Ri testigos de Jehová nqatäj qaqʼij rchë nqaʼän ri xkʼüt qa Jesús, ke riʼ chqä xkiʼän ri apóstoles. Chpan re peraj reʼ nuʼij jbʼaʼ ri achkë yeqanmaj y achkë yeqaʼän.

1.   Dios. Nqayaʼ ruqʼij ri kantzij Dios, ri Nimaläj Ruqʼij y bʼanayon ronojel. Ri Dios riʼ Jehová rubʼiʼ (Salmo 83:18; Revelación [Apocalipsis] 4:11). Jehová ya riʼ ru-Dios Abrahán, Moisés chqä Jesús (Éxodo 3:6; 32:11; Juan 20:17).

2.   Le Biblia. Kan nqanmaj chë ya riʼ ri Ruchʼaʼäl Dios ri ruyaʼon pä chkë ri winäq (Juan 17:17; 2 Timoteo 3:16). Ri yeqanmaj y yeqaʼän, kan yeʼelenäq chpan ri 66 libros ri ye kʼo chpan ri Antiguo y Nuevo Testamento. Ri tijonel Jason BeDuhn, taq xtzʼibʼaj chkij ri testigos de Jehová, xuʼij reʼ: «Ryeʼ nkinmaj y nkiʼän ri nuʼij le Biblia, chqä ma nkesaj ta y ma nkiyaʼ ta ruwiʼ ri nuʼij». a

    Tapeʼ nqanmaj achkë nuʼij le Biblia, ye kʼa nqanukʼuj na achkë nuʼij jojun peraj. Nqaʼän riʼ rma ye kʼo jojun peraj xa kʼambʼäl tzij bʼanon qa chkë, rma riʼ kan yeqanukʼuj na achkë yeʼel chë tzij (Revelación 1:1).

3.   Jesús. Nqasmajij achkë xkʼüt y achkë xuʼän Jesucristo, y nqayaʼ ruqʼij rma ryä kan Rukʼajol Dios chqä Qakolonel (Mateo 20:28; Hechos 5:31). Ri nqaʼän riʼ nukʼüt chë röj yoj cristianos (Hechos 11:26). Ye kʼa, le Biblia ma nukʼüt ta chë Jesús ya riʼ Dios ri kʼo ronojel uchqʼaʼ pa ruqʼaʼ, nixta nukʼüt ri naʼoj chë Dios jun Trinidad (Juan 14:28).

4.   Ri Ruqʼatbʼäl Tzij Dios. Ri qʼatbʼäl tzij riʼ chkaj kʼo wä, ma pa kan ta ri cristianos kʼo wä. Y yë ri qʼatbʼäl tzij riʼ ri xtkanaj pa kikʼexel jontir ri qʼatbʼäl taq tzij ri ye kʼo chwäch le Ruwachʼulew komä. Taq xtbʼanatäj riʼ, kʼa riʼ xtbʼanatäj ri ruraybʼal Dios achiʼel wä xrajoʼ pa naʼäy (Daniel 2:44; Mateo 6:9, 10). Le Biblia nuʼij che yoj kʼo chik chpan ri «rukʼisbʼäl taq qʼij», rma riʼ nqanmaj chë xa jbʼaʼ chik nrajoʼ rchë xtbʼanatäj riʼ (2 Timoteo 3:1-5; Mateo 24:3-14).

    Jesús ya riʼ ri qʼatöy tzij chpan ri Ruqʼatbʼäl Tzij Dios. Y xtkirsaj pä ri ruqʼatbʼäl tzij pa junaʼ 1914 (Revelación 11:15).

5.   Ri kolotajïk. Rma ri kʼaslemal xyaʼ Jesús pa kamïk, ri winäq nkïl ri kolotajïk chwäch ri mak y ri kamïk (Mateo 20:28; Hechos 4:12). Y rchë nkïl ri utzil riʼ, kʼo chë nkikʼuqbʼaʼ kikʼuʼx chrij Jesús, nkijäl rubʼanik kikʼaslemal chqä yeqasäx pa yaʼ (Mateo 28:19, 20; Juan 3:16; Hechos 3:19, 20). Ri rubʼanobʼal jun winäq ya riʼ nkʼutü we kantzij kʼo rukʼuqbʼäl kʼuʼx (Santiago 2:24, 26). Ye kʼa, ri kolotajïk riʼ nqïl ma rma ta chë kan taqäl chqij o qachʼakon, xa rma «ri Dios kan sbʼläj ütz runaʼoj» qkʼë (Gálatas 2:16, 21).

