AYEGHLE 11
Aval avé metsin metsing me ye Bible me ne bia vole ?
1. Amu dzé bobebôr be ne ashèñ naa be songhan bo ?
Aval avé metsin metsing me ya Bible me ne bia vole naa bi kame bia bebiéñ ?—BYA 36:9.
Mvele waa é nye a dang nkyel ye bia. A ne ésaa a ne ényeghe, aa wokh bia ôlun. Éde fe, éé dzi ki bia vele naa bi ning keghe baghle metsin metsing mèñ (Jérémie 10:23). Éde da yili naa, bia bese bi ne ashèñ naa aa songhan bia, nté mbokh fe ane moan mong a ne ashèñ naa bebyèñ bèñ be songhan nye (Ésaïe 48:17, 18). Metsin metsing me ye Bible ma lere bia é zen Nzame.—A lang 2 Timothée 3:16.
Metsing ye metsin metsing Jehôva ma yeghle bia aval mbemba éning bia yiane ning abong di, ye lere bia aval bi ne bele biboran bi ne mbèmbèè melu ma zu. Nzame é nye a nga vele bia, é ne sôsôe naa bi tông é zen dzèñ ye n’nem ôse.—A lang Bya 19:7, 11 ; Melere 4:11.
2. Dzé ba lué naa tsin atsing ?
Tsin atsing déé se ane atsing da deghe ngura dzam ézing, é ne é bebela a ne keghe sanghle (Deutéronome 22:8). Naa ô yem aval ô ne belan tsin atsing éyong ô bele ngura dzam ézing, wa yiane fas (Minkana 2:10-12). N’taman ñong éfônan, Bible aa yeghle naa Nzame é ny’a ve éning. Tsin atsing é ne bia songhan éyong bi ne ésèñ, a nda nge ki bikena. É ne fe ve naa bi ñong mefekh ma baghle bia.—A lang Bisè Mintôl 17:28.
3. Metsin metsing mebèñ me vé ma dang éban ?
Yésu a nga lang metsin metsing mebèñ me tele ôsu. Édi ôsua, aa lere bia akal dzé moan môr aa ning, naa—a yem Nzame, a nyeghe nye ye séhan nye ye n’nem ôse. Bia yiane baghle tsin atsing te éyong bia bu mefekh mese (Minkana 3:6). É bôr ba ñong de ye n’nem ôse ba deng angom Nzame, nya mvom ye f’éning é ne mbèmbèè.—A lang Matthieu 22:36-38.
É tsing atsing bèè é ne bia vole a bele mbemba élat y’é bôr bevokh. (1 Becorinthien 13:4-7). A belane tsin atsing da sili naa bi vu aval Nzame a belan bobebôt.—A lang Matthieu 7:12 ; 22:39, 40.
4. Aval avé Metsin metsing me ye Bible me ne bia vole ?
Bible a bele metsin metsing ma yeghle menda me bôt, ane ényeghe é ne bo lat (Becolossien 3:12-14). Aa kale fe menda me bôt éyong aa yeghle é môra tsin atsing mbokh nyi : alukh da yiane tobe mbèmbèè.—A lang Atargha 2:24.
Metsin metsing me ya Bible ma vole bia nfakh ye mbelan biôm ye aval bia ñong mam. Éfônan é ne naa, be mesaa be wôla dang fèè be bo bisèñ be ne sôsôe ye zôme ésèñ amu ba bèè medzô me Nzame (Minkana 10:4, 26 ; Behébreu 13:18). Bible aa yeghle fe bia ane bi ne belan foghe ve abim biôm bi bele, ye lere naa angom ye Nzame éde bia tele ôsu ye lôr akum.—A lang Matthieu 6:24, 25, 33 ; 1 Timothée 6:8-10.
A belan metsin metsing me ye Bible da kale é mvoghe dzaa (Minkana 14:30 ; 22:24, 25). Éde, atsing Nzame da vine mbilan meyokh da vole bia naa bi bo keghe bili akoan da ywiñ nge ke bibubua bi mam (Minkana 23:20). Jehôva aa yebe naa bi ñu meyokh, ve abim da yiène (Bya 104:15 ; 1 Becorinthien 6:10). Metsin metsing Nzame me ne bia vole amu ma yeghle bia, naa bi kale mimboan mia, ye fe mesiman maa (Bya 119:97-100). Nge be nya bechrétien ba kang metsin metsing Nzame, d’éé se akal naa ba béé ve biboran, ba kômô lughe Jehôva.—A lang Matthieu 5:14-16.
