E Rawa Vakacava ni “Kedra iVoli e le Levu” na iSoro i Jisu?

SARAVA/ROGOCA

Kena isau vakaivolatabu

E vakayagataka na Kalou na isoro i Jisu me vakabulai kina na kawatamata mai na ivalavala ca, kei na mate. E kaya na iVolatabu ni veivoli lesu na dra vakadavei i Jisu. (Efeso 1:7; 1 Pita 1:18, 19) Sa rauta me tukuna o Jisu ni “solia na nona bula me kedra ivoli e levu.”—Maciu 20:28, King James Version.

Cava me dua kina na “kedra ivoli e le levu”?

A buli o Atama me uasivi, e rawa tale ga ni bula tawamudu. Ia a kau tani kece vua qori ni talaidredre vua na Kalou. (Vakatekivu 3:17-19) A vakadewa vei ira na luvena na ivalavala ca. (Roma 5:12) Sa rauta me kaya na iVolatabu ni “volitaki” koya, kei ira na nona kawa ina ivalavala ca kei na mate. (Roma 7:14) E sega ni dua na nona kawa e rawa ni volia lesu na ka e vakayalia o Atama nira ivalavala ca kece.—Same 49:7, 8.

E lomani ira na kawa i Atama na Kalou ena ituvaki vakaloloma era tu kina. (Joni 3:16) Ia ni Kalou lewadodonu, e vinakata me dua na yavu vinaka ni nona vosota na ivalavala ca. (Same 89:14; Roma 3:23-26) Nona lomana na kawatamata e uqeti koya me vakarautaka na yavu me vosoti, qai vakaoti kina vakadua na ivalavala ca. (Roma 5:6-8) Na yavu e vakarautaki qori na ivoli.

E rawa ni vakamacalataki vakacava na ivoli?

E tolu na ka e kilai me baleta na “ivoli” e cavuti ena iVolatabu:

E isau ni dua na ka.—Tiko Voli Mai na Lekutu 3:46, 47.
E veisereki.—Lako Yani 21:30.
E veirauti vinaka kei na ka e vakayali. a

Raica mada se vakaibalebaletaki vakacava e tolu na tikina qori ina isoro ni veivoli i Jisu Karisito.

iSau ni dua na ka. E kaya na iVolatabu nira “voli ena isau levu” na lotu vaKarisito. (1 Korinica 6:20; 7:23) Na kedra isau na dra i Jisu, a “voli ira kina na tamata me nona na Kalou mai na yavusa kece, na vosa kece, na matatamata kece, kei na matanitu kece.”—Vakatakila 5:8, 9.
Veisereki. E rawa ni ‘veisereki na ivoli’ mai na ivalavala ca ena vuku ni isoro i Jisu.—1 Korinica 1:30; Kolosa 1:14; Iperiu 9:15.
Veirauti vinaka. Na isoro i Jisu e veirauti vinaka kei na bula uasivi a vakayalia o Atama. (1 Korinica 15:21, 22, 45, 46) E kaya na iVolatabu: “Ena nona talaidredre gona e dua ga na tamata [Atama] e okati kina e levu mera ivalavala ca, ia na nona talairawarawa e dua ga na tamata [Jisu Karisito] era na okati kina e levu mera yalododonu.” (Roma 5:19) E rawa gona nida kaya ni nona mate e dua e saumi kina na kedra ivoli e levu na tamata ivalavala ca. Io na isoro i Jisu e kedra “ivoli veirauti na tamata kece” me yaga vei ira yadua era vakabauta.—1 Timoci 2:5, 6.

a Ena iVolatabu ni vakadewataki na vosa taumada “ivoli” e tiko kina na vakasama ni isau, se na ka e soli me saumi kina e dua na ka. Kena ivakaraitaki, na vu vakaIperiu na ka·pharʼ, e kena ibalebale, “ubia.” (Vakatekivu 6:14) E dau vakaibalebaletaki ena kena ubi na ivalavala ca. (Same 65:3) E tautauvata qori kei na koʼpher, e vakaibalebaletaka na isau e saumi me ubi kina se sereki. (Lako Yani 21:30) Na vosa vaKirisi tale ga na lyʼtron, e vakadewataki me “ivoli,” rawa ni kena ibalebale tale ga “isau ni veisereki.” (Maciu 20:28; The New Testament in Modern Speech, by R. F. Weymouth) Era vakaibalebaletaka na dauvolavola e Kirisi na vosa qori, ina kena saumi na kaivesu me sere, se sereki kina e dua na bobula.