Ewe New World Translation of the Christian Greek Scriptures, a katowu lón fósun Merika lón ewe ier 1950, nge ewe mi unus New World Translation of the Holy Scriptures a katowu lón 1961. Seni ena atun feito, fite fite million chón állea lón lap seni 250 fósun fénúfan ra kúna álillis seni ei afféún Paipel mi pwúng me mecheres kapasan mi afféú seni ekkewe popun kapas a mak lón.

Iwe nge, lón lap seni nime ier a ló, a siwil fósun fénúfan. Iwe, ewe Kúmiin Chón Afféúni ewe New World Translation iei, ra kúna pwe a lamot an epwe kawor eú afféún Paipel mi achchúngú letipen ekkewe aramas mi álleani lón ei fansoun. Ren ar repwe apwénúetá ena, ikkeei met ra achocho le féri:

• Néúnéú ekkewe kapas aramasen ei fansoun ra nénnéúnéú me weweiti. Áwewe chék, ekkóch afféún Paipel ra néúnéú ewe kapas “achomaw,” nge ese fataffatéch weween ngeni chómmóng chón állea, ina popun ei afféún Paipel a néúnéú ekkewe kapas chómmóng ra weweiti, áwewe chék ren “chón solá” are “chón kafang.” (1 Korint 5:11; 6:10) Pokiten ewe kapas “sousáfei” a tongeni wewe ngeni angangen roong, iwe ei afféún Paipel a néúnéú ei kapas “tokter.”—Mattu 19:12.

  Pwal ekkóch kapas mi kan nóm lón ekkewe Paipelin Chuuk ra ekkesiwil ngeni ekkewe kapas chómmóng chón állea ra weweiti, nge fán ekkóch a fiti footnote mi masou ren kapas mi pwal wewe ngeni. Áwewe chék, lón ei afféún Paipel a néúnéú ewe kapas “keinepan” lap seni “rupun pwétúr” (Mattu 8:2), “governor” lap seni “kepina” (Mattu 27:2), “ito” lap seni “chénúttu” (Jon 4:6), “ourur” lap seni “chip” (2 Korint 1:3), me “uwofós” lap seni “lúapas.”—1 Timoty 5:13.

• Ffatolóón weween kapas Paipel a néúnéú. Ewe kapasen Krik lón Paipel “Eitis,” a wewe ngeni leenien peiás fán iten aramas. (Féffér 2:27, 31, ftn.) Ekkóch Paipel ra afféúni ei kapas “Eitis” ngeni “ell,” ewe chómmóng aramas ra weweiti pwe eú leeni ia ekkewe aramas mi ngaw repwe riáfféú ie mwirin ar máló. Ei Paipel a néúnéú ei kapas “Peiás” pwe epwe pwáári met wesewesen weween. Ewe kapasen Krik “Eitis” a pwá lón footnote.—Mattu 11:23.

   Lón ekkóch Paipel, ewe kapasen Krik “Keena” a pwal afféú ngeni ewe kapas “hell.” (Mattu 5:29; Mark 9:43; Luk 12:5) Lón ei afféún Paipel, a néúnéú ei kapas “Keena” lón wokisin, fitifengen me footnote mi áiti ngeni chón állea ar repwe ppii weween lón Glossary.

  Ei kapasen Ipru neʹphesh me ei kapasen Krik psy·kheʹ ra wewe ngeni (1) aramas, (2) man, are (3) ewe manaw mi nóm ren emén aramas are emén man. (Ppii Keneses 1:20; Luk 6:9; 12:23.) Chómmóng Paipelin Chuuk ra afféúni ekkena popun kapas alóngólóng wóón eú me eú weween ussun met ei afféún Paipel a pwal féri. Iwe nge, ekkóch Paipel ra néúnéú ei kapas “ngún” lón ekkóch wokisin. Ei afféún Paipel ese ina ussun, pún ei kapas “ngún” ese pwáári pwúngún néúnéún weween.

  Ei Paipel a affata pwe Jises a máló wóón efóch “iráán ninni” nge esap wóón efóch “irápenges.” Lón chómmóng wokisin, a wor footnote ren ei kapas “iráán ninni” pwe epwe áiti ngeni chón állea ar repwe ppii weween ena kapas lón Glossary.—Mattu 10:38; Mark 8:34.

