Afɔ mi yɛ Mulhouse, ni ji maŋ ko ni yɔɔ France kooyi-bokãgbɛ lɛ mli, ni ale maŋ nɛɛ akɛ ayeɔ awui yɛ jɛmɛ waa. Be ni miji gbekɛ lɛ, nibii titri ni mina ni tee nɔ yɛ wɔkutso lɛ mli ji awuiyeli ni yaa nɔ yɛ wekui ateŋ. Yɛ wɔweku lɛ mli lɛ, abuuu yei, ni abiii amɛsusumɔ kɛ́ aakpɛ yiŋ yɛ saji ahe. Nɔ ni atsɔɔ mi ji, yei lɛ kpata shi amɛhiɔ ni amɛkwɛɔ hii kɛ gbekɛbii ni yɔɔ weku lɛ mli lɛ.

Mináaa shihilɛ lɛ mlɛo be ni midaa lɛ. Be ni miye afii nyɔŋma lɛ, mipapa gbo yɛ dãa ni etɔɔ lɛ hewɔ. Afii enumɔ sɛɛ lɛ, minyɛmimɛi hii onukpai lɛ ateŋ mɔ kome gbe ehe. Yɛ nakai afi lɛ mli nɔŋŋ lɛ, mina ni agbe mɔ ko yɛ weku mli bei ko ni te shi lɛ hewɔ. Miwekumɛi lɛ tsɔɔ mi bɔ ni akɛ kakla kɛ tu nɔɔ, koni manyɛ mafã mihe kɛ́ ehe bahia ni mafee nakai. Akɛni mihao hewɔ lɛ, mibɔi daanumɔ ni miyatɛŋ nibii miwo migbɔmɔtso lɛ he fɛɛ.

Be ni mináa afii 16 lɛ, no mli lɛ minuɔ beer tɔi 10 kɛmiimɔ 15 daa gbi, ni mibɔi wii kɛ kokein kɛ amɛhenɔi lɛ kɛnitsumɔ. Bɔ ni afee ni maná shika kɛwo nɔ ni mifeɔ lɛ he nyɔmɔ lɛ, mibɔi tsɛnsikoi hɔ̃ɔmɔ, ni mibɔi juu hu. Be ni mináa afii 17 lɛ, no mli lɛ mitee tsuŋwoo miba. Awo mi tsuŋ shii 18 yɛ juu kɛ awuiyeli hewɔ.

Be ni mináa afii 20 kɛmiimɔ afii 24 lɛ, no mli lɛ mishihilɛ lɛ mli ewo wu kwraa. Mishɛreɔ wii ni abɔlɔ aaafee 20 daa gbi, ni mikɛ tsofai krokomɛi hu tsuɔ ni bɔ ni esaaa. Bei komɛi lɛ, mikɛ tsofai nɛɛ tsuɔ nii aahu akɛ, eshwɛɔ fioo ni magbo, ni enɛ tee nɔ shii abɔ. Mibɔi wii, kokein kɛ tsofai ni mɛi kɛtsuɔ nii bɔ ni esaaa lɛ hɔ̃ɔmɔ, ni enɛ hewɔ lɛ, be fɛɛ be lɛ kakla kɛ tu tsɛ mihe. Be ko lɛ, mika akɛ matswa papa ko tu, shi henii anaa lɛ, tuŋtɛ lɛ yatswa dade ni yɔɔ ebɛlti lɛ naa lɛ ni egba afã! Be ni miye afii 24 lɛ, mimami gbo, ni enɛ hã mihiɛ bafee laŋlaŋ fe tsutsu lɛ. Mɛi ni nyiɛ gbɛjegbɛ lɛ he ni miishe mi gbeyei lɛ foɔ gbɛ lɛ mli koni mikɛ amɛ akakpe. Akɛni mikɛ mɛi nɔɔ hewɔ lɛ, bei pii lɛ miyayeɔ Hɔɔ kɛ Hɔgbaa lɛ yɛ polisteshɛŋ loo yɛ helatsamɔhe koni akpɛ mihei ni epila lɛ.

Be ni miná afii 28 lɛ, mibote gbalashihilɛ mli. Taakɛ ekolɛ obaakpa gbɛ lɛ, mibuuu miŋa lɛ kwraa. Mijɛɔ lɛ ni miyiɔ lɛ hu. Mikɛ lɛ efeee ekome kɛfeee nɔ ko nɔ ko akɛ wu kɛ ŋa. Misusu akɛ kɛ́ mihã lɛ jwinei ni miyajuɔ lɛ babaoo lɛ, no pɛ kɛkɛ fa. Kɛkɛ ni nɔ ko ni mikpaaa gbɛ ba. Miŋa kɛ Yehowa Odasefoi bɔi Biblia lɛ kasemɔ. Be ni akɛlɛ kase nii shi kome nɔŋŋ lɛ, ekpa tawa shɛremɔ, ekpoo akɛ  ebaahe shika ni miyajuɔ lɛ eko, ni ekɛ jwinei ni mikɛhã lɛ ku sɛɛ ehã mi. Mitsui ba waa. Mite shi miwo lɛ yɛ Biblia lɛ ni ekaseɔ hewɔ, ni mifɛ̃ɔ zigareti lasu mishwieɔ ehiɛ. Mishiɔ lɛ la kɛkpaa wɔkutso lɛ mli fɛɛ.

Gbi ko gbɛkɛ be ni mitɔ dãa lɛ, miwo wɔshĩa lɛ mli la. Miŋa baa mi kɛ wɔbiyoo ni eye afii enumɔ lɛ yi kɛjɛ la lɛ mli. Be ni dãa lɛ tse yɛ mihiɛ lɛ, mihenilee bɔi mi yii. Minu he akɛ Nyɔŋmɔ kɛ mihe eshai lɛ ekeŋ mi kɔkɔɔkɔ. Mikaiɔ akɛ be ko lɛ, minu ni osɔfo ko miiwie akɛ mɛi fɔji lɛ yaa hɛl. Datrɛfonyo ni kwɛɔ mi lɛ hu po kɛɛ mi akɛ: “Ogbe ojeŋ naa! Anyɛŋ nɔ kwraa afee ahã bo dɔŋŋ.”

Be ni wɔshĩa lɛ shã sɛɛ lɛ, wɔkɛ miŋa fɔlɔi yahi shi. Be ni Odasefoi lɛ basara miŋa lɛ, mibi amɛ akɛ, “Ani Nyɔŋmɔ baanyɛ ekɛ mihe eshai lɛ fɛɛ ake mi?” Amɛkane 1 Korintobii 6:9-11 lɛ yɛ Biblia lɛ mli amɛhã mi. Yɛ nakai ŋmalɛ lɛ mli lɛ, atsɔɔ sui komɛi ni Nyɔŋmɔ hiɔ, ni akɛfata he akɛ : “Nɛkɛ nyɛteŋ mɛi komɛi yɔɔ tsutsu.” Nakai ŋmalɛ hã mina akɛ manyɛ matsake. Kɛkɛ ni Odasefoi lɛ kane 1 Yohane 4:8 lɛ kɛma nɔ mi kɛhã mi akɛ, Nyɔŋmɔ sumɔɔ mi. Bɔ ni Odasefoi lɛ wo mi hewalɛ nɛɛ hã mibi amɛ ni amɛkɛ mi akase Biblia lɛ shii enyɔ yɛ otsi mli, ni mibɔi Kristofoi akpeei yaa. Misɔle shii abɔ mihã Yehowa.