6.   Le kaj. Jehová, Jesucristo chqä ri ángeles ri kinman tzij, chlaʼ chkaj kʼo wä kikʼojlibʼäl b (Salmo 103:19-21; Hechos 7:55). Ri 144.000 winäq xkekʼastäj chlaʼ chkaj, xkeqʼatö tzij rkʼë Jesús chpan ri Ruqʼatbʼäl Tzij Dios (Daniel 7:27; 2 Timoteo 2:12; Revelación 5:9, 10; 14:1, 3).

7.   Le Ruwachʼulew. Dios xuʼän le Ruwachʼulew rchë chë ri winäq yejeʼ chwäch tbʼä qʼij tbʼä säq (Salmo 104:5; 115:16; Eclesiastés 1:4). Ryä xtyaʼ utzil pa kiwiʼ ri winäq ri yenman tzij, xtuʼän chë xkejeʼ chwäch jun kotzʼijaläj ulew, ma xkeyawäj ta chik y ma xkekäm ta chik (Salmo 37:11, 34).

8.   Ri itzelal y ri tijöj poqonal. Le Biblia nutzjoj chë ojer qa, kʼo jun ángel xqʼäj rutzij Dios. Rma riʼ xtkïr pä ri itzelal chqä ri tijöj poqonal (Juan 8:44). Diablo y Satanás xbʼix che rä ri ángel riʼ rma xqʼäj rutzij Dios, y xuʼän chë ri naʼäy kʼlaj winäq junan xuʼän kiwäch rkʼë. Ri xkiʼän janina kʼayewal xkʼän pä pa kiwiʼ jontir winäq (Génesis 3:1-6; Romanos 5:12). Rma ri tzʼukün tzij xuʼän Satanás chrij Dios, ryä ruyaʼon jun tiempo rchë kʼo ri itzelal chqä ri tijöj poqonal. Ye kʼa, chqawäch apü, Dios xtchüp ruwäch ronojel riʼ.

9.   Ri kamïk. Taq jun winäq nkäm, ntel chë tzij chë chriʼ xkʼis wä ronojel (Salmo 146:4; Eclesiastés 9:5, 10). Ri kamnaqiʼ ma najin ta nkitäj poqän pa qʼaqʼ.

    Pa millón ri winäq ri ye kamnäq äl, xkekʼastäj na pä, rma Dios xkerukʼasoj pä (Hechos 24:15). Ye kʼa, ri winäq ri xkekʼasöx pä ma xtkinmaj ta tzij, kan jmul xtchup kiwäch y nixta xtyaʼöx chik kikʼaslemal (Revelación 20:14).

10.   Familia. Achiʼel wä ri kʼlanen xtkirsaj pä Dios pa naʼäy, ri xa xuʼ jun ixöq xkʼulbʼaʼ rkʼë jun achï, ke riʼ chqä chqawäch röj. Y nqanmaj chë rchë chë jun kʼlaj winäq nkijäch kiʼ, xa xuʼ rma we jun chkë ri winäq riʼ nkanüx rukʼexel (Mateo 19:4-9). Kan qakʼuqbʼan qakʼuʼx chë le Biblia yeruyaʼ utziläj taq naʼoj ri yerutoʼ ri familia rchë nkinaʼ kiʼkʼuxlal (Efesios 5:22-6:1).

11.   Ri nqayaʼ ruqʼij. Ma nqayaʼ ta ruqʼij ri cruz chqä ma nqayaʼ ta kiqʼij ri tyox (Deuteronomio 4:15-19; 1 Juan 5:21). Ya reʼ jojun chkë ri rubʼanik nqayaʼ ruqʼij Dios:

    •   Nqtzjon rkʼë Dios (Filipenses 4:6).

    •   Nqaskʼij y nqanukʼuj ruwäch le Biblia (Salmo 1:1-3).

    •   Nqaquʼ rij ri achkë nqatamaj chpan le Biblia (Salmo 77:12).

    •   Nqamöl qiʼ rchë nqchʼö rkʼë Dios, rchë nqanukʼuj le Biblia, rchë nqbʼixan, rchë nqakʼüt ri qakʼuqbʼäl kʼuʼx chqä rchë nqakʼuqbʼaʼ kikʼuʼx ri nkʼaj chik (Colosenses 3:16; Hebreos 10:23-25).

    •   Nqatzjoj «ri utziläj taq rutzjol chrij ri Ruqʼatbʼäl Tzij Dios» (Mateo 24:14).

