“Anunyam ahã Nyɔŋmɔ yɛ ŋwɛi flooflo, ni toiŋjɔlɛ ahi mɛi ni yɔɔ ehiɛ dromɔ lɛ ateŋ yɛ shikpɔŋ lɛ nɔ.”​—Luka 2:14, Jeŋ Hee Shishitsɔɔmɔ.

 “Ajie Nyɔŋmɔ yi yɛ ŋwɛi! Toiŋjɔlɛ aba shikpɔŋ lɛ nɔ ahã mɔ fɛɛ mɔ ni feɔ nibii ni saa Nyɔŋmɔ hiɛ.”​—Luka 2:14, Contemporary English Version.

 Yijiemɔ wiemɔi nɛɛ ji wiemɔi ni ŋwɛibɔfoi komɛi jaje amɛtsɔɔ be ni afɔ Yesu lɛ, ni etsɔɔ akɛ mɛi ni heɔ Yesu nɔ amɛyeɔ lɛ baanyɛ aná Nyɔŋmɔ hiɛ dromɔ ni amɛtoiŋ ajɔ amɛ.

 “Anunyam ahã Nyɔŋmɔ yɛ ŋwɛi flooflo.” Wiemɔi nɛɛ ni ŋwɛibɔfoi lɛ wie lɛ tsɔɔ akɛ, amɛkpɛlɛɔ nɔ akɛ Nyɔŋmɔ ji mɔ ni sa akɛ, akɛ anunyam lɛ fɛɛ ahã. Wiemɔ nɛɛ tsɔɔ hu akɛ, Yesu fɔmɔ kɛ esɔɔmɔ nitsumɔ yɛ shikpɔŋ nɛɛ nɔ lɛ baahã awo Yehowa a Nyɔŋmɔ hiɛ nyam waa. Akɛ nɔkwɛmɔnɔ lɛ, Yesu kɛ yijiemɔ hã Nyɔŋmɔ be fɛɛ be yɛ nibii ni etsɔɔ lɛ he, ni eko ji, be ko ekɛɛ akɛ: “Nɔ ni mitsɔɔ lɛ, jeee minɔ ni, shi moŋ mɔ ni tsu mi lɛ nɔ ni.” (Yohane 7:16-18) Kɛ́ Yesu fee naakpɛɛ nii lɛ, bei pii lɛ mɛi ni naa lɛ ‘woɔ Nyɔŋmɔ hiɛ nyam.’ (Luka 5:18, 24-26; Yohane 5:19) Yesu gbele lɛ po hã awo Nyɔŋmɔ hiɛ nyam. Egbele lɛ gbele gbɛ koni Nyɔŋmɔ yiŋtoo ni nɔ bɛ lɛ aba mli, no ji akɛ, ebaahã jalɔi kɛ adesai ni sumɔɔ toiŋjɔlɛ ayi shikpɔŋ lɛ nɔ obɔ̃.​—1 Mose 1:28.

 “Toiŋjɔlɛ ahi . . . shikpɔŋ lɛ nɔ.” Toiŋjɔlɛ ni awieɔ he yɛ biɛ lɛ yaa shɔŋŋ fe ta kɛkɛ ni awuuu. Ekɔɔ toiŋjɔlɛ loo mɔ tsui ni nyɔɔ emli waa lɛ he, ni enɛ lɛ, mɛi ni Yehowa náa amɛhe miishɛɛ lɛ pɛ ni náa eko. Kɛtsɔ Yesu nɔ lɛ, adesai baanyɛ aná amɛkɛ Nyɔŋmɔ teŋ wekukpaa kpakpa ni baahã amɛná toiŋjɔlɛ nɛɛ eko. (Yakobo 4:8) Ni Yesu, ni ji Nyɔŋmɔ Maŋtsɛyeli lɛ nɔ Maŋtsɛ lɛ, baahã toiŋjɔlɛ akpele shikpɔŋ lɛ nɔ fɛɛ kɛya naanɔ.​—Lala 37:11; Luka 1:32, 33.

