Me ren Mattu 19:1-30
19 Lupwen Jises a wes le fós ussun ekkeei mettóch, a ló seni Kalili me feiló ngeni kiánin Jutia epek ewe Jortan.
2 Pwal och, eú mwichemmóngun aramas a tapweló mwirin, iwe a echikareretá me ikena ie.
3 Me ekkewe Farisi ra feito ren fán iten ar repwe chék sótuni i, ra apasa: “Mi mumutá me ren ewe allúk án emén mwán epwe mu seni pwúlúwan ren ese lifilifil popun?”
4 Lón an pélúweni a apasa: “Ouse álleani pwe ewe emén mi féraatá aramas seni lepoputáán a fériir mwán me fefin
5 me apasa: ‘Ren ei popun, emén mwán epwe likiti seman me inan me pach ngeni pwúlúwan we, me ekkewe rúúemén repwe eú chék inis’?
6 Ina popun rese chúen rúúemén, nge eú chék inis. Ina minne, met Kot a apachafengeni, ese wor emén aramas epwe áimufeseni.”
7 Ra apasa ngeni: “Iwe, pwata Moses a allúkú pwe epwe ngeni ewe fefin eché taropween mufesen me tiinaaló?”
8 A ereniir: “Pokiten ámi tipeférea, Moses a mut ngenikemi ámi oupwe mu seni pwúlúwemi, nge esap ina ussun seni me lepoputáán.
9 Úa erenikemi pwe ié a mu seni pwúlúwan nge esap pokiten lisowumwáál,* me pwúlúweni pwal emén, i a tipisin lisowumwáál.”*
10 Ekkewe chón káé ra ereni: “Iká ina ussun ewe mettóch pwúpwúlú, epwe fen múrinné án emén esap pwúpwúlú.”
11 A ereniir: “Esap meinisin aramas ra apwénúetá ekkeei kapas, nge chókkewe chék mi nóm rer ewe liffang.
12 Pún mi wor ekkewe iunók* ra uputiw nge ina ussur, me mi wor ekkewe iunók aramas ra fériir ar repwe iunók, me mi wor ekkewe iunók ra pwisin filaatá ar repwe iunók pwe repwe tongeni féri chómmóng mettóch fán ásengesin ewe Mwúún láng. Iká emén a mochen an epwe chék lipich, mi éch ena.”
13 Mwirin, aramas ra uweato ekkewe semirit ren pwe epwe isettá péún wóór me iótekiir, nge ekkewe chón káé ra song ngeniir.
14 Iwe nge, Jises a apasa: “Oupwe likitaaló ekkena semirit, me ousap sótun eppetiir ar repwe feito rei, pún ewe Mwúún láng fán iten chókkewe mi ussun chék iir.”
15 Me a isettá péún wóór me a ló seni ikena.
16 Iwe nengeni! emén a feito ren me apasa: “Sense, met sókkun féffér mi múrinné a lamot úpwe féri pwe úpwe kúna manaw esemuch?”
17 A ereni: “Pwata ka eisiniei iká met ewe mi múrinné? A chék wor emén mi múrinné. Iwe nge, iká ka mochen kúna manaw, kopwe sópweeló le apwénúetá ekkewe allúk.”
18 A ereni: “Menni leir?” Jises a apasa: “Kosap nimanaw, kosap lisowumwáál, kosap solá, kosap eáni kapasen pwáraatá mi mwáál,
19 kopwe asamolu semom me inom, me kopwe tongei chón órum ussun óm tongei pwisin en.”
20 Ewe alúwél a ereni: “Úa fen apwénúetá meinisin ekkeei, pwal met a lamot úpwe féri?”
21 Jises a ereni: “Iká ka mochen epwe unus óm angang ngeni Kot, kopwe feiló améméló met mi wor reom me fang ngeni chón osupwang, me epwe wor woum lón láng, me kopwe feito o chón tapwoto mwiri.”
22 Lupwen ewe alúwél a rong ei, a feiló fán an letipechou, pún a watte wéún.
23 Iwe, Jises a ereni néún kewe chón káé: “Enlet úa erenikemi pwe epwe weires ngeni emén mi pisekisek an epwe tolong lón ewe Mwúún láng.
24 Úa pwal erenikemi, a mecheres ngeni emén kamel an epwe tikilong lón pwangen efóch tikek lap seni án emén mwán mi pisekisek epwe tolong lón ewe Mwúún Kot.”
25 Lupwen ekkewe chón káé ra rong ena, ra fókkun rúké, ra apasa: “Ié a wesewesen tongeni kúna manaw?”
26 Jises a newenewen ngeniir me ereniir: “Ren aramas esap tufich ei, nge ren Kot mettóch meinisin a tufich.”
27 Mwirin Piter a pélúweni: “Nengeni! Áúa fen likitaaló mettóch meinisin me tapweló mwirum. Iwe, met áúpwele angei?”
28 Jises a ereniir: “Enlet úa erenikemi pwe Kot epwe aséfééi mettóch meinisin lupwen ewe Néún aramas a móttiw wóón an we leenien móótun king mi fókkun ling. Iwe lón ena atun, ámi mi tapwoto mwiri oupwe móttiw wóón ekkewe 12 leenien móótun king me apwúngú ekkewe 12 einangen Israel.
29 Me meinisin mi likitaaló imwan are pwiin are mwongean are fefinan are seman are inan are néún are fénúan fán ásengesin itei, epwe angei fán ipúkú lap seni, me epwe álemwiri manaw esemuch.
30 “Nge chómmóng mi akkomw repwe kukumwir, nge chómmóng mi kukumwir repwe akkomw.
Footnote
^ Ewe kapasen Krik ikeei a chék weneiti tipisin emén mi pwúpwúlú mi méúr ngeni emén esap pwúlúwan.
