iMatai ni Joni 5:1-21
5 E luve ni Kalou o koya yadua e vakabauta ni o Jisu na Karisito,+ o koya tale ga e lomana na Kalou e lomani ira na luve ni Kalou.
2 Ena vuku ni tikina qo eda kila kina nida lomani ira tiko na luve ni Kalou,+ ena noda lomana tiko na Kalou da qai muria na nona ivunau.
3 Qo na ibalebale ni noda lomana na Kalou, meda muria na nona ivunau,+ ia e sega ni icolacola bibi na nona ivunau,+
4 ni o ira kece na luve ni Kalou era vakamalumalumutaki vuravura.+ Ena noda qaqa qo eda sa vakamalumalumutaki vuravura kina, oya na noda vakabauta.+
5 O cei e vakamalumalumutaki vuravura,+ o koya ga e vakabauta ni o Jisu na Luve ni Kalou?+
6 Qo o koya e lako mai ena wai kei na dra, o Jisu Karisito, e sega ni wai wale ga,+ ia ena wai kei na dra.+ E ivakadinadina ni ka qo na yalo tabu,+ ni dau vakaraitaka na dina na yalo tabu.
7 E tolu na ivakadinadina,
8 na yalo tabu,+ na wai,+ kei na dra,+ eratou duavata na tolu qo.
9 Ke da ciqoma na ivakadinadina e solia na tamata, sa qai uasivi sara na ivakadinadina e solia na Kalou ni nona ivakadinadina na Kalou e baleti Luvena.
10 O koya e vakabauta na Luve ni Kalou, e vakabauta na ivakadinadina e soli vua. O koya e sega ni vakabauta na Kalou e lasulasu,+ ni sega ni vakabauta na ivakadinadina e soli, na ivakadinadina a solia na Kalou me baleti Luvena.
11 Qo na ivakadinadina ni solia vei keda na Kalou na bula tawamudu,+ ia na bula qo e tu vei Luvena.+
12 O koya e tu vua na Luvena sa tu vei koya na bula qo, o koya e sega ni tu vua na Luve ni Kalou e sega vei koya na bula qo.+
13 Au vola vei kemuni na ka kece qo moni kila kina ni oni taukena na bula tawamudu+ o kemuni oni vakabauta na yaca ni Luve ni Kalou.+
14 Ena levu ni noda nuitaki koya,+ eda kila se cava ga eda kerea me salavata kei na lomana, ena rogoci keda o koya.+
15 Kena ikuri, ke da kila ni dau rogoca na cava ga eda kerea vua, eda kila nida na rawata na ka eda kerea vua.+
16 Ke dua e raica ni vakayacora o tacina e dua na ivalavala ca e sega ni tini ena mate, ena masulaki koya, qai vakabulai koya na Kalou,+ io, vei ira na sega ni vakayacora na ivalavala ca e tini ena mate. E tiko na ivalavala ca e tini ena mate.+ Au sega ni kaya me masulaka o koya na ivalavala ca qori.
17 Na ka kece e sega ni dodonu e ivalavala ca,+ ia e tiko na ivalavala ca e sega ni tini ena mate.
18 Eda kila ni sega ni valavala ca tiko ga o koya yadua e luve ni Kalou, ni vakaraici koya tiko mai na Luve ni Kalou, ena sega ni tarai koya kina na vunica.+
19 Eda kila ni taukeni keda na Kalou, ia e lewa tiko na vunica na vuravura taucoko.+
20 Eda kila ni sa lako mai na Luve ni Kalou,+ sa solia vei keda na yalomatua meda kila kina na ka e baleti koya na Kalou dina. Eda duavata kei na Kalou dina+ ena vuku i Luvena, o Jisu Karisito. Qo ga na Kalou dina, na ivurevure ni bula tawamudu.+
21 Ragone, ni qarauna na qaravi matakau.+
