Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

NYƐYAA NƆ NYƐBUA!

Mɛni Hewɔ Bianɛ Lɛ Mɛi Bɛ Bulɛ Kɛhã Mɛi Krokomɛi Lɛ?​—⁠Mɛni Biblia Lɛ Kɛɔ Yɛ He?

Mɛni Hewɔ Bianɛ Lɛ Mɛi Bɛ Bulɛ Kɛhã Mɛi Krokomɛi Lɛ?​—⁠Mɛni Biblia Lɛ Kɛɔ Yɛ He?

 Tsutsu ko lɛ, mɛi kɛ mɛi yeɔ jogbaŋŋ, shi bianɛ lɛ, ebɛ lɛ nakai kwraa. Helatsɛmɛi ni bɛ subaŋ lɛ bolɔɔ amɛwoɔ datrɛfoi; mɛi ni yayeɔ nii yɛ tsɔpbaa ni amɛbuuu mɔ lɛ jɛ́ɔ mɛi ni bahãa amɛ niyenii lɛ; mɛi ni yeɔ amɛtsui naa saji ni taa trɔtrɔ mli lɛ ateŋ mɛi komɛi tutuaa meetifoi; skulbii toigbolɔi yeɔ amɛtsɔɔlɔi ahe fɛo, amɛwoɔ amɛhe gbeyei, ni amɛtutuaa amɛ; ni maŋkwralɔi komɛi kɛ amɛhe woɔ juu kɛ fɔ̃ mli, ni amɛteŋ mɛi komɛi hu shwãa.

 Biblia lɛ ji nɔ ni tsɔɔ kɛji gbɛ ni atsɔɔ nɔ akɛ mɔ ko yeɔ ahãa lɛ ja loo ejaaa. Agbɛnɛ hu, etsɔɔ nɔ hewɔ ni ŋmɛnɛ lɛ, mɛi babaoo ebuuu mɔ lɛ.

Mɛni hewɔ mɛi babaoo ebuuu mɔ lɛ?

 Sui kpakpai loo jeŋba kpakpai ni tsutsu ko lɛ mɛi jieɔ amɛ kpo kɛtsɔɔ akɛ amɛbuɔ mɔ lɛ anɔ egbɔ kwraa, ni aana enɛ yɛ je lɛŋ hei srɔtoi fɛɛ.

  •   Yɛ niiamlitaomɔ ko ni nitsumɔhe ko ni atsɛɔ lɛ Gallup lɛ fee lɛ mli lɛ, Amerikabii tsɔɔ mli akɛ, jeŋba egbee shi kwraa yɛ United States bianɛ fe bɔ ni eyɔɔ afii 22 ni eho nɛ.

  •   Yɛ niiamlitaomɔ kroko ko ni afee lɛ mli lɛ, be ni abibii mɛi 32,000 saji yɛ maji 28 anɔ lɛ, amɛteŋ oha mlijai 65 kɛɛ akɛ bɔ ni kulɛ mɛi kɛ mɛi krokomɛi yeɔ jogbaŋŋ, ni amɛjieɔ bulɛ kpo amɛtsɔɔ mɛi lɛ egbee shi kwraa bɔ ni amɛnako eko daŋ.

 Biblia lɛ gba subaŋi ni wɔnaa ŋmɛnɛ lɛ efɔ̃ shi.

  •   “Naagbee gbii lɛ anɔ lɛ jaramɔ bei baaba. Gbɔmɛi baatsɔmɔ hesuɔlɔi, amimyelɔi, shwãlɔi, henɔwolɔi; amɛbaajɛ́ mɛi, amɛbaagbo amɛfɔlɔi anɔ toi, amɛhiɛ esɔŋ nii, . . . trumui [kɛ] mɛi ni hiɛ yɔɔ la.”​—2 Timoteo 3:1-3, Good News Translation.

 Kɛ́ ootao ole bɔ ni gbalɛ nɛɛ miiba mli lɛ he saji krokomɛi lɛ, kanemɔ sane ni ji, Did the Bible Predict the Way People Think and Act Today?” lɛ.

Nɔ ni baaye abua wɔ ni wɔjie sui kpakpai akpo

 Bɔ ni mɛi kɛ mɛi yeɔ jogbaŋŋ be ko ni eho lɛ egbee shi kwraa, shi mɛi akpekpei abɔ ena akɛ Biblia lɛ kɛ ŋaawoi ni baahã ajie sui kpakpai akpo loo aba jeŋ jogbaŋŋ lɛ hãa. Ŋaawoi ni ekɛhãa yɛ jeŋba he lɛ ahe yɛ sɛɛnamɔ “bianɛ kɛ agbɛnɛ hu, kɛmiiya naanɔ.” (Lala 111:8) Ŋaawoi nɛɛ amli fioo komɛi nɛ:

  •   Nɔ ni Biblia lɛ kɛɔ: “Nɔ fɛɛ nɔ ni nyɛtaoɔ akɛ mɛi afee ahã nyɛ lɛ, nyɛ hu nyɛfea nakai nɔŋŋ nyɛhãa amɛ”​—Mateo 7:12.

     Nɔ ni etsɔɔ: Esa akɛ wɔkɛ mɛi aye yɛ mlihilɛ kɛ bulɛ naa, tamɔ bɔ ni wɔsumɔɔ ni akɛ wɔ aye lɛ nɔŋŋ.

  •   Nɔ ni Biblia lɛ kɛɔ: “Amrɔ nɛɛ ni nyɛjie lakamɔ nyɛshɛ nyɛfɔ̃ lɛ, nyɛteŋ mɔ fɛɛ mɔ kɛ enyɛmi gbɔmɔ awie anɔkwale.”​—Efesobii 4:25.

     Nɔ ni etsɔɔ: Esa akɛ wɔye anɔkwa yɛ wɔwiemɔi kɛ wɔnifeemɔi fɛɛ amli.

 Kɛhã enɛ he saji krokomɛi lɛ, ofainɛ kanemɔ: