“Kɛ́ nyɛbi Tsɛ lɛ nɔ ko lɛ, ekɛbaahã nyɛ yɛ migbɛ́i mli.”​—Yohane 16:23.

Yesu wiemɔi nɛɛ tsɔɔ akɛ, Yehowa miisumɔ ni wɔsɔle wɔhã lɛ yɛ Yesu Kristo gbɛ́i mli, jeee kɛtsɔ amagai, hetselɔi, ŋwɛibɔfoi, loo blematsɛmɛi ni egboi anɔ. Kɛ́ wɔsɔle wɔhã Nyɔŋmɔ yɛ Yesu gbɛ́i mli lɛ, no tsɔɔ akɛ, wɔle akɛ nɔ ni Yesu fee ehã wɔ lɛ hewɔ Nyɔŋmɔ boɔ wɔ toi lɛ. Yesu wie akɛ: “Mɔ ko mɔ ko baaa Tsɛ lɛ ŋɔɔ akɛ ja etsɔ minɔ.”—Yohane 14:6.

“Nyɛfɔsea nyɛtsuiiaŋ nyɛshwiea ehiɛ.”​—Lala 62:8.

Kɛ́ wɔmiisɔle lɛ, esa akɛ wɔkɛ Yehowa awie tamɔ bi ko ni kɛ etsɛ ni sumɔɔ lɛ miiwie. Esaaa akɛ wɔkaneɔ sɔlemɔ lɛ kɛjɛɔ wolo ko mli loo wɔkɛɔ nɔ ni wɔkpe wɔwo wɔyitsoŋ, moŋ lɛ, esa akɛ wɔjɛ wɔtsuiŋ wɔwie ni wɔkɛ lɛ awie yɛ bulɛ mli.

“Nɔ fɛɛ nɔ ni wɔbiɔ ni kɛ esuɔmɔnaa nii kpãa gbee lɛ, eboɔ wɔ toi.”​—1 Yohane 5:14.

Yehowa etsɔɔ wɔ nɔ ni ebaafee ehã wɔ kɛ nɔ ni esumɔɔ ni wɔfee wɔhã lɛ yɛ Biblia lɛ mli. Kɛ́ wɔmiitao ni ebo wɔsɔlemɔi toi lɛ, esa akɛ wɔsɔle bɔ ni ‘kɛ esuɔmɔnaa nii baakpã gbee.’ Ja wɔkase Biblia lɛ ni wɔle lɛ jogbaŋŋ, dani wɔbaanyɛ wɔfee nakai. Kɛ́ wɔsɔle yɛ nɛkɛ gbɛ nɔ lɛ, ebaasa ehiɛ.

Sɔlemɔ Yɛ Ohiamɔ Nii Ahe. Wɔbaanyɛ wɔsɔle wɔbi Nyɔŋmɔ ni ehã wɔ nibii ni he baahia wɔ daa gbi, tamɔ niyenii, atade, kɛ wɔɔhe. Wɔsɔle hu ni ehã wɔ hiɛshikamɔ ni wɔkɛkpɛ yiŋ kpakpai, kɛ nyɛmɔ ni wɔkɛdamɔ kai anaa. Wɔbaanyɛ wɔbi ni ehã wɔ hemɔkɛyeli, ekɛ wɔhe eshai ake wɔ, ni eye ebua wɔ.​—Luka 11:3, 4, 13; Yakobo 1:5, 17.

Sɔlemɔ Ohã Mɛi Krokomɛi. Fɔlɔi ni yɔɔ suɔmɔ lɛ náa miishɛɛ kɛ́ amɛna akɛ suɔmɔ yɛ amɛbii ateŋ. Yehowa hu miisumɔ ni suɔmɔ ahi wɔ, ni ji ebii ni yɔɔ shikpɔŋ lɛ nɔ lɛ ateŋ. Ehi waa akɛ wɔbaasɔle wɔhã wɔhefatalɔ, wɔbii, wɔwekumɛi, kɛ wɔnanemɛi. Kaselɔ Yakobo kɛɛ: “Nyɛsɔlea nyɛhãa nyɛhe.”​—Yakobo 5:16.

Sɔlemɔ Kɛda Nyɔŋmɔ Shi. Biblia lɛ wie yɛ wɔ-Bɔlɔ lɛ he akɛ: “Efeɔ ekpakpa, ehãa nugbɔ nɛɔ kɛjɛɔ ŋwɛi ehãa nyɛ kɛ bei ni nii baa pii hu, ni no hãa nyɛnáa niyenii babaoo, ni miishɛɛ yiɔ nyɛtsuiiaŋ obɔbɔ.” (Bɔfoi 14:17) Kɛ́ wɔsusu nibii fɛɛ ni Nyɔŋmɔ efee ehã wɔ lɛ ahe lɛ, no baatsirɛ wɔ ni wɔsɔle kɛda lɛ shi. Kɛfata he lɛ, esa akɛ wɔbo Nyɔŋmɔ toi kɛtsɔɔ akɛ, wɔhiɛ sɔɔ nibii ni efeɔ ehãa wɔ lɛ.​—Kolosebii 3:15.

