Ler nou konpran douler lezot i vedir nou annan sa abilite pour santi douler en lot dimoun konmsi i lo nou menm. I osi vedir nou esey met nou dan son plas. Dokter Rick Hanson, ki en eksper dan lasante mantal i dir ki “nou’n ne avek sa abilite pour konpran douler lezot.”

REFLESIR: Me akoz nou annan sa abilite pour konpran douler lezot tandis ki bann zannimo napa sa kalite? Labib i dir ki Bondye ti kree imen dan son limaz. (Zenez 1:26) Nou’n ganny kree dan limaz Bondye dan sa sans ki nou reflekte son personnalite e nou demontre en pe son bann bon kalite. Alor, ler en dimoun i demontre ki i konpran douler lezot, i montre ki i pe imit Zeova, sa Enn ki annan en kantite konpasyon.​—Proverb 14:31.

Bondye i konpran nou douler e i pa kontan ler i vwar nou pe soufer. Konsernan pep Izrael ki bann Ezipsyen ti fors zot pour vin lesklav e ki ti pas 40 an dan dezer kot lavi ti difisil pour zot, Labib i dir: “Pandan ki zot ti pe pas dan soufrans, sa ti fer li soufer.” (Izai 63:9, NWT) Remarke ki Bondye pa ti zis vwar zot soufrans, i ti osi santi zot douler. I ti dir: “Mon konn zot soufrans.” (Egzod 3:7) I ti osi dir: “Sa ki tous zot, i tous mon kannet lizye.” (Zekarya 2:8, NWT) Ler lezot i fer nou soufer, Bondye osi i soufer ansanm avek nou.

Labib i asir nou ki menm si nou pa krwar ki I santi nou douler, “Bondye i pli gran ki nou leker e i konn tou keksoz.” (1 Zan 3:19, 20) Bondye i konn nou plis ki nou konn nou lekor. I konn byen nou panse, nou santiman, sityasyon ki nou ladan e i osi konpran nou douler.

 Labib i asir nou

• “Ou ava apel osekour. Mwan [Zeova], mon pou reponn ou. Ou pou kriy osekour e mon pou dir ou: La mon la.”​—IZAI 58:9.

• “Mon konn byen bann plan ki mon annan pour ou, [Zeova] i deklare: Bann plan ki pou anmenn prosperite pour ou, pa dezas; bann plan ki pour donn ou en lavenir ranpli avek lespwar. Alor, ou ava envok mwan e ou ava kapab ale. Ou ava priy mwan e mon ava antann ou lapriyer.”​—ZEREMI 29:11, 12.

• “Ou konnen ki kantite larm mon’n verse. Tousala in ekri dan ou gran liv.”​—PSONM 56:8.

Ler nou konnen ki Bondye i konpran nou douler, eski sa i ed nou fer fas avek difikilte? Annou vwar leksperyans Maria. I dir:

“Ler mon garson 18 an ti mor avek en kanser ki i ti pe lalit avek pour de-z-an, mon leker ti vreman fermal. Mon lavi ti difisil e mon ti santi ki sa ki’n arive avek li pa zis. Mon ti ankoler avek Zeova akoz i pa ti’n geri mon garson.

“Si-z-an pli tar, en bon zanmi dan kongregasyon ti ekout mwan ler mon ti dir li ki Zeova pa ti kontan mwan. Apre ki i ti’n ekout mwan pour en bon pe letan san enteronpe, avek konpasyon mon zanmi ti sit sa verse dan 1 Zan 3:19, 20 ki dir: ‘Bondye i pli gran ki nou leker e i konn tou keksoz.’ Sa verse ti vreman tous mwan. Mon zanmi ti dir mwan ki Zeova i konpran nou douler.

“Malgre sa, i ti difisil pour mwan aret ankoler! Apre mon ti lir Psonm 94:19 ki dir: ‘Ler mon leker i ranpli avek traka, ou vin rekonfort mwan.’ Mon ti santi konmsi sa verse ti’n ganny ekri zis pour mwan! Avek letan, mon ti ganny rekonforte ler mon ti koz avek Zeova lo mon bann soufrans akoz mon konnen i konpran.”

I vreman rekonfortan pour konnen ki Bondye i konpran nou e i santi nou douler! Me alor, akoz i annan sitan bokou soufrans? Eski i akoz Bondye pe pini nou pour keksoz mal ki nou fer? Eski Bondye pou fer okenn keksoz pour retir tou soufrans? Sa bann kestyon pou ganny reponn dan bann lartik ki swiv.