Matthieu 15:1-39
15 Bepharisien a bescribe* be so’o Jérusalem, be nga zu koone Yésus, a sili nye na:
2 “Amu jé beyé’é bôé ba tyame metume me bôte ya melu mvus? Éve’an é ne na, be ne teke sôbe mo* map ôsusua na ba di.”
3 Nde Yésus a nga yalane be na: “Amu jé mia biasé metiñe me Zambe étome metume menan?
4 Éve’an é ne na, Zambe a nga jô na, ‘Semé’é éso ba nyua,’ a na, ‘Môt ase a yo’é* ésa wé nge nyia wé a yian awu.’
5 Ve mi mia jô na, ‘Môt ase a jô ésa wé nge nyia na: “Jôm ése me bili wo too ve bu’ubane je, me ka’aya je Zambe,”
6 a nji bo ntindane ya toñ ésa wé.’ Nde mi boya na bôte be biasé mejô me Zambe amu metume menan.
7 A bôte medu’an, nkulu mejô Ésaïe a nga bele éyoñ a nga kobô ajô denan a jô’ô na:
8 ‘Bôte ba ba jô ve anyu anyu na ba kañe ma, ve minleme miap mi ne ma ôyap.
9 Ba ke ôsu a kañe ma zezé, amu ba ve bôte miñye’elane mi môta binam.’”
10 Nde a nga loone nsamba bôt, a jô be na: “Kômané baa melo a wôk atinane ya jame di:
11 Sa ke jôme ja nyiine môt anyu nje ja ve nye mvite mise me Zambe, ve jôme ja kui nye anyu nje ja ve nye mvite mise me Zambe.”
12 Mvuse ya valé beyé’é bé be nga zu koone nye a sili nye na: “Ye wo yeme fo’o na, jame wo te jô da te bo na bepharisien be wôk ôlun?”*
13 Nde a nga yalane be na: “Élé ése Ésa wome ya yôp a nji bé ja ye tébane si.
14 Jôka’ané be. Be ne mindindime mia liti bôte zen. Nge ndindime wo liti wu ôvo’o zen, ke bese bebaane ba ye ku ébé été.”
15 Nde Pierre a nga sili nye na: “Nkana ôte wo tinan aya?”
16 Ane Yésus a nga sili nye na: “Ye mia fe mia kate wô’ô jame ma jô?
17 Ye mi nji yeme na, jôm ése ja nyiine môt anyu, ja ke nye abum* été, mvuse ya valé ja su’ulane ke éduk?
18 Ve mame mese ma kui môt anyu, ma so nye nlem été; mame mete mme ma ve môte mvit.
19 Éve’an é ne na, mbia be asimesane be ne môte nlem été, mbe ba soo mame ma: mewôé me bôt, mejian, mvite mame ya bisôk,* wup, bibôta, e kobô Zambe abé.
20 Mame mete mme ma ve môte mvite mise me Zambe; sa ke amu môt a di teke sôbe mo* nde a ye bo mvite mise me Zambe.”
21 Éyoñe Yésus a nga kôlô valé, nde a nga ke ngoto ya Tyr a Sidon.
22 Ane minga éziñe ya Phénicie a nga zu koone Yésus a yôtane na: “A Tate, Mone David, mvama’ane ma, mbia nsisim a jôé ngo jam mbia éjôé.”
23 Ve a nji yalane nye. Nde beyé’é bé be nga jô nye na: “Tita’ane nye! Amu a bo bia ésôbô’ô melo.”
24 Nde a nga jô na: “Zambe a nga lôme ma fo’o ve asu mintômba ya ayoñ Israël mi nga mane jañ.”
25 Ve minga a nga so a vitibi ôsu be Yésus a jô’ô na: “A Tate, volô’ô ma!”
26 Nde Yésus a nga jô nye na: “É nji bo mvo’é ya ve bone bemvu bidi* bongô ba yiane di.”
27 Nde a nga jô na: “Wo bele a Tate, ve bone bemvu be wô’ô di menyume bidi ma ku si éyoñe bemasa ba di tebele.”
28 Ane Yésus a nga yalane nye na: “A minga, ô bili ngule mbunan, avale wo yi é boba’an.” Awolo éte ébien, ngo jé é nga bo mvo’é.
29 Éyoñe Yésus a nga kôlô valé, nde a nga ke fefele mañe ya Galilée, ane a nga bete nkôle yôp a tabe si wôé.
30 Ane beta minsamba mi bôte mi nga subu nye bebé, a soo nye bôte be mbe éyem abo, éyeme wo, mindindim, mimvumvuk, a abui minkôkon afe. Ane be nga bôé nye mie mebo, nde a nga saé mie.
31 Ane nsamba bôt ô nga kam abui éyoñe be nga yene mimvumvu’u mi kobô’ô, bôte be mbe éyeme wo be ntoo mvo’é, ba be mbe éyem abo be wulu’u, ba be mbe ndime be yene’e; nde be nga ve Zambe ya Israël duma.
32 Ve Yésus a nga loone beyé’é bé a jô be na: “Ma wô’ô nsamba bôte wu éngôngol, amu ô tabeya melu melal a ma teke jôme ya di, me nji kômbô suu wô zaé, amu ô ne ku some zaé zen.”
33 Ve beyé’é be nga sili Yésus na: “Teke nlam éziñ ô ne bebé a vôme bi ne nyi, nne bi ne koon abime belete bôte bese ba be ne di vé?”
34 Nde Yésus a nga sili be na: “Mi bili belete tañ aya? Ane be nga yalane nye na: “Zangbwal, bi bili fe bone bekos, ve be nji bo abui.”
35 Nde, éyoñ a maneya jô nsamba bôte na ô tabe si bilo’o yôp.
36 Yésus a nga nyoñe belete zangbwal a kos. Éyoñ a maneya ye’elane Zambe, nde a nga be’e je a ve je beyé’é, beyé’é ki be taté na ba kabe je minsamba mi bôt.
37 Bôte bese be nga di a jaé. Be nga tôkane bifuse bi belete bi nga bu’u, a jalé beta bikate zangbwal.
38 Abime bôt é nga di é mbe befame 4 000, teke lañe binga a bone be bongô.
39 Éyoñe Yésus a maneya ya’ane minsamba mi bôt, ane a nga dañ éfunga a ke minlam a bitisone ya Magadan.
Notes
^ Bôte bete be mbe be tili’i bekalate, be ye’ele fe bôte Metiñe me Moïse.
^ Nalé a tinane na, e sôbe mo avale metume ma jô.
^ Nge ke, “ta.”
^ Nkobô Grec, “be kolé ôbak.”
^ Nkobô Grec, “ôsañ.”
^ Éfia Grec pornéïa. Lañe’e Atinane bifia.
^ Nalé a tinane na, sa ke nsôbane mo bepharisien be mbe be ye’ele’e bôte na be bo.
^ Nkobô Grec, “belet.”
