“Ohún lọ gán yì, amọ́ dẹpẹ he wá sọn Chine lọ ni nọte!” Alexandra sè hodidọ enẹ to whenue e to ahihun mẹ to dènu bo jlo na dasá sọn otò Amérique du sud tọn de mẹ biọ devo mẹ. E jẹte nado pọ́n nue to jijọ, bo mọ dẹpẹ Chine-nù de he to tintẹnpọn nado dọ nuhahun etọn na ponọ dènu tọn de to Espagne-gbè mẹ. Na Alexandra ko nọ agun Chine-gbè tọn Kunnudetọ Jehovah tọn lẹ tọn de mẹ pọ́n wutu, e desọn ojlo mẹ nado segbè na dẹpẹ lọ.

Dawe lọ dọ dọ emi do wema sọgbe hẹ osẹ́n nado nọ otò lọ mẹ, amọ́ yè fìn wema lọ lẹ po akuẹ po do emi. To tintan whenu, ponọ lọ ma jlo na yí nuhe dọ e te sè bo tlẹ vẹnudo Alexandra dọ e doalọ to gbẹtọ finfin sà mẹ. To godo mẹ, e wá kẹalọyi nue dẹpẹ lọ dọ, amọ́ mẹhe ma do wema lẹ dona sú akuẹ de whẹpo do wayi. Na dẹpẹ lọ ma do akuẹ de wutu, Alexandra yàn dọla 20 na ẹn. Homẹ dawe lọ tọn hùn sọmọ bọ e dọ emi na sú hugan dọla 20. Alexandra dọ dọ emi ma to ahọsumẹ dín; homẹ emitọn hùn nado gọalọ, na emi mọdọ nue sọgbe lọ niyẹn. E yí owe sinai do Biblu ji delẹ na dẹpẹ lọ bo na ẹn tuli nado plọn Biblu hẹ Kunnudetọ lẹ.

Tulinamẹnu wẹ e yin nado sèhó gando alọtútlú hlan jonọ lẹ go, podọ matin ayihaawe, mẹhe nọ yì ṣọṣi po mẹhe ma nọ yì lẹ po wẹ nọ yinuwa domọ. Be e na jlo we nado nanúmẹ matin ṣejannabi domọ ya? Kanbiọ enẹ jẹna ayidego, na Jesu dọmọ: “Ayajẹ sù to nunamẹ mẹ hú to mimọyi mẹ.” (Owalọ lẹ 20:35) Dodinnanu lẹnunnuyọnẹntọ lẹ tọn sọ dohia dọ nunamẹ nọ wà dagbe na nunamẹtọ lọ. Mì gbọ mí ni pọ́n aliho he mẹ e nọ yinmọ te lẹ.

Numimọ lẹ dohia dọ kanṣiṣa tin to nunamẹ po ayajẹ po mẹ. Apọsteli Paulu wlan dọ “Jiwheyẹwhe nọ yiwanna nunamẹtọ homẹhunnọ.” Klistiani he nọ basi nunina sọn ojlo mẹ nado hẹn kọgbọ wá na yisenọ hatọ lẹ hodọ wẹ e te. (2 Kọlintinu lẹ 8:4; 9:7) Paulu ma to didọ dọ yé nanúmẹ, na yé tindo ayajẹ wutu wẹ gba. Ṣigba, yé tindo ayajẹ, na yé nanúmẹ wutu.

Na nugbo tọn, sọgbe hẹ dodinnanu de, nunamẹ “nọ yinuwado adà apọ̀n mítọn tọn de ji, he tindo kanṣiṣa hẹ ayajẹ, nuwadopọ hẹ mẹdevo lẹ gọna jidide, bo nọ hẹnmẹ tindo numọtolanmẹ pekọ tọn.” Dodinnanu devo dohia dọ “akuẹ nina mẹdevo nọ hẹnmẹ tindo ayajẹ hú akuẹ lọ zinzan do mẹdetiti tamẹ.”

Be a ko lẹn pọ́n gbede dọ na ninọmẹ towe wutu, a ma sọgan wà nususu ya? Nugbo lọ wẹ yindọ mẹlẹpo wẹ gán yin “nunamẹtọ homẹhunnọ.” E ma yin dandan dọ akuẹ lọ ni sù whẹpo do yin ninamẹ po mẹwhinwhàn he sọgbe po. Kunnudetọ Jehovah tọn de do wekanhlanmẹ ehe hlan zinjẹgbonutọ  linlinnamẹwe ehe tọn lẹ po nunina de po dọmọ: “Na owhe ehe lẹpo, n’ma penugo nado na akuẹ jọ akuẹ de to Plitẹnhọ Ahọluduta tọn mẹ.” Ṣigba, e yidogọ dọmọ: “Jehovah Jiwheyẹwhe ko na mi hugan nunina he n’basi lẹ. . . . Mì wanu dọ mì hẹn ẹn yọnbasi na mi nado basi nunina ehe—e nọ miọnhomẹna mi.”