Yɛ nyɔɔŋ kome pɛ mli lɛ, mikpɛ mli akɛ makpa tsofai kɛ nitsumɔ, kɛ dãatɔɔ. Etsɛɛɛ kɛkɛ ni minu he akɛ ta ko miiya nɔ yɛ migbɔmɔtso lɛ mli! Milaa lamɔi gbohii, miyitso gbaa mi, mihewojiaŋ waa mihe, ni minuɔ he akɛ miku misɛɛ kɛya miyɛlɛ ŋmɔ lɛ mli ekoŋŋ. Kɛ̃lɛ, minu he akɛ Yehowa hiɛ mimli, ni eewo mi ekãa. Minu he tamɔ bɔ ni bɔfo Paulo nu he lɛ pɛpɛɛpɛ. Eŋma yɛ yelikɛbuamɔ ni Nyɔŋmɔ kɛhã lɛ lɛ he akɛ: “Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ.” (Filipibii 4:13) Sɛɛ mli lɛ, minyɛ mikpa zigareti hu shɛremɔ.​—2 Korintobii 7:1.

Biblia lɛ ye ebua mi ni mitsake mishihilɛ, ni ehã wɔweku lɛ shihilɛ hu hi fe tsutsu lɛ. Mitsake bɔ ni mikɛ miŋa yeɔ hãa lɛ. Mibɔi bulɛ kpo jiemɔ kɛ lɛ hãmɔ, ni kɛ́ mikɛ lɛ miiwie lɛ, mikɛɔ “ofainɛ” kɛ “oyiwaladɔŋŋ.” Mibatsɔ tsɛ kpakpa mihã wɔbiyoo lɛ. Be ni akɛmi kase Biblia lɛ afi sɛɛ lɛ, mijɔɔ miwala nɔ mihã Yehowa ni abaptisi mi. No mli lɛ abaptisi miŋa momo.

Miyɛ nɔmimaa akɛ Biblia mli shishitoo mlai ni mikɛtsu nii lɛ hewɔ miyɔɔ wala mli lolo lɛ. Miwekumɛi ni jeee Odasefoi lɛ po eyɔse akɛ, kulɛ be nɛɛ migbo yɛ tsofai ni mikɛtsuɔ nii bɔ ni esaaa lɛ hewɔ, loo ekolɛ agbe mi yɛ nɔmɔ mli.

Nɔ ni Biblia lɛ tsɔɔ yɛ bɔ ni esa akɛ mahi shi mahã akɛ wu kɛ tsɛ lɛ he lɛ ehã wɔweku shihilɛ lɛ ehi jogbaŋŋ. (Efesobii 5:25; 6:4) Agbɛnɛ lɛ, wɔweku lɛ feɔ ekome kɛtsuɔ saji ahe nii. Amrɔ nɛɛ, yɛ nɔ najiaŋ ni mabu miŋa akɛ kpata shi ji he ni esa akɛ ehi lɛ, mikɛ miishɛɛ yeɔ bua lɛ koni enyɛ ekɛ be babaoo ashiɛ. Ni lɛ hu ekɛ miishɛɛ yeɔ ebuaa mi ni minyɛɔ mitsuɔ misɔ̃ akɛ asafoŋ onukpa lɛ he nii.

Suɔmɔ kɛ mɔbɔnalɛ kpo ni Yehowa Nyɔŋmɔ jie etsɔɔ mi lɛ tsake mishihilɛ kwraa. Nɔ ni kã mitsui nɔ waa ji, ni magba mɛi ni etamɔ nɔ ni amɛgbe amɛjeŋ naa lɛ Yehowa sui kpakpai lɛ ahe sane, ejaakɛ mi hu nakai mɛi na mi. Mile akɛ Biblia lɛ yɛ hewalɛ, ni ebaanyɛ eye ebua mɔ fɛɛ mɔ ni ená shihilɛ kpakpa. Biblia lɛ etsɔɔ mi bɔ ni esa akɛ maná suɔmɔ kɛ bulɛ mahã hii kɛ yei fɛɛ, ni etsɔɔ mi bɔ ni esa akɛ maná bulɛ mahã mi diɛŋtsɛ mihe hu.