Ni soli iloloma vei keda e dua e vakaitutu se dua eda dau doka, eda na vakamareqeta na iloloma qori. Eso tale na iloloma me vaka na ilavo, ke lailai mada ga, eda na vakamareqeta tale ga ke solia e dua na wekada se itokani voleka. E via va toka qori na iloloma i Russell eda sa raica oti ena ulutaga sa oti. E tautauvata vakacava na iloloma i Russell kei na isoro ni veivoli?

E tukuna na iVolatabu “ni tala mai vuravura na Kalou na Luvena e duabau ga e vakatubura, meda vakabulai kina ena vukuna.” (1 Joni 4:9) Qori na vuna e talei kina na isoro ni veivoli. E sega ni dua e cecere vua na Kalou ena veiliutaki. E kaya kina na daunisame: “O kemuni, na yacamuni ga o Jiova, o kemuni ga oni Cecere Duadua e vuravura taucoko.” (Same 83:18) O Jiova ga e rawa ni solia e dua na iloloma talei me vaka na ivoli.

E kaya tale ga na iVolatabu ni ‘Tamada’ na Kalou. (Aisea 63:16) E rawa nida tukuna qori ni a buli keda. E dau karoni keda me vaka ga na nona karoni ira na luvena e dua na tama. E kaya na Kalou me baleti ira na nona tamata na Ifireimi: “E sega ni noqu gonenitoko o Ifireimi, na gone au dau lomana? . . . Oya na vuna e yavala kina na lomaqu ena vukuna. Au na lomani koya sara ga.” (Jeremaia 31:20) E va tale ga qori na rai i Jiova me baleti ira na nona tamata nikua. Ni cecere na Dauveibuli, e Tamada qai noda iTokani, e macala ga nida na vakamareqeta na iloloma e vakarautaka.

Era talei eso na iloloma ni donu na inaki e soli kina, e vu sara ga mai lomana e dua na ka e solia qai caka ena dela ni loloma. O koya e dau lomasoli ena sega ni namaka me saumi vua na ka e solia.

Na nona soli Luvena na Kalou e vakaraitaka ni lomani keda. E kaya na iVolatabu: “E kilai na loloma ni Kalou ena ka e yacovi keda ni tala mai . . . na Kalou na Luvena e duabau ga e vakatubura.” Na vuna? “Meda vakabulai kina ena vukuna.” (1 Joni 4:9) Vakacava e dodonu me cakava qori na Kalou? Sega! “Na ivoli i Karisito Jisu” e ivakaraitaki ni “loloma soli wale” ni Kalou.—Roma 3:24.

Na cava e tukuni kina ni nona iloloma na Kalou e ivakaraitaki ni “loloma soli wale”? E kaya na iVolatabu: “E vakaraitaka na Kalou na nona lomani keda ni mai mate na Karisito ena vukuda nida se ivalavala ca tu.” (Roma 5:8) Dua na ituvaki vakaloloma eda tu kina na tamata ivalavala ca, na loloma sa qai uqeta na Kalou me cakava e dua na ka. E sega ni ganiti keda na loloma ni Kalou, eda sega tale ga ni rawa ni sauma lesu. Qori na vuna e tukuni kina ni ka e cakava ena vukuda na Kalou e ivakaraitaki uasivi duadua ni loloma.

Era talei eso na iloloma ena vuku ni veika era vakuai ira kina o ira na vakarautaka. Eda na vakamareqeta na iloloma nida vakasamataka nona sasaga o koya e vakarautaka kei na veika e vakuai koya kina.

E “solia . . .na Luvena e duabau ga” na Kalou. (Joni 3:16) Eda qoroya na yalo ni vakuai koya e vakaraitaka na Kalou me solia na Luvena e vakamareqeta vakalevu. A veivuke o Jisu ena buli ni lomalagi kei na vuravura, qai dau ‘taleitaki koya vakalevu’ na Kalou. (Vosa Vakaibalebale 8:30) O Jisu e “iyaloyalo ni Kalou tawaraici,” e “Luvena lomani” tale ga. (Kolosa 1:13-15) E sega ni vakatauvatani rawa na nodrau veivolekati o Jiova kei Jisu.

Ia e ‘sega ni bureitaki Luvena’ na Kalou. (Roma 8:32) E solia vei keda na ka vinaka duadua ni solia sara ga mai na ka e vakamareqeti duadua vua.

E talei eso tale na iloloma ni soli sara ga ena gauna e gadrevi tu kina. Kena ivakaraitaki, kaya mada e tukuni mo qaravi vakavuniwai ke o via bula. Ia o sega ni sauma rawa na veiqaravi me caka vei iko, e mani lomasoli e dua me sauma ena vukumu. E macala ga ni o na vakavinavinakataki koya sara ga e lomasoli me vukei iko, o na vakamareqeta tale ga na nona iloloma.

“Era mate tiko na tamata kece ena vuku i Atama, ena bula vaka kina na tamata kece ena vuku i Karisito.” (1 Korinica 15:22) Nida kawa i Atama, eda sega ni galala mai na ivalavala ca, tauvimate kei na mate. Eda vinakata na veivuke meda veiyaloni kina kei na Kalou. E sega tale ga ni rawa meda ‘vakabulai’ keda se dua tale. E tukuna na iVolatabu: “E sega ni bau dua vei ira e rawa ni volia lesu na tacina se solia vua na Kalou na kena ivoli, . . . era na sega tu ga . . . ni rawata.” (Same 49:7, 8) Eda vinakata dina na veivuke nida sega ni solia rawa na keda ivoli, eda sega ni rawa ni vakabulai keda ga.

Ena ivakaraitaki ni veiqaravi vakavuniwai eda sa raica oti mai, e vaka ga e sauma o Jiova na “veiqaravi” e gadrevi meda bula kina ni lomani keda vakalevu. Ena vuku gona i Jisu eda na rawata “kece kina na bula.” E yaga vakacava na ivoli? “E vakasavasavataki keda mai na noda ivalavala ca kece na dra i Jisu,  na Luvena.” Io, ena vosoti noda ivalavala ca da qai rawa ni bula tawamudu ena vuku ni dra vakadavei i Jisu. (1 Joni 1:7; 5:13) Ena yaga vakacava na ivoli vei ira na mate? “Ni vakavuna na mate e dua na tamata, na nodra vakaturi tale ga na mate e rawati ena vuku ni dua na tamata [o Jisu].”—1 Korinica 15:21. *

Na cava e rawa ni tukuni me baleta na isoro i Jisu? O Jiova ga e rawa ni vakarautaka na iloloma talei qori ni Cecere Duadua, qai yavutaki ena levu ni nona lomani keda. E sega ni vakatauvatani rawa na levu ni ka e cakava na Kalou o Jiova ena vukuda. E sega tale ni dua na iloloma e talei me vaka na isoro, ni na sereki keda mai na ivalavala ca kei na mate. Io, e iloloma uasivi duadua na isoro ni veivoli i Jisu.