Na nugbo tọn, nunamẹ ma nọte do akuẹ kẹdẹ ji. Nususu devo lẹ tin he yè gán namẹ.

Biblu dọmọ: “Homẹdagbenọ nọ hẹn ale wá na ede, ṣigba, kanylantọ nọ hẹn nuhahun wá ede ji.” (Howhinwhẹn lẹ 11:17) Homẹdagbenọ nọ desọn ojlo mẹ nado nanúmẹ—enẹ wẹ whenu, huhlọn, mẹtọnhopọn po mọmọ po sọyi. Ehe nọ hẹn ale wá na yé to aliho susu mẹ to gbẹ̀mẹ, bosọ nọ wà dagbe na agbasa yetọn.

Dodinnanu lẹ dohia dọ mẹhe nọ desọn ojlo mẹ nado gọalọna mẹdevo lẹ ma nọ yawu jẹ apọ̀nmẹ-zọ̀n, kavi jẹflumẹ. To popolẹpo mẹ, yé nọ tindo agbasalilo dagbe. Nunamẹ sọn ojlo mẹ wá nọ yidogọna agbasalilo mẹhe to azọ̀n-jẹ-magbọ jẹ lẹ tọn, taidi apọ̀nmẹ-zọ̀n susu kavi SIDA. E sọ yin didohia dọ mẹhe to jijlo nado dealọ sọn ahàn sinsinyẹn nùnù mẹ bo nọ ze ede jo nado gọalọna mẹdevo lẹ ma nọ yawu jẹflumẹ, e sọ nọ yidogọna vivẹnudido etọn ma nado gbọjọ.

Na nuhe zọ́n bọ e do yinmọ, e yin didohia dọ “awuvẹmẹ, ojlo dagbe po homẹdagbe po nọ dekanpona numọtolanmẹ agọ̀ tintindo.” Nunamẹ sọ nọ de magbọjẹ po ayimajai po pò. Podọ mẹhe alọwlemẹ etọn kú de sọgan yawu gọ̀ ede mẹ mọ, eyin e nọ ze ede jo nado gọalọna mẹdevo lẹ.

Matin ayihaawe, nunamẹ nọ wà dagbe na nunamẹtọ lọ.

Jesu na tuli hodotọ etọn lẹ dọmọ: “Mì nọ namẹ, gbẹtọ lẹ nasọ na mì. Yé na kọ̀n nuhe yin jijlẹ ganji, he yè zíndo odò, bo whàn dopọ bosọ gọfla do akọ̀n na mì. Na nujlẹnu he mì to yíyí do jlẹ namẹ wẹ yé na yí do jlẹ na mì ga.” (Luku 6:38) To whenue a nanú mẹdevo lẹ, e yọnbasi dọ yé ni yọ́n pinpẹn etọn bo lẹzun nunamẹtọ. Nunamẹ nọ hẹn nuwadopọ po họntọnjiji po yọnbasi.

Mẹhe nọ dindona haṣinṣan gbẹtọvi tọn lẹ doayi e go dọ “mẹhe nọ yinuwa matin ṣejannabi to whelẹponu lẹ nọ na tuli mẹdevo lẹ nado wà nudopolọ.” Na nugbo tọn, “nuhihia poun gando nuyiwa homẹdagbe tọn lẹ go nọ zọ́n bọ gbẹtọ lẹ nọ lẹzun nunamẹtọ dogọ.” Dodinnanu de tlẹ dohia dọ, “to pipli de mẹ, mẹdopo sọgan yinuwado mẹsusu ji, yèdọ mẹhe e ma tlẹ yọnẹn kavi mọ pọ́n lẹ.” To hogbe devo mẹ, nuyiwa alọtútlú tọn dopo poun sọgan yinuwado mẹsusu ji to pipli de mẹ. Be e ma na jlo we nado nọ ofi mọnkọ ya? Mọwẹ, e nọ hẹn ale susu wá, eyin mẹsusu nọ nanúmẹ.

