Ebɛnadze Nye Enuma?
Mbuae a Bible no dze ma
Enuma kyerɛ dɛ wɔdze obi ne nyimpadua nyina bɛhyɛ nsu mu na woeeyi no epue. a Iyi ntsi na wonumaa Jesus wɔ esutsen kɛse mu no. (Matthew 3:13, 16) Dɛmara so na aber a Ethiopianyi ɔbarimba no nye Philip nam na wodur “nsu bi” ho no, ɔkaa kyerɛɛ Philip dɛ onnuma no.—Asomafo Ndwuma 8:36-40.
Dza enuma kyerɛ
Bible no dze enuma toto efunsie ho. (Romefo 6:4; Colossaefo 2:12) Nsu mu enuma yɛ asɛnkyerɛdze a ɔkyerɛ dɛ obi ewu ama ne kan abrabɔ, na ɔrehyɛ abrabɔ fofor ase dɛ Christiannyi a oehyira no nkwa ama Nyankopɔn. Dɛm ntsi, enuma na anamɔn a obi tu ansaana oeenuma no yɛ nhyehyɛɛ a Nyankopɔn ayɛ a ɔma obi nya tsibowa pa dze nam Christ Jesus n’afɔrbɔ mu gyedzi do. (1 Peter 3:21) Iyi ntsi, Jesus kaa dɛ ɔwɔ dɛ wonuma n’ekyirdzifo.—Matthew 28:19, 20.
Ana nsu mu enuma hohor bɔn?
Oho. Bible no ka dɛ Jesus Christ no bɔgyaa a wohue gui no nkotsee na ɔtsew hɛnho fi hɛn bɔn ho. (Romefo 5:8, 9; 1 John 1:7) Sɛ obi botum enya Jesus n’afɔrbɔ no do mfaso a, ɔwɔ dɛ onya Jesus no mu gyedzi, ɔsesa n’abrabɔ na ɔdze Jesus ne nkyerɛkyerɛ bɔ ne bra, na ɔma wonuma no.—Asomafo Ndwuma 2:38; 3:19.
Aso Bible no kyerɛkyerɛ dɛ ɔsɛ dɛ wonuma nkɔkowaba?
Oho, ɔnnkyerɛkyerɛ dɛm koraa. Bible no nnka nkɔkowaba a wonuma hɔn no ho asɛm. Asɔrasɔr ahorow bi na wohyia mu “numa” akɔkowaba bi (wɔdze nsu petsepetse akɔkowaba no ne tsir do anaa wohue nsu gu ne tsir do) na wowie a nna wɔato no dzin. Obi a oenyin na obotum atse “Nyankopɔn ahenman . . . ho nsɛmpa” no ase na oeenya mu gyedzi no nkotsee na ɔsɛ dɛ wonuma no ma ɔbɛyɛ Christiannyi. (Asomafo Ndwuma 8:12) Sɛ obi tse Nyankopɔn asɛm, ɔgye to mu, na ɔsesa n’abrabɔ a na ɔsɛ dɛ wonuma no. Nkɔkowaba runntum nnyɛ dɛm adze yi.—Asomafo Ndwuma 2:22, 38, 41.
Nkyii so, Bible no ma yehu dɛ Nyankopɔn bu Christianfo hɔn mba a wɔyɛ nkɔkowaba no dɛ wɔyɛ krɔnkrɔn, anaa hɔn ho tsew wɔ n’enyi do, osiandɛ hɔn awofo no dze nokwardzi rosom no no ntsi. (1 Corinthfo 7:14) Dɛm ntsi, sɛ nkɔkowaba a wonuma hɔn no ye a, nkyɛ ɔnnkɛyɛ hɔn awofo som do na Nyankopɔn begyina ebu hɔn dɛ hɔnho tsew. b
Atorsɛm a ɔfa Christianfo enuma ho
Atorsɛm: Sɛ wɔdze nsu petsepetse obi do anaadɛ wohue gu no do a, ɔtse dɛ dza wɔdze no ahyɛ nsu mu enuma no ara.
