Pandan sa premye 60 minit apre ki en pti baba i ne, i vreman enportan pour en manman ek son baba reste pros avek kanmarad. Sa relasyon ki sa manman ek son pti baba i devlope pandan sa letan, pou ed sa pti baba grandi e devlop byen. *

Me kwa ki fer en manman pran swen avek son pti baba ki’n fek ne? Dan liv The Journal of Perinatal Education, Profeser Jeannette Crenshaw i dir ki apre ki en manman i donn nesans, son lekor i prodwir plis sa ormonn ki apel oxytocin e sa i fer lanmour ki sa manman i annan pour son baba ogmante anmezir ki i get son pti baba, donn li tete e tous li. Lekor sa manman i osi prodwir en lot ormonn ki ed li reakte e pran swen avek son pti baba e sa i fer zot devlop sa relasyon. Me akoz sa i enportan?

Sa relasyon ki egziste ant en manman ek son pti baba in ganny kree par nou Kreater, Zeova * ki kontan nou. Lerwa David ti dir ki Bondye ti’n tir li dan “vant” son manman e fer li santi an sekirite dan lebra son manman. I ti osi dir: “Depi zour mon nesans, mon ti ganny konfye avek ou. Depi dan vant mon manman, ou’n touzour mon Bondye.”​—Psonm 22:9, 10.

REFLESIR: Si Bondye in kree lekor en manman dan sa fason kot i vey e pran swen avek son pti baba, pa i rezonnab pour krwar ki Bondye i enterese avek nou vi ki nou “bann zanfan Bondye”?​—Akt 17:29.

Zezi Kri, ki konn nou Kreater pli byen ki nenport dimoun, ti dir: “Pa de sren i vann pour en pti sou? Pourtan, napa ni enn parmi zot ki tonm ater san ki zot Papa i konnen e i menm konnen konbyen bren seve i annan lo zot latet. Alor, pa bezwen per, zot annan bokou plis valer ki en kantite sren.”​—Matye 10:29-31.

Bokou nou pa port atansyon lo tou bann pti zwazo ki nou vwar e nou pa ni menm remarke ler enn parmi zot i tonm ater. Me nou Papa ki dan lesyel i vwar sak sa bann zwazo! Menm en kantite zwazo napa plis valer ki en dimoun. Alor, sa i montre ki ou “pa bezwen per” e krwar ki Bondye pa vwar ou. O kontrer, i vreman enterese avek ou.

 Labib i asir nou

• “Lizye [Zeova] i partou; i obzerv dimoun bon konman move.”​—PROVERB 15:3.

• “Lizye [Zeova] i fikse lo bann zis. Son zorey i ouver pour ekout zot ler zot kriye.”​—PSONM 34:15.

• “Mon rezoui e mon dan lazwa akoz ou fidelite, akoz ou’n war mon lapenn, ou’n konpran mon detres.”​—PSONM 31:7.

Ler nou konnen Bondye i vreman enterese avek nou, eski sa i kapab annan en bon lefe lo nou? Byensir, zis parey Hannah, * en madanm ki reste Langleter, i dir:

“Souvan, mon ti santi ki Zeova pa kontan mwan e i pa ti pe reponn mon lapriyer. Mon ti krwar mon ti napa ase lafwa e ki Bondye ti pe pini oubyen inyor mwan akoz mon pa enportan. Mon ti santi ki Bondye pa ti enterese avek mwan.”

Par kont, Hannah nepli doute ki Zeova i kontan oubyen enterese avek li. Kwa ki’n fer li sanz son nide? Hannah i dir: “Sa sanzman ti ariv ptitapti. De trwa lannen pase, mon ti tann en diskour konsernan ranson Zezi. Sa ti annan en gran lefe lo mwan e ti reasir mwan ki Zeova i kontan mwan. Souvan mon’n plere ler Zeova in reponn mon lapriyer akoz sa in fer mwan realize ki Zeova i vreman kontan mwan. Ler mon’n etidye Labib e asiste bann renyon Kretyen, mon’n aprann plis lo Zeova, son personnalite e lanmour ki i annan pour bann imen. Aprezan, mon vwar ki Zeova i kontan e i anvi ed sakenn ant nou.”

Sa ki Hannah in dir i vreman ankourazan. Me ki mannyer ou kapab asire ki Bondye i konpran e i pran kont ou bann santiman? Sa lartik ki swiv pou reponn sa kestyon.