Numimọ de sọn Floride to États-Unis do ehe hia. Pipli Kunnudetọ Jehovah tọn lẹ tọn de ze yede jo nado wazọ́n kọgbọ  tọn to whenue jẹhọn-ahizi de ko gbànú godo. To whenue yé to tepọn azọ́nwanu he yé na yí do jla owhé de do lẹ, yé doayi e go dọ opá kọmẹnu de tọn yin hinhẹngble, bọ yé desọn ojlo mẹ bo jla ẹ do. “N’yọ́n pinpẹn etọn taun,” wẹ kọmẹnu lọ wlan to wekanhlanmẹ he e dohlan tatọ́-tẹnnọ Kunnudetọ Jehovah tọn lẹ tọn to ojlẹ de godo mẹ. “N’mọdọ omẹ ehelẹ wẹ yin gbẹtọ jijọ dagbenọ hugan he n’ko mọ pọ́n.” Pinpẹn-nutọn whàn ẹn nado basi nunina sọn ojlo mẹ wá de, he na yin yiyizan na azọ́n jiawu Kunnudetọ lẹ tọn.

Nuhe jẹna ayidego to dodinnanu lẹnunnuyọnẹntọ lẹ tọn de mẹ wẹ yindọ, “ojlo jọwamọ tọn wẹ e yin na gbẹtọvi lẹ nado nọ gọalọna mẹdevo lẹ.” Dodinnanu lọ dohia dọ yọpọvu lẹ “nọ yinuwa matin ṣejannabi, etlẹ yin to whenue yé ma ko yọ́n hodọ.” Etẹwutu? Biblu na gblọndo lọ to whenue e dọ dọ gbẹtọvi lẹ yin didá “to apajlẹ Jiwheyẹwhe tọn mẹ,” enẹ wẹ yindọ yé nọ do jẹhẹnu tangan Jiwheyẹwhe tọn nkọ lẹ hia.—Jenẹsisi 1:27.

Alọtútlú yin dopo to jẹhẹnu jiawu Mẹdatọ mítọn, Jehovah Jiwheyẹwhe tọn lẹ mẹ. E na mí ogbẹ̀ gọna nuhe sin hudo mí do nado tindo ayajẹ lẹpo. (Owalọ lẹ 14:17; 17:26-28) Mí na yọ́n Otọ́ olọn mẹ tọn mítọn po lẹndai etọn lẹ po dogọ, eyin mí nọ plọn Ohó etọn, Biblu. Owe enẹ sọ dohia dọ Jiwheyẹwhe wleawu sọgodo ayajẹnọ de tọn na mí. * (1 Johanu 4:9, 10) Na Jehovah Jiwheyẹwhe wẹ yin asisa alọtútlú tọn bọ mí yin didá to apajlẹ etọn mẹ wutu, e ma dona paṣa mí dọ nunamẹ—to apajlẹ Jiwheyẹwhe tọn hihodo mẹ—nọ wà dagbe na mí bo nọ hẹn mí tindo nukundagbe etọn.—Heblu lẹ 13:16.

Be a flin Alexandra he yin nùdego to bẹjẹeji hosọ ehe tọn ya? Nawẹ nulẹ wá yì do na ẹn? Mahopọnna dọ mẹde to ohún lọ mẹ bo dọ dọ e ze akuẹ etọn dlan wẹ, dawe he e gọalọna lọ ylọ họntọn delẹ to tòdaho he mẹ ohún lọ na nọte do, bọ yé sú dọla 20 lọ Alexandra. Humọ, dawe lọ hodo ayinamẹ Alexandra tọn bo jẹ Biblu plọn ji. Homẹ Alexandra tọn hùn nado gọ̀ ẹ mọ to osun atọ̀n godo to plidopọ daho Chine-gbè tọn Kunnudetọ Jehovah tọn lẹ tọn de ji to Pérou. Nado dọnudo Alexandra na nuhe e ko wà na ẹn lẹpo, dawe lọ basi oylọna ewọ po mẹhe zọnhẹ ẹ wá plidopọ lọ lẹ po yì núdùdù-satẹn etọn.

Nunamẹ po alọgigọna mẹdevo lẹ po nọ hẹn ayajẹ daho wá. Ayajẹ towe na tlẹ sọ sù humọ, eyin a gọalọna mẹdevo lẹ nado wá yọ́n mẹhe yin Asisa nunina dagbe lẹpo tọn dogọ—yèdọ Jehovah Jiwheyẹwhe! (Jakọbu 1:17) Be a to vivi ale he nunamẹ mọnkọtọn nọ hẹnwa lẹ tọn dù ya?