Nokwasɛm: Nyimpa a wonumaa hɔn a Bible no ka ho asɛm no nyina, wɔdze hɔn nyimpadua no nyina hyɛɛ nsu. Mfatoho bi nye yi, aber a osuanyi Philip rubonuma Ethiopianyi ɔbarimba no, ‘wosianee kɔr nsu no mu.’ Owiee no numa no, “wofii nsu no mu.”—Asomafo Ndwuma 8:36-39. c
Atorsɛm: Bible no ma yehu dɛ sɛ wonuma ebusua bi no mufo a, wonuma nkɔkowaba so nyina ka ho. Dɛ mfatoho no, Bible no bɔ amandzɛɛ dɛ efiadzehwɛfo bi a nna ɔwɔ Philippi no, “wonumaa ɔno nye hɔn a wɔyɛ nedze nyina.”—Asomafo Ndwuma 16:31-34.
Nokwasɛm: Kyerɛwtohɔ a ɔfa efiadzehwɛfo no ne nsakyeree no ho no ma yehu dɛ hɔn a wonumaa hɔn no nyina no, nna wɔtse “Ewuradze asɛm” ase na ‘hɔn ho sɛpɛɛw hɔn.’ (Asomafo Ndwuma 16:32, 34) Dɛm asɛm yi ma yehu dɛ woennuma nkɔkowaba osiandɛ nkɔkowaba runntum nntse Jehovah n’asɛm ase.
Atorsɛm: Jesus kyerɛkyerɛɛ dɛ ɔwɔ dɛ wonuma nkɔkowaba osiandɛ ɔkaa dɛ mbofraba na sor ahenman no yɛ hɔndze.—Matthew 19:13-15; Mark 10:13-16.
Nokwasɛm: Nna Jesus rennka enuma ho asɛm aber a ɔkaa dɛm asɛm no. Mbom no, dza nna ɔreka nye dɛ hɔn a wobenya Nyankopɔn n’Ahenman no, ɔsɛ dɛ wɔyɛ hɔn adze tse dɛ mbofra. Iyi kyerɛ dɛ, ɔsɛ dɛ wɔyɛ nyimpa a wɔdwe anaa wɔbrɛ hɔnho adze na wɔma kwan ma wɔkyerɛkyerɛ hɔn.—Matthew 18:4; Luke 18:16, 17.
a Greek kasafua a wɔkyerɛ ase “enuma” no, dza ɔkyerɛ nye dɛ “edze biribi bowura nsu mu.” Hwɛ Theological Dictionary of the New Testament, Ɔfa I, krataafa 529.
b Nwoma bi a wɔato dzin The International Standard Bible Encyclopedia no bɔ amandzɛɛ dɛ, “biribiara nnyi Ahyɛmu Fofor no mu a ɔkyerɛ dɛ ɔsɛ dɛ wonuma nkɔkowaba.” Na ɔsan so ka dɛ “enuma ho ntseasee a woguguu mu no na ɔmaa wɔyɛɛ dɛm,” ɔno nye dɛ enuma hohor bɔn.—Ɔfa 1, nkrataafa 416-417.
c Aber a New Catholic Encyclopedia no reka “Enuma (wɔ Bible no mu)” ho asɛm no, ɔkaa dɛ: “Enuma a nna Asɔr a odzi kan no wɔ asomafo no aber do yɛ no, nna wɔdze nyimpa a worubonuma no no hyɛ nsu mu.”—Ɔfa 2, krataafa 59.
Bi A W'enyi Bɛgye Iyi So Ho
BIBLE MU NSƐMBISA A WOEBUA
Ana Ɔsom Nyina Yɛ Kor? Ana Ne Nyina Kyerɛ Hɛn Kwan Kɔ Nyankopɔn Nkyɛn?
Nsɛm ebien bi a wɔatwe adwen esi do wɔ Bible no mu no ma yehu dɛm nsɛmbisa no ho mbuae.
ESSENTIAL BIBLE TEACHINGS
Ana Ɔsom Nyina Na Nyankopɔn Gye To Mu?
Nyimpa pii gye dzi dɛ ɔsom a wɔwɔ mu no mmfa ho.
BIBLE NKYERƐKYERƐ
Yɛnye Nkorɔfo Sua Bible No, Sɛ W’enyi Gye Ho A Sɔ Hwɛ
Ma obi nye wo nsua Bible no a irunntua hwee.