Korintkarank Poili Chitt 16:1-24
16 Atam Devachea lokam* pasot jim dennim ektthaim korunk zai, tea vixim hanvem jeo Galasiachea sobhek suchounneo dileat teo tumi-i pallat.
2 Dor sumanachea poilea disa, zonn eklean aplea lagim asa tantuntlem kitem tori kuxin kaddun dovorchem. Oxem kelʼlean hanv ietam tednam tumkam dennim ektthaim korunk poddchimnant.
3 Hanv thoim ietolom tednam, tumi tumchea chittimnim je munis visvas dovorpa sarke asat mhunn boroilam tankam hanv dhaddttolom. Oxem kelʼlean tumi jim khuxen dennim ditole tim te Jeruzalemant pavoitole.
4 Punn, hanvem thoim vochpachi goroz asa zalear, hanv-ui tanchea borabor voitolom.
5 Punn hanv Masedoniant vochon tumchea lagim ietolom, karonn hanvem Masedoniantlean ieunchem tharailam.
6 Ani ghoddie hanv tumchea borabor ravtolom vo thonddeche dis tumchea sangata sartolom. Tea uprant, hanv zoim voitolom thoim thoddi vatt meren tumi mhaka pavounk ieunk zata.
7 Hanv tumkam fokot vatter mellon vochonk sodhina. Tachea bodlek, Jehovachi* khuxi asa zalear hanv tumchea sangata thoddo vell sarunk sodhtam.
8 Punn Ponʼnasavea disachi porob zaum meren hanv Efezantuch ravtolom.
9 Karonn hanvem khub seva korchi mhunn ek vhoddlem dar mhojea pasot uktem kelam, punn mhaka zaite virodh korpi pasun asat.
10 Timot thoim ieta zalear, to tumchea modem asa tednam taka koslich bhirant dischi nhoi mhunn khatri korun gheiat. Karonn mhoje bhaxen to-ui, Jehovachem* kam korta.
11 Tea pasot, konnench taka kainch valor na mhunn somzochem nhoi. Tumi taka thoddi vatt meren bore bhaxen pavoiat. Oxem kelʼlean to hanga mhojea lagim ieunk xoktolo, karonn hanv dusrea bhavam borabor tachi vatt polloitam.
12 Atam amcho bhav Apolosa vixim sangchem mhunnttlear, bhavam sangata tumchea lagim voch mhunn hanvem tache lagim khub vinoti keli. Sodʼdheak to tumchea lagim ieunk sodhina, punn taka sondhi melltta tednam to ietolo.
13 Zagrut ravat, bhavarthant ghott zaiat, dhirvont zaiat, ani xoktivont zait ravat.
14 Tumi kitem-i kortat tem mogan korat.
15 Atam bhav-bhoinnimno, hanv tumchea lagim anik ek vinoti kortam: Stefanasacho ghorabo Akaiantlem poilem foll zaun asa ani tannim Devachea lokanchi* seva korunk aplem jivit bhettoilam mhunn tumi tor zannant.
16 Tumi pasun oslea lokanchea adhin ravat, toxench khub vavr kortat tankam sogleank adhin ravat.
17 Stefanas, Fortunatus, ani Akaikus hanga ravle mhunn hanv khub khuxal, karonn tumi nasle tednam tannim mhaka khub modot keli.
18 Tannim mhaka ani tumkam khub urba dili. Taka lagon, oslea munxank man diat.
19 Asiantleo sobha tumkam aplo Kristi mog dhaddttat. Toxench, Akuila ani Priska ani tanchea ghorant ektthaim zata ti sobha pasun tumkam aplo Kristi mog dhaddtta.
20 Soglea bhavancho tumkam nomoskar. Eka-mekak povitr umo diun nomoskar korat.
21 Atam hanv Paulu, svota tumkam nomoskar boroitam.
22 Konnankui Somiacho mog na zalear, tacher xirap poddom. Amchea Somia, ieo!
23 Somi Jezuchi favo nasloli doia tumcher asum.
24 Somi Jezuchea ekvottant aslolea tumkam sogleank hanv mhozo mog dhaddttam.
