Zenez 1:1-31
1 O konmansman, Bondye ti kree lesyel* ek later.
2 Aprezan, later ti vid e i ti napa nanryen lo la.* I ti fernwanr par lao delo* e lafors* Bondye ti pe ale vini par lao delo.
3 Apre, Bondye ti dir: “Ki lalimyer i aparet.” Alor lalimyer ti aparet.
4 Apre sa, Bondye ti vwar ki lalimyer ti bon. Bondye ti deside kan i ti pou annan lalimyer e kan i ti pou fernwanr.
5 Bondye ti apel lalimyer, Lizour, me fernwanr, Lannwit. Aswar ti fer e apre lizour ti fer, sa ti premye zour.
6 Apre, Bondye ti dir: “Ki en lespas i aparet* pour separ delo an de, pour ki i annan en separasyon ant sa de delo.”
7 Apre, Bondye ti fer sa lespas ki ti separ sa delo ki anba avek sa delo ki anler. Sanmenm sa ki ti arive.
8 Bondye ti apel sa lespas,* Lesyel. Aswar ti fer e apre lizour ti fer, sa ti dezyenm zour.
9 Apre, Bondye ti dir: “Ki sa delo par anba lesyel i ganny rasanble dan en sel landrwa e ki later sek i aparet.” Sanmenm sa ki ti arive.
10 Bondye ti apel sa later sek, Later me sa delo ki ti’n ganny rasanble, Lanmer. Bondye ti vwar ki sa ti bon.
11 Apre, Bondye ti dir: “Ki later i fer zerb pouse, bann plant ki annan lagrenn ek bann pye fri sakenn dapre son kalite ki prodwi fri ek lagrenn lo later.” Sanmenm sa ki ti arive.
12 Later ti konmans fer zerb pouse, bann plant ki annan lagrenn e bann pye ki raport fri ek lagrenn, sakenn dapre son kalite. Bondye ti vwar ki sa ti bon.
13 Aswar ti fer e apre lizour ti fer, sa ti trwazyenm zour.
14 Apre, Bondye ti dir: “Ki bann lalimyer* i aparet dan lesyel* pour separ lizour ek aswar e zot pou vin bann siny pour konn bann sezon, zour ek lannen.
15 Sa bann lalimyer dan lesyel* pour kler later.” Sanmenm sa ki ti arive.
16 Bondye ti fer de gro lalimyer, soley* ki klere* pandan lazournen e lalin* ki klere* pandan lannwit. I ti osi fer bann zetwal.
17 Alor Bondye ti met zot dan lesyel* pour zot kler later
18 pandan lazournen ek aswar e pour fer en separasyon ant lalimyer ek fernwanr. Apre, Bondye ti vwar ki sa ti bon.
19 Aswar ti fer e apre lizour ti fer, sa ti katriyenm zour.
20 Apre, Bondye ti dir: “Ki delo i ranpli avek zannimo.* Ki bann zannimo ki kapab anvole i anvole* par lao later dan lesyel.”*
21 Bondye ti kree bann gro zannimo* dan lanmer ek tou zannimo* ki viv e bouz ansanm dan delo, sakenn dapre son kalite. I ti osi kree tou bann zannimo ki annan lezel, ki anvole, sakenn dapre son kalite.* Bondye ti vwar ki sa ti bon.
22 Apre sa, Bondye ti beni zot e dir: “Fer piti, vin bokou e ranpli lanmer. Ki bann zannimo ki anvole i vin en kantite lo later.”
23 Aswar ti fer e apre lizour ti fer, sa ti senkyenm zour.
24 Apre, Bondye ti dir: “Ki later i prodwi bann zannimo,* sakenn dapre son kalite, bann zannimo domestik, bann reptil* ek zannimo sovaz lo later, sakenn dapre son kalite.” Sanmenm sa ki ti arive.
25 Bondye ti fer bann zannimo sovaz lo later, sakenn dapre son kalite, bann zannimo domestik, sakenn dapre son kalite e tou bann reptil* lo later, sakenn dapre son kalite. Bondye ti vwar ki sa ti bon.
26 Apre, Bondye ti dir: “Annou fer zonm* parey nou, dan nou resanblans. Ki zot domin lo bann pwason dan lanmer, lo bann zannimo ki anvole dan lesyel, lo bann zannimo domestik, lo later antye e lo tou reptil* lo later.”
27 Bondye ti kree zonm dan son resanblans, dan resanblans Bondye i ti kree li. I ti kree zot, zonm ek fanm.
28 Deplis, Bondye ti beni zot e Bondye ti dir: “Fer zanfan e vin bokou, ranpli later e pran swen avek* li. Zot pou domin lo bann pwason dan lanmer, bann zannimo ki anvole dan lesyel e tou zannimo* lo later.”
29 Apre, Bondye ti dir: “La mon’n donn zot tou plant ki annan lagrenn lo later antye e tou bann pye ki zot fri i annan lagrenn. Zot kapab manz tousala.
30 Mon donn tou bann plant ver konman manze avek tou zannimo sovaz lo later, tou zannimo ki anvole dan lesyel e tou keksoz ki bouze lo later e ki annan lavi dan zot.”* Sanmenm sa ki ti arive.
31 Apre sa, Bondye ti get tou sa ki i ti’n fer e tou ti tre bon. Aswar ti fer e apre lizour ti fer, sa ti sizyenm zour.
Bann not
^ Setadir, liniver enkli bann zetwal, plannet ek bann galaksi.
^ Oubyen “napa en laform.”
^ Oubyen “delo azite.”
^ Oubyen “lespri sen, lafors aktif.” Vwar Leksplikasyon bann mo.
^ Oubyen “latmosfer.”
^ Oubyen “latmosfer.”
^ Setadir, soley, lalin ek zetwal.
^ Literalman, “dan sa lespas dan lesyel.”
^ Literalman, “dan sa lespas dan lesyel.”
^ Oubyen “sa pli gro lalimyer.”
^ Oubyen “dominen.”
^ Oubyen “sa pli pti lalimyer.”
^ Oubyen “dominen.”
^ Literalman, “dan sa lespas dan lesyel.”
^ Oubyen “keksoz vivan.” Ebre, neʹphesh. Vwar Leksplikasyon bann mo.
^ Sa mo Ebre i kapab refer avek zwazo ek zensek ki anvole.”
^ Literalman, “dan sa lespas dan lesyel.”
^ Oubyen “bebet.”
^ Oubyen “zannimo vivan.” Ebre, neʹphesh. Vwar Leksplikasyon bann mo.
^ Oubyen “lespes.”
^ Oubyen “zannimo vivan.” Ebre, neʹphesh. Vwar Leksplikasyon bann mo.
^ Oubyen “bann zannimo ki ranpe.” Aparaman, sa pe refer avek lezar, serpan, zensek ek lezot pti zannimo.
^ Oubyen “bann zannimo ki ranpe.” Aparaman, sa pe refer avek lezar, serpan, zensek ek lezot pti zannimo.
^ Sa mo Ebre adham i kapab pe refer avek zonm oubyen imen an zeneral.
^ Oubyen “bann zannimo ki ranpe.” Aparaman, sa pe refer avek lezar, serpan, zensek ek lezot pti zannimo.
^ Oubyen “kontrol.”
^ Oubyen “zannimo ki bouze.”
^ Oubyen “ki bann nanm vivan.” Ebre, neʹphesh. Vwar Leksplikasyon bann mo.
