ma ko sú odò nuhudo daho de tọn na mí pọ́n hú avọ́sinsan he tún mí dote sọn ylando po okú po si. Na nugbo tọn, nunina depope ma sọgan họakuẹ sọ̀ ofligọ jiawu enẹ.