Nyew, osiandɛ Nyankopɔn pɛ dɛ nkorɔfo hyia mu som no. Bible no ka dɛ: “Hom mma yɛndwendwen hɛnho do, nnunu hɛnho nkɔ dɔ nye ndwuma pa mu; hɛn werɛ mmfir hɛnho ehyiadzi.”​—Hebrewfo 10:24, 25.

 Jesus kyerɛɛ dɛ n’ekyirdzifo bɔbɔ mu ayɛ ɔsom kuw kor. Ɔkaa kyerɛɛ hɔn dɛ: “Ɔnam yi do na nyimpa nyina bohu dɛ hom yɛ m’esuafo, sɛ hom wɔ ɔdɔ wɔ homho nkorkor a.” (John 13:35) Ɔkwan tsitsir a nna Christ n’ekyirdzifo no bɛfa do ada dɛm ɔdɔ yi edzi nye dɛ wɔnye hɔn mfɛfo agyedzifo behyia mu. Nna wɔbɛhyehyɛ hɔn dɛ asafo a ber nyina wobehyia mu asom Nyankopɔn. (1 Corinthfo 16:19) Wɔbɛka abɔ mu dɛ enuanom wɔ wiadze nyina.​—1 Peter 2:​17.

Sɛ edze woho bɔ nyamesom kuw bi a, ɔnnkyerɛ dɛ ɔnoara nye no

 Ɔwɔ mu dɛ Bible no ka dɛ ɔsɛ dɛ nkorɔfo hyia mu som Nyankopɔn dze, naaso ɔnnkyerɛ dɛ sɛ obi dze noho bɔ nyamesom kuw bi pɛ ara a, nna Nyankopɔn agye no ato mu. Sɛ Nyankopɔn bɛgye nyimpa no ato mu a, gyedɛ ɔdze dza orusua no bɔ ne bra. Dɛ nhwɛdo no, Bible no ka dɛ: “Nyamesom a ho tsew na ho nnyi fi wɔ hɛn Egya Nyankopɔn, enyim nye dɛ, ebɔhwɛ ngyanka nye ekunafo wɔ hɔn ahohia mu, na eyi woho efi wiadze nkekaa mu.”​—James 1:​27.