A3
Bible Amchea Meren Koso Pavlo
Bible Deva thaun asa ani tannench to boroun ghetla ani aiz meren surokxit dovorla. Tannem Bible-ant oxem boroun dovorlam:
“Jehovachem utor sodankal urta!”—1 Pedru 1:25.
Him utram ekdom khorim zaun asat. Survatek, Hebrev ani Aramaik bhaxent a vo Grik bhaxent hatan boroilʼlim Devachim utram aiz meren togon uronk nant. Tori astana, Devachem utor mat aiz meren toglam. Devachea preronnan survatek jem boroilʼlem tench aiz amchea lagim aslolea Bible-ant asa mhunn ami ghott khatri kiteak dhorunk xoktat?
DEVACHEM UTOR KOPI KORPEAMNIM SUROKXIT DOVORLEM
Sogleant poilim ami Hebrev Bhaxent Boroilʼlea Pustokam vixim polloum-ia. Tantunt, survatek boroilʼli tich mahiti melltta. Hachem ek karonn mhunnttlear, adlea kallar Devan aplim utram kopi korpachi manddavoll kelʼli. b Udharonnak, Izraelachea dor eka razan aplea pasot Kaideachea Pustokachi ek kopi toiar korchi mhunn Jehovan hukum dilʼlo. (Dusri Somurt 17:18) Tea bhair, Levitamnim lokank Devachem utor xikounchem ani tem samballun dovorchem mhunn Devan tankam zobabdari dilʼli. (Dusri Somurt 31:26; Nehemias 8:7) Fuddem, Judev lok Babilonant koidi zale tednam Devachem utor kopi korpi lokancho ek zomo toiar zalo. Tankam xastri (Soferim) mhunnttale. (Ezra 7:6, futtnott) Vell gelo toso, hea xastreamnim Hebrev bhaxentlea 39 pustokancheo zaiteo kopi toiar keleo.
Bible-achea Grik Bhaxent Boroilʼlea 27 pustokam vixim kitem? Him pustokam, Jezu Kristachea thoddea apostlamnim ani survatechea thoddea xisamnim boroilʼlim. Judev xastream bhaxen survateche Kristanv pasun hea pustokancheo kopi toiar kortale. (Koloskarank 4:16) Romi Somraz, Diocletian ani heramnim survatechea Kristanvancheo sogleo kopi nas korcho proitn kelʼlo. Tori astana, aiz meren hozaramnim osleo kopi ani tanche kuddke surokxit asat.
Grik Bhaxent Boroilʼlim Pustokam dusrea bhasamnim pasun bhaxantor kelʼlim. Survatek, Bible dusrea bhasamnim bhaxantor kelʼlo, zantunt thoddeo adleo bhaso pasun asleo. Zoxem, Armenian, Koptik, Ethiopik, Georgian, Latin, ani Siriak.
KHOINCHEA HEBREV ANI GRIK BOROUPAM THAUN BHAXANTOR KORCHEM
Bible-acheo jeo kopi kelʼleo tea soglea kopint ek-sarkim utram nant. Tor survatek Bible boroilʼlo tednam tantunt khorem kitem boroilʼlem aslem tem amkam koxem kollttolem?
Hea prosnacho zobab zannam zaunk ami ek udharonn gheum-ia. Ek tticher, 100 vidʼdheartheank, eka pustokacho ek odheai utran-utor boroun kaddunk sangta. Uprant, tem pustok sanddlem zalear pasun tea 100 vidʼdheartheamnim, jeo kopi kelʼleo teo eka-mekak sor korun tea pustokachea odheai-ant khorench kitem boroilʼlem tem sodhun kaddunk zata. Te vidʼdhearthi kopi kortana thoddeo chuko kortole mhunn dubhav na. Tori astana, te sogle ekuch torechi chuk kortole oxem zaunk xokona. Tech bhaxen, Bible-acheo jeo hozaramnim kopi ani tanche kuddke asat te eka-mekak sor kele tednam, kopi kortana khoim chuk zalea ani survatek kitem boroilʼlem tem zannarank kollon ailam.
“Hea pustoka sarkem anik dusrem khoinchench pustok na, jem poilim boroilʼlem toxench amchea meren pavoilam, oxem ami khatren mhunnonk zata.”
Survatek, Bible boroil’lo tednam, tantunt jem boroil’lem tem Bible-ant asa mhunn ami kiteak khatri dhorunk zata? Bible-achea Grik Bhaxent Boroilʼlea Pustokam vixim, zaka chodd korun Novo Korar mhunnttat, tache vixim Bible-acho zannar F. F. Bruce-an oxem boroilem: “Adlea tempachea zaitea famad boroupeanchim, jim boroupam asat tanchea khoreponnam vixim prosn ubarunk konnui sopnant pasun chintcho na. Punn hea boroupam mukhar amchea Novea Korarachim pustokam khorim asat mhunn chodd purave asat.” Tannem oxem-i mhunnttlem: “Novea Korarachim pustokam, dhormik pustokam naslim zalear konnuch tanchea khoreponnam vixim dubhavcho naslo.”