 “Mɛi ni yɔɔ ehiɛ dromɔ lɛ.” Wiemɔ nɛɛ kɔɔ mɛi ni yɔɔ Nyɔŋmɔ hiɛ dromɔ akɛni amɛheɔ lɛ kɛ Yesu, mɔ ni etsu lɛ lɛ nɔ amɛyeɔ lɛɛlɛŋ lɛ hewɔ lɛ he. Etsɔɔɔ akɛ Nyɔŋmɔ yɛ adesai fɛɛ ahe tsuijurɔ, ekɔɔɔ he eko sui ni amɛjieɔ lɛ kpo kɛ bɔ ni amɛfeɔ amɛnii amɛhãa; ni agbɛnɛ hu, etsɔɔɔ mɛi ahe tsuijurɔ ni adesai náa. Biblia shishitsɔɔmɔi komɛi, tamɔ Ga Biblia momo lɛ tsɔɔ wiemɔ nɛɛ shishi akɛ “aná gbɔmɛi ahe tsuijurɔ.” Kɛ̃lɛ, blema Greek wolokpoi ni akɛ niji ŋmala ni etsɛ waa, ni amuɔ afɔ̃ɔ nɔ lɛ fiɔ bɔ ni Jeŋ Hee Shishitsɔɔmɔ lɛ kɛ ŋmɛnɛŋmɛnɛ beiaŋ Biblia shishitsɔɔmɔ krokomɛi babaoo tsɔɔ wiemɔ nɛɛ shishi akɛ, toiŋjɔlɛ ahi mɛi ni Nyɔŋmɔ náa amɛhe miishɛɛ lɛ ateŋ lɛ sɛɛ.​—Kwɛmɔ “ Luka 2:14 Lɛ Yɛ Biblia Shishitsɔɔmɔi Krokomɛi Amli.”

 Luka yitso 2 lɛ wieɔ Yesu shihilɛ akɛ adesa, kɛjɛ efɔmɔ mli kɛ be ni edaa lɛ he. Be ni afɔ lɛ sɛɛ etsɛɛɛ nɔŋŋ lɛ, ŋwɛibɔfo ko jie ehe kpo etsɔɔ tookwɛlɔi komɛi ni ‘eshi amɛshĩa amɛyahi ŋa nɔ, ni amɛmiibu amɛtookui ahe nyɔɔŋ lɛ.’ b (Luka 2:4-8) Ŋwɛibɔfo lɛ jaje “sane kpakpa ni baahã mɛi fɛɛ aná miishɛɛ babaoo” lɛ etsɔɔ tookwɛlɔi lɛ akɛ: “Ŋmɛnɛ lɛ afɔ yiwalaherelɔ ko, ni ji Kristo, Nuŋtsɔ lɛ, yɛ David maŋ lɛ mli ahã nyɛ.” (Luka 2:9-11) Etsɔɔ tookwɛlɔi lɛ he ni amɛbaana abifao lɛ yɛ, ni no sɛɛ lɛ amɛna ŋwɛibɔfoi babaoo ni miijie Nyɔŋmɔ yi. Be ni tookwɛlɔi lɛ yashɛ Betlehem lɛ, amɛna Maria kɛ Yosef kɛ abifao Yesu lɛ. (Luka 2:12-16) Be ni tookwɛlɔi lɛ gba nibii ni yɔɔ naakpɛɛ ni amɛna lɛ, amɛku amɛsɛɛ amɛyakwɛ amɛtoi lɛ, ni amɛtee nɔ ‘amɛwo Nyɔŋmɔ hiɛ nyam ni amɛjie eyi yɛ nibii fɛɛ ni amɛnu ni amɛna lɛ hewɔ.’​—Luka 2:17-20.

 “Anunyam ahã Nyɔŋmɔ yɛ ŋwɛi flooflo, ni toiŋjɔlɛ aba shikpɔŋ lɛ nɔ ahã mɛi ni ehiɛ dromɔ yɔɔ amɛnɔ lɛ.”​—Luka 2:14, New International Version.

 “Anunyam ahã Nyɔŋmɔ yɛ ŋwɛi flooflo, ni toiŋjɔlɛ aba shikpɔŋ lɛ nɔ ahã mɛi ni enáa amɛhe miishɛɛ lɛ!”​—Luka 2:14, Good News Translation.

 “Anunyam ahã Nyɔŋmɔ yɛ ŋwɛi flooflo, ni yɛ shikpɔŋ lɛ nɔ lɛ, toiŋjɔlɛ ahi mɛi ni enáa amɛhe miishɛɛ lɛ ateŋ!”​—Luka 2:14, English Standard Version.

 Kwɛmɔ Luka wolo lɛ hiɛkpamɔ vidio kuku nɛɛ.