AYEGHLE 13
Min’yebe mia ye sughlane ya melu ma zu ?
1. Ye min’yebe misese mi ne mbeng ?
Min’yebe misese mi bele é bôr ba dzeng Nzame ye n’nem ôse. Mbemba fuèñ é ne naa, Nzame a taa bo ye fe naa aa wokh be ôlun. Ve é dzam é ne abé été é ne naa, be wôle vane belane min’yebe naa ba bo é mam me ne abé (2 Becorinthien 4:3, 4 ; 11:13-15). Mefuèñ m’ézing ma dzô naa, mingura min’yebe mi ne nsama bôr wa lam minduma, wa bo meluman ye dzap bong. Abagh dze éyuiñ dzam a su be nya be bunu !—A lang Matthieu 24:3-5, 11, 12.
Nté se nya n’yebe wa lughe Nzame, bivus min’yebe mieghe mia vine nye n’nem. Mia yeghle mesiman méé se ki a Bible été, meyeghle minal mia deghe Nzame ye bewu. Ve Jehôva aa kômô naa bobebôr be yem bebela ébe nye.—A lang Ezékiel 18:4 ; 1 Timothé 2:3-5.
2. Za dzam da ye bo min’yebe ?
É ne mbeng naa, min’yebe mia dzô anyu-anyu naa ba nyeghe Nzame a too naa ba nyeghe émo Satan, béé se ki duk Nzame (Jacques 4:4). A Bible été, nsama min’yebe mise mi te mi ne éyôla naa “E Babylone N’nen.” Babylone aa mbe kisoan y’ôkua, é vôm bivus min’yebe mi nga biale akuane naa ndôn mendzim é lôr-hang. É ntoo bebéñ, éyong Nzame a ye zu mane dzaa min’yebe mise mia duk ye lere bobebôr minzukh.—A lang Melere 17:1, 2, 5, 16, 17 ; 18:8.
Ve mbemba fuèñ te dzaa sughe ki vale. Jehôva aa vwèn ki é bôr ba dzeng nye ye n’nem ôse, be ne miaman bivus min’yebe mi ne sise ngura été. Aa kuane bo éyong aa yeghle bo bebela.—A lang Michée 4:2, 5.
3. Za dzam é bôr ba dzeng Nzame ye n’nem ôse ba yiane bo ?
Nya n’yebe Nzame wa lat bôr
Jehôva aa wokh é bôr ba nyeghe é dzam é ne bebela ye mbeng ôlun. Aa tsine bo naa be kôre bivus min’yebe mi te été. É môr aa nyeghe Nzame a ne nkoghan naa aa sanghle akal dèñ.—A lang Melere 18:4.
Ntet mimbu ôsua, é bôr be nga dzeng Nzame ye n’nem ôse be nga ñong mbemba mefuèñ mintôl mi nga kanghle ye mevakh. Be nga yeghe ébe Jehôva ane ba yiane ning, mevakh été, é dzam ba ning do, ye ayane. Be ne bia bifônan akal be nga yem ñong mbemba fuèñ te ye tele Jehôva ôsu éning deba été.—A lang 1 Bethessalonisien 1:8, 9 ; 2:13.
Jehôva aa ñong é nda bewume dzèñ été, é bôr bese ba kôre bivus min’yebe. Nge mina yebe mbemba nluèn wèñ, mina ye bo angom dèñ, bôr be ya é nda bôr dzèñ é ne ényeghe, é bôr ba wume nye, ye bele éning é ne mbèmbèe.—A lang Marc 10:29, 30 ; 2 Becorinthien 6:17, 18.
4. Aval avé Nzame a ye bo naa sise ngura é tobe mevakh été ?
Mbemba fuèñ é ne naa, Nzame a nga zu-ang kikh nsang bivus min’yebe. A ye mane bindeghle bise bi ne sise ngura. Bivus min’yebe mia ye fe bera duk bôr, nge ki a kane bo a nzang. Bôr bese ba ye tobe élat nya n’yebe Nzame été.—A lang Melere 18:20, 21 ; 21:3, 4.