    •   Yeqatoʼ ri achkë nkʼatzin kitoʼik (Santiago 2:14-17).

    •   Yeqaʼän chqä yeqachajij ri Salones del Reino y nkʼaj chik jay ri yeʼuksäx rchë yeyaʼöx tjonïk chrij le Biblia (Salmo 127:1).

    •   Nqtoʼon taq kʼo jun kʼayewal nkʼulwachitäj (Hechos 11:27-30).

12.   Ri rutinamit Jehová. Ri rutinamit Jehová pa congregaciones kibʼanon. Y chkipan ri congregaciones ye kʼo ukʼwäy taq bʼey rchë yekichajij ri qachʼalal. Ri ukʼwäy taq bʼey riʼ ma ntoj ta kiqʼij (Mateo 10:8; 23:8). Röj ma nqayaʼ ta diezmo chqä ma nqamöl ta päq (2 Corintios 9:7). Ri kchaj nkiyaʼ ri winäq nkʼatzin rchë yebʼan jalajöj taq samaj.

     Molaj Ukʼwäy Bʼey nbʼix chkë jun koʼöl molaj cristianos ri ye ukʼwayon bʼey pa ruwiʼ ri samaj nkiʼän ri testigos de Jehová. Ri koʼöl molaj cristianos riʼ ye kʼo pa qa-central mundial (Mateo 24:45).

13.   Junan qawäch. Xa bʼa akuchï yoj kʼo wä, xa junan ri nqanmaj (1 Corintios 1:10). Nqatäj qaqʼij rchë majun achkë njachö qchë, nixta ri qatinamit, qarajil o ri qajatzul o xa bʼa achkë chik na jun (Hechos 10:34, 35; Santiago 2:4). Ri junan qawäch ma ya riʼ ta nbʼanö chë jojun Testigos ma nkiʼän ta ri achkë nkajoʼ, chqajujnal nqachʼöbʼ achkë nqaʼän pa qakʼaslemal rma ütz ütz qatjon qiʼ chrij le Biblia (Romanos 14:1-4; Hebreos 5:14).

14.   Ri qanaʼoj. Nqatäj qaqʼij rchë nqakʼüt ri kantzij ajowabʼäl (Juan 13:34, 35). Nqatäj qaqʼij rchë ma nqaʼän ta ri ma nqä ta chwäch Dios, rma riʼ kan ütz ruksaxik nqaʼän che rä ri kïkʼ. Jun rubʼanik rchë nqakʼüt riʼ ya riʼ ma nqayaʼ ta qʼij chë nyaʼöx kïkʼ pa qachʼakul (Hechos 15:28, 29; Gálatas 5:19-21). Ma nqaʼän ta oyowal chqä ma nqanïm ta qiʼ pa nmaʼq taq chʼaʼoj (Mateo 9:5; Isaías 2:4). Nqanmaj kitzij ri qʼatbʼäl taq tzij, ye kʼa taq kʼo nkikʼtuj chqë ri xa nuʼän chë nqaqʼäj rupixaʼ Dios, ma nqaʼän ta ri nkiʼij chqë (Mateo 22:21; Hechos 5:29).

15.   Ri qachbʼilanïk kikʼë ri nkʼaj chik. Jesús xuʼij chi kʼo chë yeqajoʼ jontir winäq achiʼel nqajoʼ qa qiʼ röj, chqä xuʼij chkë ri cristianos chë ryeʼ ma ye rchë ta chik le Ruwachʼulew (Mateo 22:39; Juan 17:16). Rma riʼ, nqatäj qaqʼij rchë ütz qanaʼoj nqaʼän kikʼë jontir, ma nqayüj ta qiʼ kikʼë ri qʼatbʼäl taq tzij chqä ma nqaxöl ta qiʼ kikʼë ri nkʼaj chik religiones (Gálatas 6:10; 2 Corintios 6:14). Chqä ma nqaqasaj ta kiqʼij ri winäq taq kʼo nkichaʼ nkiʼän pa kikʼaslemal (Romanos 14:12).

 We nawajoʼ natamaj más chrij ri nkinmaj ri testigos de Jehová, xtawïl más ruqʼalajsaxik pa qa-sitio de Internet. Ütz chqä yatzʼibʼan äl pa qa-oficinas, yatapon chpan ri moloj ri yebʼan chkipan ri Salones del Reino ri más naqaj nkanaj chawä o nakʼutuj che rä jun Testigo pa atinamit.