Eú Pwáraatá Ngeni Jon 15:1-8
15 Iwe, úa kúna me lón láng pwal eú esissil mi amwarar me aúchea, me úa kúna me ikena fúmén chónláng fán fisu feiengaw. Ikkeei ekkewe sáingoon feiengaw, pún atun repwele much, án Kot song epwe pwal muchúló.
2 Me úa kúna och mettóch mi ussun mataw mi kúrúffat ussun kilaas mi nofitfengen me ekkei, me chókkewe mi pworacho ngeni ewe manmwacho me uluulun we me nampaan itan we ra úkkúútá únúkkún ena mataw mi kúrúffat, me ra kémwéch ekkewe kitar* Kot a ngeniir.
3 Iwe, ra eáni ewe kél án néún Kot we chón angang Moses me ewe kél án ewe Laam, a apasa:
“A fókkun lapalap me amwarar óm kewe angang, Jiowa* Kot, ewe mi Unusen Manaman. A pwúng o enlet óm féffér, Kingen feilfeiló.
4 Ié esap fókkun niwokkusituk, Jiowa,* me elingaaló itom we nge en chék ewe Kot mi túppwél? Meinisin aramasen ekkewe ekkóch mwú repwe feito me fel mwen mesom pún óm kewe allúk mi pwúng ra fen pwápwááló.”
5 Mwirin ena, úa kúna ewe leeni mi pin lón ewe imwenfel mangaku* pwe a suukuló lón láng,
6 iwe, ekkewe fúmén chónláng fán ekkewe fisu feiengaw ra towu seni lón ena imwenfel. Ra úféúf úf mi limeliméch me saramaram me a pwal ririitá fán mwáriir riri mi ffér seni kolt.
7 Emén me lein ekkewe fémén ménúmanaw a ngeni ekkewe fúmén chónláng fisu sepi seni kolt mi ur ren án Kot song, ewe mi manaw tori feilfeiló chék.
8 Iwe, ewe imwenfel a ur ren étúét pokiten ewe lingen Kot, me pokiten an we manaman, me ese wor emén epwe tongeni tolong lón ewe imwenfel tori an epwe wes án ekkewe fúmén chónláng kewe fisu feiengaw.
Footnote
^ Are “ewe imwenfel mangaku ussun án Kot kapasen áchchem.”