  Ekkóch kapas lón ekkewe Paipelin Chuuk a lamot epwe wor áweween pwe epwe pwúng án aramas weweiti. Áwewe chék, ewe kapasen Krik por·neiʹa a afféú ngeni “lisowu.” Iwe nge, pokiten weween ena kapasen Krik a wesewesen wewe ngeni féfférún lisowu mi mwáál, iwe ei afféún Paipel a néúnéú ei kapas “lisowumwáál,” pwe ewe chón állea esap ekieki pwe meinisin féfférún lisowu pwal mwo nge lefilen ekkewe mi wesewesen pwúpwúlú, ina eú tipis.—Mark 7:21; 1 Korint 6:18.

  Lón ei afféún Paipel, ekkeei kapas “tipepwetete,” “nemeni pwisin mochenich,” me “kirekiréch mi somwoló” ra affata wesewesen weween ekkena napanap, pún lón chómmóng afféún Paipel, fán ekkóch ese ffat weween ar afféúni ekkena kapas are lape ngeni mi sókkofesen ar afféúni.—Kalesia 5:23; 1 Piter 4:10.

  Inaamwo iká chómmóng ra sissilei ewe kapas “souleng,” nge ese weneiti weween ewe kapasen Krik. Iwe, ei afféún Paipel ese néúnéú ena kapas, a fen néúnéú “Chón Kraist,” pún iei wesewesen weween.—Féffér 11:26; 26:28.

  Meinisin ekkewe wokisin lón ei Paipel a fókkun túmúnúéch chiyakúún fiti iótek me watteen súfél ren angangéchún ewe Kúmiin Chón Afféúni ewe New World Translation.

Ei afféún Paipel a wor footnote lón. Ekkena footnote ra kinikinitiw lón ekkeei kinikin:

• “Are” Pwal ekkóch afféún kapas are mwuten kapas seni kapasen Krik nge mi léllé weweer.—Rom 12:2, footnote wóón “anapanapaakemi”; Kalesia 5:19, “angolossá.”

• “Are ese mwáál” Pwal ekkóch kapas are itiitin kapas mi tongeni afféú lón nge mi sókkóló ewe ekiek lón.—Jemes 5:15, “chón samaw”; 1 Piter 3:14, “met ra niwokkusiti.”

• “Krik” Afféún eféú me eféú kapas seni kapasen Krik are wesewesen weween ewe popun kapas.—Luk 9:53, “tipeppós”; Féffér 18:6, “tipisimi.”

• Áweween kapas me pwal ekkóch pwóróus Áweween it (1 Timoty 1:2, “Timoty”; Pwáraatá 12:7, “Mikael”); choun me kaúkún mettóch (Mattu 25:15, “talent”); ié a weneiti ewe kapas “i,” are “a.” (Efisus 1:4, “i”); pwal ekkóch pwóróus mi álilliséch lón Appendix me lón Glossary.—Mattu 5:22, “Keena”; Mattu 1:22, “Jiowa”; Mark 4:19, “ótóten ei fénúfan.”

Ewe áeúin kinikin itelapan “Kákkáé Met A Nóm lón án Kot Kapas,” a masou ren án Paipel kewe káit. Mwirin ekkewe puk lón Paipel, a wor ekkeei kinikin itelaper “Tettelin Ekkewe Puk lón Paipel,” me ewe “Glossary fán Iten Kapas lón Paipel.” Ewe Glossary a álisi ekkewe chón állea ar repwe weweiti ekkewe kapas ren néúnéún me ren ewe Paipel. A kapachelong lón ewe Appendix ekkeei kinikin, itelaper “Kapasen Emmwen lón Angangen Afféún Paipel,” “ Minne A Nóm lón Ei Afféún Paipel,” “Ussun án ewe Paipel Nóm Tori Ach Ei Fansoun,” “Iten Kot we lón ewe Tesin Krik,” me “Menlapen Kinikinin Manawen Jises Wóón Fénúfan,” me pwal ekkewe map, chart, me ekkóch pwóróus epwe álilliséch ngeni ekkewe chón káé Paipel mi tinikken.

Lepoputáán eú me eú puk lón Paipel, a wor ekkewe pwóróus mi tettelitiw fán iten ekkewe sópwun fiti ekkewe wokisin mi weneiti pwe epwe áiti ngeni chón állea masouen unusen eú puk.