Minne Ekkewe Aposel Ra Féri 1:1-26
1 Teofilus, lón ewe áeúin pwóróus úa makkeei ngonuk, úa apwóróusa ekkewe mettóch meinisin Jises a féri me asukula,
2 tori ewe rán Kot a angeatá i, mwirin an awora emmwen me ren ewe ngún mi fel ngeni ekkewe aposel a filiretá.
3 Mwirin an kúna riáfféú, a pwáári pwisin i ngeniir pwe resap tipemwárámwáreiti pwe i a wesewesen manaw. Ra kúna i lón úkúúkún 40 rán, me i a kakkapas ussun ewe Mwúún Kot.
4 Atun a emwichafengeniir, a allúkú ngeniir: “Ousap towu seni Jerusalem, nge oupwe chék witiwiti met ewe Sam a fen pwonei, ewe oua fen rong seniei,
5 pún ren enletin, Jon a féri ewe angangen papatais ren konik, nge mwirin chék fitu rán, ámi oupwe papatais ren ewe ngún mi fel.”
6 Iwe, atun ra chufengen, ra eisini: “Samol, kopwele eliwinisefáli ewe mwú ngeni Israel lón ei atun?”
7 A ereniir: “Ese pwal lamot ámi oupwe silei ewe kulók are rán mi kefililó, pún ewe chék Sam a wor an pwúúng le filaatá ena.
8 Nge oupwe angei manaman atun ewe ngún mi fel epwe feito wóómi, me oupwe chón pwáraatá ussui lón Jerusalem, lón unusen Jutia me Sameria, me tori lesopwuchikin fénúfan.”
9 Mwirin an apasa ekkeei mettóch, atun ar nennengeni, a nannangetá me eú kuchu a amonaaló i, me rese chúen kúna.
10 Me atun ra nennetá fán láng, atun an feffeitá, mwittir chék rúúemén mwán mi úféúf mi pwech ra útáló únúkkúr
11 me ra apasa: “Ámi re Kalili, pwata oua úkkúútá me nennetá fán láng? Ei Jises, ewe a fen ló senikemi me feitá láng, i epwe feito lón pwal chék ewe napanap oua kúna lón an feitá láng.”
12 Mwirin ra liwiniti Jerusalem seni ewe chuuk itan Chukun Olif, ewe mi arap ngeni Jerusalem, ina epwe esopw mwail towauan seni.*
13 Lupwen ra waroto, ra feitá lón ewe ruumw asan ikewe ra nónnóm ie. Iir, Piter pwal Jon me Jemes me Andru, Filip me Tomas, Partolomiu me Mattu, Jemes néún Alifios we, me Simon ewe emén mi tinikken, me Jutas néún Jemes we.
14 Fán tipeeú, iir meinisin ra sópweeló le ikkiótek, fitifengen me ekkóch fefin, me pwiin Jises kewe me Meri, inan we.
15 Lón ekkena rán, atun ina epwe 120 aramas ra chufengen, Piter a útá lefiler me a apasa:
16 “Ámi pwii keei, me ren awen Tafit ewe ngún mi fel a eáni eú oesini mi weneiti Jutas, a lamot pwe ei taropwe mi pin epwe pwénúetá. Nge Jutas, i ewe emén a wiliiti chón emmweni chókkewe mi aresini Jises.
17 Pún i a fen állealong leich me i a angei wisan lón ei angang fán iten Kot.
18 (Ina minne, ei aramas a mééni eú fénú ren liwinin an féffér ese pwúng, me a turutiw nge mi soretiw mékúran, a mékkúfesen lukan* me affan a pwal tomwowu.
19 A chéúfetál ei ngeni meinisin chón Jerusalem, ina minne iten ena fénú lón ar fós Akeltama, weween “Fénúen Chcha.”)
20 Pún a makketiw lón ewe puken Kélfel, ‘Leenian epwe péénnúló me esap wor emén epwe nónnóm lón,’ me ‘Emén epwe eáni wisan we wisen chón emmwen.’
21 Ina minne, a lamot pwe me lein ekkeei mwán mi etikich lón unusen ewe fansoun ewe Samol Jises a féri an angang* leich,
22 poputá seni an we papatais ren Jon tori ewe rán a feitá senikich, emén me lein ekkeei mwán epwe wiliiti emén chón etikich le pwáraatá ussun an we manawsefál.”
23 Iwe, ra atolonga rúúemén, Josef ewe mi iteni Parsapas, ewe mi pwal iteni Justus, me Matias.
24 Mwirin, ra iótek me apasa: “Ám Kot Jiowa,* ewe mi silei letipen meinisin, kopwe pwáári ié me lein ekkeei rúúemén mwán ka filaatá
25 pwe epwe angang ngonuk me wiseni ewe wis aposel, ewe Jutas a tokkoló seni pwe epwe feiló ngeni pwisin leenian we.”
26 Iwe, ra úttút* wóór, me ra útti Matias me i a állealong lein ekkewe 11 aposel.
Footnote
^ Krik, sab·baʹtou . . . odon. Úkúúkún towauen án emén chón Jus tongeni sái lón ewe Sapat.
^ Are “a sattifesen me lukanapan.”
^ Krik, “tolong me towu.”