Dead Sea lagim mellʼllolea kovlleant Izaias pustokacho odheai 40 (125 tem 100 K.X.A.)
He kovlle ek hozar vorsam uprant mellʼllolea Hebrev bhaxent hatan boroilʼlea kopink sor kele tednam, fokot thoddoch forok dison ailo. Ho forok chodd korun spellings-ant aslo
Aleppo Codex-antlo Izaias pustokacho odheai 40. Hi sumar 930 K.X-ant, Masoretes-amnim Hebrev bhaxent boroilʼli famad kopi zaun asa
Grik Boroupam: 19-avea xekddeachea xevottak, zannar B. F. Westcott ani F.J.A. Hort, hannim hea vellar uplobd aslolea Bible-acheo hatan boroilʼleo kopi ani tanche kuddke sor korun Grik Bhaxent Boroilʼlea Pustokanchem ek mukhel ttextt toiar kelem. Tanchea hispa pormonnem hem ttextt, survatek hatamnim boroilʼlea kopint aslem toxench aslem. 1950 vorsachea bhonvtonnchea vorsamnim, Novo Sonvsar Bhaxantor Somitin, Westcott ani Hort, hanchem mukhel ttextt uzar korun Grik bhaxent boroilʼlea pustokanchem bhaxantor kelʼlem. Toxench, hea Somitin adlea papyrus-acher hatan boroilʼlea kopinchi modot ghetli. Heo papyrus kopi Kristi Xokachea dusrea ani tisrea xekddeantleo asat mhunn mantat. Tea uprantchea vorsamnim, anikui papyrus kopio mellʼlleat. Tea bhair, Nestle ani Aland ani United Bible Societies, hannim aplem mukhel ttextt toiar kelem, zantunt zannaramnim sodhun kaddloli ekdom novi mahiti asa. Hea sodhun kaddlolea mahitintli thoddi mahiti Novo Sonvsar Bhaxantor Bible-achea novea Inglez edition-ant ghatloli asa.
Him soglim mukhel ttextt-am spoxtt ritin dakhoun ditat, ki Grik Bhaxent Boroilʼlea Pustokanchea adlea bhaxantorant, (zoxem King James Version) thoddim versam, khorem mhunnttlear, Devachea preronnan boroilʼlea Bible-ant naslim. Tachea bodlek, tim xastreamnim kopi kortana svota boroileant. Aichea kallchea zaitea Bible-ant hea versanchem bhaxantor kelʼlem na. Punn urlolim versam hanchea pormonnem dovorlolim asat, jim 16-vea xekddeant tharailʼlim. Tim versam him zaun asat: Matev 17:21; 18:11; 23:14; Marku 7:16; 9:44, 46; 11:26; 15:28; Lukas 17:36; 23:17; Juanv 5:4; Dhormdutancho Itihas 8:37; 15:34; 24:7; 28:29; ani Romkarank 16:24. Hea Bible-ant him versam ghalunk nant. Punn tea zagear futtnott ghatlolo asa.
Marku 16 (vers 9-20-ant) aslolim lamb xevottachim utram, toxench lhan xevottachim utram ani Juanv 7:53–8:11-ant aslolim utram, puraveam pormonnem, adlea hatan boroilʼlea kopint naslim mhunn kollon ieta. Teach pasot, him noklim versam hea Bible-ant ghalunk nant. c
Bible-achea zannaram pormonnem, Bible-ant survatek jim utram aslim, tea utrancho sarko orth diun utrant thoddo bodol kelʼlo asa. Udharonnak, hatan boroilʼlea thoddea kopimnim Matev 7:13 oxem vachta: “Oxir darvontteantlean bhitor sorat karonn rund darvontto ani vhoddlo rosto mornnak pavoita, ani tachea voilean zaito lok voita;” Novo Sonvsar Bhaxantor-achea adlea English edition-ant “darvontto” hem utor uzar korunk naslem. Punn adlea hatan boroilʼlea kopincho obheas kelea uprant “darvontto” hem utor survatek aslem mhunn kollon ieta. Teach pasot, hea edition-ant hem utor ghatlam. Heach bhaxen, dusrim-i utram thodde ritin bodolʼleant. Punn he lhan bodol zaun asat ani tankam lagon Devachea utracho mull sondex bodolna.
200 K.X-antli, 2 Korintkarank 4:13–5:4, hachi papyrus-acher hatan boroilʼli kopi
a Hanga thaun hea pustokank Hebrev Bhaxent Boroilʼlim Pustokam, oxem mhunnttlam.
b Hatan boroilʼlea kopincheo kopi korunk ek karonn mhunnttlear, survatek jeo hatan boroilʼleo kopi asleo, teo piddʼddear zatat toslea vostuncher boroitale.
c Him versam kiteak noklim zaun asat tea vixim mahiti 1984 vorsak Inglez bhaxent prokaxit kelʼlea New World Translation of the Holy Scriptures—With References Bible-achea futtnottant mellttoli.
