NSƐM A MBABUN BISA
Nantsew A Odzi Awar Enyim—Ɔfa 1: Maso Dɛ Mefa Boy Anaa Girl Anaa?
Dza yɛrebɛka ho asɛm
Ebɛnadze nye nantsew a odzi awar enyim?
Binom bu nantsew a odzi awar enyim dɛ biribi a wɔdze gyegye hɔn enyi ara kɛkɛ. Naaso, nantsew a odzi awar enyim a yɛrebɛka ho asɛm yi yɛ ber tsentsen a nyimpa beenu bi dze nantsew hwɛ dɛ wobotum awar anaa. Dɛm ntsi, ɔnnsɛ dɛ obi fa boy anaa girl osiandɛ ɔyɛ no fɛw ara kɛkɛ ntsi, na mbom ɔsɛ dɛ ohu dɛm nantsew no dɛ okowie awar mu.
Sɛ nyimpa beenu bi pɛ hɔnho na wɔhyɛ ase dɛ wɔrenantsew a, ɔsɛ dɛ dɛm nantsew no boa hɔn ma wohu dɛ wɔfata dɛ wɔwar anaa wɔmmfata. Ntsi sɛ enye obi rutu dɛm anamɔn yi a, hwɛ kwan dɛ obotum ekowie awar mu anaadɛ obotum aba ewiei ma obi eesu.
Asɛm no korakora nye dɛ: Sɛ ennyɛɛ krado dɛ ebɔwar a, nna ɔno mma mmfa boy anaa girl.
Sɛ obi nnyɛɛ n’adwen dɛ ɔbɔwar na ɔfa boy anaa girl a, ɔtse dɛ obi a ɔrokɔhwehwɛ edwuma, na noara nyim dɛ sɛ wɔfa no mpo a, ɔrennyɛ
Ehwɛ a, aso dɛ efa boy anaa girl?
Nantsew a odzi awar enyim botum ekowie awar mu. Dɛm ntsi, ansaana ibotu anamɔn a ɔtse dɛm no, ɔsɛ dɛ ibisa woho dɛ, ‘Mara mo suban tse dɛn?’ Ɔwodze ma yensusu dza odzidzi do yi ho nhwɛ:
Mbrɛ enye w’ebusua dzi. Mpɛn pii no, mbrɛ osi ma enye w’awofo nye wo nuanom dzi no—nkanka aber a biribi ahyɛ wo do no—botum akyerɛ kwan a enye wo hokafo so bedzi.
Bible mu afotusɛm: ‘Hom nyi ɔtan biara, nye akomabɔn, nye ebufuw, nye nkekamu, nye ebususɛm, nye biribiara a ɔnnyɛ papa mfi hom nkyɛn.’—Ephesusfo 4:31.
Bisa woho dɛ: ‘M’awofo anaa mo nuanom botum aka dɛ mubu hɔn anaa? Sɛ ɔkɛba dɛ menye hɔn mu bi nnyɛ adwen wɔ asɛm bi ho a, menye hɔn kasa bɔkɔɔ anaa mo bu fuw na menye hɔn yiyi nsɛm ano?’
Sɛ akasakasa bi ba enye w’awofo ntamu na inntum nnsiesie a, ebɛnadze na ɔkyerɛ dɛ daakye sɛ akasakasa ba ɔwo na wo hokafo ntamu a, ibotum esiesie?
Fa ndzɛmba bɔ afɔr. Sɛ ewar a, no ho behia dɛ isusu dza wo hokafo pɛ no ho, na mpɛn pii no, ɔsɛ dɛ edze ndzɛmba bi bɔ afɔr ma no.
Bible mu afotusɛm: “Mma obiara nnhwehwɛ nankasa nedze, na mbom ɔnhwehwɛ ne nyɛnko dze.”—1 Corinthfo 10:24.
Bisa woho dɛ: ‘Sɛ afofor kyerɛ hɔn adwen a, megye to mu anaa dza mususu dɛ oye no nkotsee na meyɛ? Nkorɔfo hu me dɛ metse asɛm ase anaa? Ebɛn ndzɛmba na meyɛ dze kyerɛ dɛ monndwen mankotsee moho?’
Brɛ woho adze. Obi a ɔgye no mfom to mu na ofi n’akoma mu pa kyɛw no, obotum ayɛ okun pa anaa ɔyer pa.
Bible mu afotusɛm: “Hɛn nyina yɛfom ndzɛmba pii mu.”—James 3:2.
Bisa woho dɛ: ‘Megye mo mfom to mu, anaadɛ medze nsɛm yiyi moho ano? Sɛ wotu me fo wɔ mo suban bi ho a, megye to mu anaa mo bo fuw?’
Sikasɛm. Ndzɛmba a ɔdze akasakasa ba awar mu no, no mu kor nye sikasɛm. Ntsi sɛ obi tum hwɛ ne sikasɛm yie a, sika rennkɛfa akasakasa biara mmba n’awar mu.
Bible mu afotusɛm: “Na hom mu woana, na ɔpɛ dɛ ɔtow abantsentsen, na onndzi kan nntsena ase, na ommbu ho nkontaa, dɛ ɔwɔ dza ɔdze botum ewie anaa?”—Luke 14:28.
Bisa woho dɛ: ‘Mepɛ atotɔatotɔ, na meyɛ obi a da biara nna medze kaw anaa? Ebɛnadze na meyɛ dze kyerɛ dɛ mohwɛ me sikasɛm do yie?’
Enye Jehovah ntamu ebusuabɔ. Sɛ eyɛ Jehovah Dasefo a, ɔsɛ dɛ inya nhyehyɛɛ a edze sua Bible no da biara, na ekɔ asafo nhyiamu.
Bible mu afotusɛm: ‘Enyigye nye hɔn a wohu dɛ wohia Nyankopɔn n’akwankyerɛ.’—Matthew 5:3, NWT.
Bisa woho dɛ: ‘Meyɛ ndzɛmba a ɔbɛma me gyedzi akɔ do ayɛ dzen? Ndzɛmba a meyɛ wɔ Jehovah no som mu no, ɔno na no ho hia me paa wɔ asetsena mu, anaa mema kwan ma ndzɛmba afofor bi twetwe m’adwen?’
Asɛm no korakora nye dɛ: Obiara pɛ dɛ daakye ɔwar obi a no suban yɛ fɛw. Ntsi sɛ eda suban papa edzi aber a ennwaree yi a, ibenya obi a ɔno so no suban yɛ fɛw aawar.
