Jehová ojapo ko yvy yvyporakuérape g̃uarã. Haʼe ndojapói vaʼekue pe primera paréhape, Adán ha Eva, oiko hag̃ua yvágape. Ñandejára ojapo kuri umi ánhelpe oiko hag̃ua yvágape (Job 38:4, 7). Haʼe omoĩ pe primer kuimbaʼépe peteĩ hardín iporãitereívape, hérava Edén (Génesis 2:15-17). Jehová omeʼẽ Adán ha ifamília onasétavape pe oportunida oiko hag̃ua vyʼápe pára siémpre ko yvy ape ári.​—Elee Salmo 37:29 ha 115:16.

Iñepyrũme pe hardín de Edén añoite haʼe vaʼekue peteĩ paraíso. Pe primera paréha ifamília vaʼerã omyenyhẽ hag̃ua ko yvy. Haʼekuéra oñangarekóta pe yvýre ha kon el tiémpo ko yvy kompletoitégui oiko vaʼerã kuri peteĩ paraíso (Génesis 1:28). Ko yvy núnka noñehundimoʼãi, siémpre oĩta oiko hag̃ua pype yvyporakuéra.​—Elee Salmo 104:5.

Ehecha pe vidéo ¿Mbaʼérepa Ñandejára ojapo ko yvy?

Adán ha Eva naiñeʼẽrendúi Ñandejárape, upévare Jehová omosẽ chupekuéra pe hardíngui. Upéicha rupi pe paraíso oñehundi ha ni peteĩ umáno ndaikatúi ojapo jey ko yvýgui peteĩ paraíso. La Biblia heʼi: “Ko yvy oñemeʼẽma pe iñañávape” (Job 9:24).​—Elee Génesis 3:23, 24.

Upéva ndeʼiséi Ñandejára ndojapomoʼãveimaha ko yvýgui peteĩ paraíso. Haʼe ningo pe Todopoderóso ha siémpre oiko la heʼíva (Isaías 45:18). Upévare koʼẽrõitéma jaikóta haʼe oipota haguéicha iñepyrũme.​—Elee Salmo 37:11, 34.

Jesús ogoverna aja Ñandejára Rréinope, ko yvýgui oiko jeýta peteĩ paraíso. Pe gérra héravape Armagedón Jesús omoakãta Ñandejára anhelkuérape ohundi hag̃ua umi oñemoĩvape Ñandejára kóntrape. Upe rire, Jesús ojagarráta Satanáspe ha oñapytĩta chupe 1.000 áñore. Péro Ñandejára puévlo ojesalváta  pórke Jesús ogiáta ha oprotehéta chupekuéra. Haʼekuéra vyʼápe oikóta pára siémpre peteĩ paraísope ko yvy ape ári.​—Elee Apocalipsis 20:1-3 ha 21:3, 4.

¿Arakaʼépa Ñandejára oipeʼáta umi mbaʼe vai ko yvýgui? Jesús omeʼẽ vaʼekue peteĩ ‘señál’ ohechaukátava hiʼag̃uimaha upe día. Umi mbaʼe vai oikóva koʼág̃arupi, osegínterõ péicha, ikatu ohundipa yvyporakuérape. Koʼã mbaʼe ohechauka “pe fin ou potaitemaha”.​—Elee Mateo 24:3, 7-14, 21, 22.

Yvága guive Jesús ogovernáta 1.000 áñore ko yvy, ha upe tiémpope oipeʼapaitéta umi mbaʼe ñanembosufríva (Isaías 9:6, 7; 11:9). Jesús haʼéta avei Súmo Saserdóte, upévare ikatúta oipeʼa umi pekádo orekóva umi ohayhúva Ñandejárape. Upéicharõ, Jehová ojevaléta Jesúsre anivéma hag̃ua jasufri, ñandeeda ha ñamano.​—Elee Isaías 25:8 ha 33:24.

Umi iñeʼẽrendúva Ñandejárape oikóta pe paraísope (1 Juan 2:17). Jesús omanda vaʼekue isegidorkuérape oheka hag̃ua umi ipyʼaporãvape ha omboʼe hag̃ua chupekuéra mbaʼéichapa Ñandejára ikatu oguerohory chupekuéra. Koʼág̃a Jehová oprepara hetaiterei héntepe ikatu hag̃uáicha oiko pe paraísope ko yvy ape ári (Sofonías 2:3). Umi rreunión ojapóva umi testígo de Jehová oipytyvõma heta héntepe, por ehémplo umi sy ha túape, ména ha tembirekópe. Pe Salón de Réinope umi família oadora oñondive Ñandejárape ha oaprende umi notísia porã oipytyvõva chupekuéra. Nde avei ikatu reho umi rreunionhápe.​—Elee Miqueas 4:1-4.