Kɛ́ wɔjɛ wɔtsuiŋ wɔsɔle ni wɔnáaa hetoo oya lɛ, wɔnijiaŋ baanyɛ aje wui. Ani no tsɔɔ akɛ Nyɔŋmɔ susuuu wɔhe? Dabi kwraa! Niiashikpamɔi ni nyiɛ sɛɛ nɛɛ hãa wɔnaa akɛ ehe baahia ni wɔya nɔ wɔsɔle.

Steve, ni awie ehe yɛ Buu-Mɔɔ nɛɛ shishijeegbɛ lɛ, wie akɛ: “Eji jeee sɔlemɔ kulɛ, jeŋ shihilɛ eje mitsine jeeŋmɔ.” Mɛni ye ebua lɛ? Akɛ lɛ bɔi Biblia lɛ kasemɔ, ni ekase akɛ esa akɛ esɔle, ní ekã he efee nakai. Steve wie akɛ: “Misɔleɔ kɛdaa Nyɔŋmɔ shi yɛ yelikɛbuamɔ ni minanemɛi ni misumɔɔ lɛ jɛɔ suɔmɔ mli amɛkɛhãa mi lɛ hewɔ.” Ekɛfata he akɛ: “Amrɔ nɛɛ, miyɛ miishɛɛ fe tsutsu lɛ.”

Ni Jenny, mɔ ni nu he akɛ esaaa mɔ ni Nyɔŋmɔ boɔ esɔlemɔi toi lɛ hu? Ewie akɛ, “Be ni minu he akɛ misaaa kwraa lɛ, mikpa Nyɔŋmɔ fai ni eye ebua mi ni manu nɔ hewɔ ni minuɔ he nakai lɛ shishi.” Mɛɛ gbɛ nɔ enɛ wa lɛ? Jenny kɛɛ, “Enɛ hã misusu nii ahe yɛ gbɛ kpakpa nɔ, ni mibana akɛ kɛ́ mitsui buɔ mi fɔ po lɛ, Nyɔŋmɔ ebuuu mi fɔ. Sɔlemɔ eye ebua mi hu koni miya nɔ mibɔ mihe mɔdɛŋ ni mikakpa.” Mɛni ejɛ mli kɛba? Ekɛɛ: “Sɔlemɔ ehã mina akɛ Yehowa yɛ lɛɛlɛŋ, esumɔɔ mi, ejwɛŋɔ mihe, eji mi-Tsɛ, kɛ mi-Naanyo, ni kɛ́ mitee nɔ mibɔ mihe mɔdɛŋ akɛ mafee nɔ ni esumɔɔ lɛ, ebaaye ebua mi.”

Yoo ko ni atsɛɔ lɛ Isabel lɛ niiashikpamɔ lɛ hu hãa wɔnaa sɛɛnamɔ ni yɔɔ sɔlemɔ he. Be ni ehiɛ hɔ lɛ, edatrɛfoi lɛ kɛɛ lɛ akɛ bi ni ebaafɔ lɛ baaje kpa waa. Enɛ kumɔ etsui. Mɛi komɛi po wo lɛ ŋaa akɛ efite musu lɛ. Ewie akɛ, “Bɔ ni mitsui ekumɔ lɛ sɔŋŋ hã minu he akɛ magbo.” Mɛni efee? Ekɛɛ, “Misɔle shii abɔ koni Nyɔŋmɔ awa mi.” Sɛɛ mli lɛ, efɔ binuu ni atsɛɔ lɛ Gerard, ni eje kpa. Ani Isabel nuɔ he akɛ Nyɔŋmɔ hã esɔlemɔi lɛ hetoo? Hɛɛ, enuɔ he nakai! Yɛ mɛɛ gbɛ nɔ? Ewie akɛ: “Amrɔ nɛɛ, mibinuu lɛ eye afii 14, ni kɛ́ mikwɛ bɔ ni eyɔɔ miishɛɛ yɛ kpa ni eje lɛ fɛɛ sɛɛ lɛ, minaa akɛ Yehowa ehã misɔlemɔi lɛ hetoo yɛ gbɛ ni fe fɛɛ nɔ, ni lɛ ji jɔɔmɔ ni fe fɛɛ ni Yehowa Nyɔŋmɔ kɛdro mi.”

Anɔkwa wiemɔi ni tamɔ nɛkɛ lɛ hãa nɔ ni lalatsɛ lɛ wie lɛ baa wɔjwɛŋmɔŋ, akɛ: “Bo Yehowa, obaabo mɛi ni he jɔ lɛ afaikpamɔ lɛ toi. Obaawaje amɛtsuii ni obaabo amɛ toi jogbaŋŋ.” (Lala 10:17) Yiŋtoi kpakpai ahewɔ ni esa akɛ wɔya nɔ wɔsɔle nɛ!

Aŋmala Yesu sɔlemɔi lɛ ateŋ babaoo yɛ Biblia lɛ mli. Ekã shi faŋŋ akɛ, nɔ ni ale waa ji nɔ ni etsɔɔ ekaselɔi lɛ. Mɛni wɔbaanyɛ wɔkase yɛ nakai sɔlemɔ lɛ mli?