“Nyɛfea diŋŋ, ni nyɛnáa nyɛlea akɛ miji Nyɔŋmɔ. Abaawó minɔ gojoo yɛ jeŋmaji lɛ ateŋ; Abaawó minɔ gojoo yɛ shikpɔŋ lɛ nɔ.”​—Lala 46:10, Jeŋ Hee Shishitsɔɔmɔ.

 “Nyɛfea dioo, ni nyɛnáa nyɛlea akɛ miji Nyɔŋmɔ: aaawó minɔ gojoo yɛ jeŋmaji lɛ ateŋ; Abaawó minɔ gojoo yɛ shikpɔŋ lɛ nɔ.”​—Lala 46:10, King James Version, Ga Biblia momo.

 Nyɔŋmɔ biɔ ni mɔ fɛɛ mɔ ajá lɛ, ni amɛyɔse hegbɛ ni eyɔɔ akɛ mɔ ni sa akɛ eyeɔ je lɛ nɔ lɛ. Anyɛŋ aje hewalɛ kɛ nɔyeli hegbɛ ni eyɔɔ lɛ he ŋwane, eji anɔkwa sane ni esa akɛ mɔ fɛɛ mɔ ni miisumɔ ni ehi shi kɛya naanɔ lɛ akpɛlɛ nɔ.​—Kpojiemɔ 4:11.

 “Nyɛfea diŋŋ, ni nyɛnáa nyɛlea akɛ miji Nyɔŋmɔ.” Biblia shishitsɔɔmɔi komɛi tsɔɔ ŋmalɛ nɛɛ klɛŋklɛŋ fã lɛ shishi akɛ “nyɛfea dioo.” Enɛ ehã mɛi ebaná susumɔ ni ejaaa akɛ, Nyɔŋmɔ miifã amɛ ni kɛ́ amɛtee jamɔhe loo sɔlemɔ lɛ amɛkawie. Shi Hebri wiemɔ ni atsɔɔ shishi akɛ “nyɛfea diŋŋ, ni nyɛnáa nyɛlea akɛ miji Nyɔŋmɔ” lɛ tsɔɔ akɛ, Yehowa a Nyɔŋmɔ diɛŋtsɛ miibi ni adesai fɛɛ akpa shi ni amɛteɔ amɛwoɔ lɛ lɛ, ni amɛyɔse akɛ lɛ pɛ ji mɔ ni esa akɛ ajá.

 Wɔnaa ŋaawoo ni tamɔ nɛkɛ nɔŋŋ yɛ Lala 2 lɛ mli. Nyɔŋmɔ wo shi yɛ jɛmɛ akɛ ebaakpãta mɛi ni teɔ shi amɛwoɔ lɛ lɛ ahiɛ. Nɔ ni tamɔɔɔ nakai lɛ, mɛi ni yɔseɔ hegbɛ ni Nyɔŋmɔ yɔɔ lɛ kɛ amɛhiɛ fɔ̃ɔ enɔ kɛhã gbɛtsɔɔmɔ, nyɛmɔ, kɛ hiɛshikamɔ. “Mɛi fɛɛ ni baa lɛ abo lɛ” nuɔ he akɛ amɛyɛ miishɛɛ kɛ shweshweeshwe, titri lɛ, kɛ́ amɛkɛ jaramɔ shihilɛ miikpe.​—Lala 2:9-12.

 “Abaawó minɔ gojoo yɛ jeŋmaji lɛ ateŋ; abaawó minɔ gojoo yɛ shikpɔŋ lɛ nɔ.” Yɛ blema lɛ, awó Yehowa Nyɔŋmɔ nɔ gojoo be ni ekɛ ehewalɛ kpele lɛ tsu nii kɛbu ewebii lɛ ahe lɛ. (2 Mose 15:1-3) Wɔsɛɛ lɛ, abaawó enɔ gojoo kwraa fe nɛkɛ, nakai beiaŋ lɛ mɔ fɛɛ mɔ ni baahi shikpɔŋ lɛ nɔ lɛ baaŋɔ ehe ewo Yehowa shishi, ni ejá lɛ.​—Lala 86:9, 10; Yesaia 2:11.

 Wolo ko tsɛ Lala 46 lɛ akɛ “lala ni akɛjieɔ hewalɛ ni Nyɔŋmɔ yɔɔ yi, eji ewebii lɛ ahefalɔ kpele.” Wiemɔi ni Nyɔŋmɔ webii lɛ kɛtsu nii be ni amɛláa Lala 46 lɛ tsɔɔ akɛ, amɛyɛ hekɛnɔfɔ̃ɔ akɛ Yehowa baabu amɛhe ni ebaaye ebua amɛ. (Lala 46:1, 2) Nakai wiemɔi lɛ kai amɛ akɛ Yehowa kɛ amɛ yɛ be fɛɛ be.​—Lala 46:7, 11.

 Lala lɛ mli wiemɔi lɛ bi koni amɛjwɛŋ Nyɔŋmɔ naakpɛɛ nitsumɔi lɛ anɔ bɔ ni afee ni no awaje hekɛnɔfɔ̃ɔ ni amɛyɔɔ akɛ Yehowa Nyɔŋmɔ yɛ hewalɛ ni ekɛbaabu amɛhe lɛ. (Lala 46:8) Titri lɛ, egbala amɛjwɛŋmɔ kɛtee nyɛmɔ ni Yehowa yɔɔ ni ekɛfoɔ tai asɛɛ lɛ nɔ. (Lala 46:9) Yɛ gbɛ ko nɔ lɛ, yɛ Biblia beiaŋ lɛ, Yehowa fo tai asɛɛ kɛbu ewebii lɛ ahe kɛje amɛhenyɛlɔi lɛ ahe. Biblia lɛ ewo shi akɛ etsɛŋ Nyɔŋmɔ baafee nɔ ni fe nakai po; ebaafo tai fɛɛ ni yaa nɔ yɛ je nɛɛ mli lɛ asɛɛ.​—Yesaia 2:4.

 Ani Yehowa kã he eeye eebua ewebii ni jáa lɛ ŋmɛnɛ lɛ? Hɛɛ. Anɔkwa, bɔfo Paulo wo Kristofoi hewalɛ waa ni amɛkɛ amɛhiɛ afɔ̃ Yehowa nɔ kɛhã yelikɛbuamɔ. (Hebribii 13:6) Lala 46 lɛ mli saji lɛ wajeɔ hekɛnɔfɔ̃ɔ ni wɔyɔɔ akɛ Nyɔŋmɔ kɛ ehewalɛ lɛ buɔ wɔhe lɛ. Lala nɛɛ mli wiemɔi lɛ yeɔ ebuaa wɔ ni wɔnaa Nyɔŋmɔ akɛ “wɔbobaahe kɛ wɔhewalɛ.”​—Lala 46:1.

 Kwɛmɔ Lalai awolo lɛ hiɛkpamɔ vidio kuku nɛɛ.