YEHOWA ODASEFONYO ko ni yɔɔ Canada, ni atsɛɔ lɛ Don lɛ, bɔɔ mɔdɛŋ waa akɛ ekɛ mɛi ni wɔɔ gbɛjegbɛi ahe lɛ baagba sane. Ewie yɛ mɛi nɛɛ ateŋ mɔ kome ni atsɛɔ lɛ Peter lɛ he akɛ: “Mujiatsɛ ko kɛ nuu nɛɛ yeee egbɔ.” Etsa nɔ akɛ: “Ekpakpa ko dani mɛi nyɛɔ amɛbɛŋkɛɔ lɛ, ni mɛi fɛɛ ni baa emasɛi lɛ, eshwieɔ amɛ. Mɛi pii ka akɛ amɛbaajie mlihilɛ kpo amɛtsɔɔ lɛ, shi ekpɛlɛɛɛ.” Kɛ̃lɛ, Don to etsui shi ni etee nɔ ejie mlihilɛ kpo etsɔɔ nuu nɛɛ yɛ be kɛ beiaŋ, ni efee nakai aahu nɔ ni fe afii 14.

Gbi ko lɛ, Peter bi Don akɛ: “Mɛni hewɔ ogbaa ohe naa yɛ mihe? Mɔ fɛɛ mɔ shiɔ misane ehãa mi. Mɛni hewɔ misane kã otsui nɔ nɛkɛ?” Don jɛ hiɛshikamɔ mli ekɛ ŋmalɛi etɛ komɛi tsu nii koni eshɛ Peter tsui he. Klɛŋklɛŋ lɛ, ebi Peter kɛji ele akɛ Nyɔŋmɔ yɛ gbɛ́i, ni ehã ekane lɛ tɛ̃ɛ kɛjɛ Biblia mli yɛ Lala 83:19. No sɛɛ lɛ, Don hã Peter kane Romabii 10:13, 14 lɛ, koni ena nɔ hewɔ ni esusuɔ ehe lɛ. Nakai ŋmalɛ lɛ kɛɔ akɛ: “Mɔ fɛɛ mɔ ni boɔ tsɛɔ Yehowa gbɛ́i lɛ, abaahere eyiwala.” Naagbee lɛ, Don kane Mateo 9:36 lɛ, kɛkɛ ni ehã Peter hu kane ehã lɛ diɛŋtsɛ ehe. Jɛmɛ kɛɔ akɛ: “Be ni ena [ni ji Yesu na] asafoku lɛ, emusuŋ tsɔ lɛ yɛ amɛhewɔ ejaakɛ afee amɛ niseniianii, ni akpoo amɛ tamɔ gwantɛŋi ni bɛ kwɛlɔ.” Peter hiŋmɛiiaŋ tɛo nu, ni ebi Don akɛ: “Ani mifata gwantɛŋi nɛɛ ahe?”

Peter bɔi tsakemɔ fiofio. Eju ehe, esaa etsɛŋ he, ni ewo atadei kpakpai ni Don kɛhã lɛ lɛ. Peter tee nɔ ehiɛ ehe falefale.

Peter yɛ wolo ko ni eŋmalaa nibii ni yaa nɔ yɛ gbi lɛ mli lɛ yɛ mli. Nibii ni eŋmala yɛ wolo nɛɛ mli yɛ shishijee mli lɛ jeee nibii ni yɔɔ miishɛɛ. Shi nibii ni eŋmala sɛɛkpee lɛ yɛ srɔto. Akɛ nɔkwɛmɔnɔ lɛ, eŋma akɛ: “Ŋmɛnɛ lɛ, mibale Nyɔŋmɔ gbɛ́i. Bianɛ lɛ, kɛ́ miisɔle lɛ, manyɛ masɔle mahã Yehowa. Eŋɔɔ minaa waa akɛ mile egbɛ́i lɛ. Don kɛɛ manyɛ mikɛ Yehowa abɔ naanyo,  ejaakɛ ebaaná dekã ebo mi toi be fɛɛ be, ekɔɔɔ he eko be ni ji loo nɔ ni miyɔɔ lɛ kɛɛmɔ.”

Naagbee wiemɔi ni Peter ŋma yɛ ewolo lɛ mli lɛ, eŋma eyahã enyɛmimɛi lɛ. Ekɛɛ amɛ akɛ:

“Ŋmɛnɛ lɛ, mihe tseee mi. Efeɔ mi akɛ gbɔlɛ eta mihe agbɛnɛ. Shi kɛji migbo ŋmɛnɛ po lɛ, mile akɛ mana minaanyo [Don] ekoŋŋ yɛ Paradeiso lɛ mli. Kɛ́ wolo nɛɛ shɛ nyɛdɛŋ lɛ, belɛ etsɔɔ akɛ mije mli. Shi kɛji nyɛna gbɔ ko yɛ yara lɛ nɔ lɛ, nyɛkɛ lɛ agbaa sane, ni nyɛfainɛ, nyɛkanea wolo blu bibioo nɛɛ [wolo ni etsɔɔ nɛɛ ji wolo ko ni ahã lɛ afii abɔ nɛ ni yitso ji, “Anɔkwale ni Kɛ Mɔ Yaa Naanɔ Wala Mli Lɛ”]. * Wolo lɛ kɛɛ mana minaanyo lɛ ekoŋŋ yɛ Paradeiso. Miheɔ enɛ miyeɔ kɛ mitsui fɛɛ. Nyɛnyɛmi nuu ni nyɛsumɔɔ, Peter.”

Be ni agbe yara lɛ naa lɛ, Peter nyɛmi yoo Ummi wie akɛ: “Aaafee afii enyɔ ni eho nɛ lɛ, mikɛ Peter wie. Afii babaoo nɛ ni ebɛ miishɛɛ, shi nakai gbi lɛ, mina akɛ eyɛ miishɛɛ. Eŋmɔ fioo po.” Ummi kɛɛ Don akɛ: “Makane wolo lɛ, ejaakɛ kɛ́ wolo nɛɛ enyɛ etsake minyɛmi nuu lɛ, belɛ jeee wolo folo ko kɛkɛ ni.” Kɛfata he lɛ, ekpɛlɛ ni ato gbɛjianɔ koni Yehowa Odasefonyo ko kɛ lɛ abakase wolo ko ni afee etsɛko tsɔ ni yitso ji, Mɛni Biblia lɛ Tsɔɔ Diɛŋtsɛ? lɛ.

Esa akɛ wɔ hu wɔkwɛ nii kɛteke bɔ ni mɛi ji yɛ kponɔgbɛ lɛ, wɔjie suɔmɔ krɔŋŋ kpo, ni wɔto wɔtsui shi wɔhã gbɔmɛi srɔtoi fɛɛ. (1 Tim. 2:3, 4) Kɛ́ wɔfee nakai lɛ, wɔbaanyɛ wɔye wɔbua mɛi tamɔ Peter, ni ekolɛ yɛ gbɔmɛi ahiɛ lɛ, amɛjeee mɛi komɛi, shi yɛ Nyɔŋmɔ hiɛ lɛ, amɛyɔɔ tsui kpakpa lɛ. “Yehowa lɛ tsui ekwɛɔ,” no hewɔ lɛ wɔbaanyɛ wɔná nɔmimaa akɛ, ebaahã mɛi fɛɛ ni hiɛ su kpakpa lɛ amɔ anɔkwale lɛ mli.—1 Sam. 16:7; Yoh. 6:44.