Jean 8:12-59
8 12 Yésus a nga beta kobô be a jô’ô na: “Me ne éfufup asu bôte bese ya si, môt ase a tôñe ma a ye ke wulu dibi été a zen éziñ, ve a ye bi éfufube ya ényiñ.”
13 Nde bepharisien be nga jô nye na: “Wo kobô ajô dôé womien; nkañete wôé ô nji bo été.”
14 Yésus a nga yalane be na: “To’o ma kobô ajô dame mamien, nkañete wom ô ne été, amu ma yeme vôme me nga so a vôme ma ke. Ve mia mi nji yeme vôme me nga so a vôme ma ke.
15 Mia tyi’i bôte mejô aval ôsimesane ya bôt* ô ne; me nji tyi’i môt éziñ ajô.
16 To’o da kui na ma tyi’i mejô, ntyi’ane mejô wom ô ne zôsô amu me nji bo étam, ve Ésa wom a nga lôme ma a ne a ma.
17 Nde fe, é ne ntilane Metiñe me Moïse a nga ve mia na: ‘Nkañete bôte bebaé ô ne été.’
18 Me ne nyu a kañete ajô dame mamien, a Ésa wom a nga lôme ma a kañete ajô dam.”
19 Nde be nga sili nye na: “Nne Ésa wôé a ne vé?” Yésus a nga yalane na: “Mi nji yeme ma nge Ésa wom. Nge mi nga yeme ma, mi nga ye fe yem Ésa wom.”
20 A mbe a kobô’ô mejô ma vôme ba ba’ale akum, nté a mbe a ye’ele’e Temple été. Ve môt éziñ a nji bi nye amu awolo dé é mbe é ngenane te kpwaan.
21 Nde a nga beta jô be na: “Ma ke, a mia ye jeñe ma, ve mia ye wu nseme wônan été. E vôme ma ke, mi vo’o ki so.”
22 Ane bejuif be nga taté na ba jô na: “A ye ke ke wôé émien, sa nalé? Amu a jô na, ‘E vôm ma ke, mi vo’o ki kui wôé.’”
23 A nga ke ôsu a jô be na: “Mi ne bôte ya si, ve ma, me ne môte ya yôp; mia so si nyu, me me nji so si nyu.
24 Ajô te nde ma jô mia na: Mia ye wu minseme mienan été. Amu nge mi nji buni na, ma me ne nye, mia ye wu minseme mienan été.”
25 Nde be nga taté na, ba sili nye na: “Ô ne za?” Yésus a nga jô be na: “Amu jé ébiene ma kobô a mia?
26 Me bili abui mame ya jô mfa’a wônan, a abui mejô ma ye tyik é ne. Nde fe nyu a nga lôme ma a ne benya mejôô, a mame mebiene me nga wô’ô be nye, ma kobô me e be bôte bese ya si.”
27 Be nji yeme na, a mbe a kobô’ô be ajô Ésa.
28 Nde Yésus a nga jô na: “Éyoñe mi maneya tyelé Mona môt élé, éyoñe te mia ye yeme na me ne nye; a na me nji bo jam éziñe nkômbane wome mamien, ve ma kobô mame mete aval Ésa wom a nga ye’ele ma.
29 A Nyu a nga lôme ma a ne a ma; a nji li’i ma étam amu ma bo kom ése ve mam a nye’e.”
30 Nté a mbe a jô’ô mame mete, abui bôt é nga buni nye.
31 Ane Yésus a nga ke ôsu a jô bejuif be nga buni nye na: “Mi ne fo’o beyé’é bam, nge mia ba’ale mejô mam,
32 a mia ye yeme benya mejôô, a benya mejôô ba ye toé mia éto beti.”
33 Be nga yalane nye na: “Bi ne mvoñe bôt Abraham, a teke môs éziñe bi boya ôlo môt éziñ. Aval avé ô ne jô na, ‘Mia ye tabe éto beti’?”
34 Yésus a nga yalane be na: “Ma bele fo’o ane ma kate na, môt ase a bo nsem a ne ôlo ya nsem.
35 Nde fe ôlo ô ne te tabe nda masa nnôm éto; mon a tabe été nnôm éto.
36 Nge Mon a vaa mia éto belo, mia ye kôme bo fili.
37 Ma yeme na mi ne mvoñe bôt Abraham, ve mia jeñe na mi wôé ma, amu mi nji kañese miñye’elane miam.
38 Ma kobô mame me nga yen éyoñe me mbe a Ésa wom, ve mia mia bo mame mi nga wô’ô be Ésa wônan.”
39 Be nga yalane nye na: “Ésa wongan a ne Abraham.” Yésus a nga jô be na: “Nge mi mbe bone be Abraham, ve mi nga ye bo mam Abraham a nga bo.”
40 Ve éyoñe ji, mia jeñe na mi wôé ma, môt a kate mia benya mejôô me nga wô’ô be Zambe. Abraham a nji bo nalé.
41 Mia bo mam Ésa wônan a bo.” Be nga jô nye na: “Bi nji bo avale bon é nga bialé mvite mame ya bisôk.* Bi bili Ésa wua, Zambe.”
42 Yésus a nga jô be na: “Nge Zambe a too bo Ésa wônan, mi nga ye nye’e ma, amu me nga so be Zambe a me ne va. Me nji so nkômbane wome mamien, Nnye a nga lôme ma.
43 Amu jé mi nji wô’ô mame ma jô? Amu mi vo’o wô’ô mejô mam.
44 Mia so be ésa wônane Diable a mia kômbô bo minkômbane mi ésa wônan, nyuli ate a mbe ñwôé bôt éyoñ a nga taté* a a nji tebe ne bip e benya mejôô été amu benya mejôô be nji bo be nye. Éyoñ a kobô minsos a kobô avale nkômbane wé ô ne amu a ne nlaa minsos a ésa minsos.
45 Ve ma amu ma kate mia benya mejôô, mi nji buni ma.
46 Za ya be mia a ne liti ma nseme ma te bo? Nge ma kobô benya mejôô, amu jé mi ne te buni ma?
47 Môt a so be Zambe a vô’ôlô mame Zambe a jô. Ajô te nde, mi nji vô’ôlô amu mi nji so be Zambe.”
48 Bejuif be nga yalane nye na: “Ye bi nji bele éyoñe bia jô na: ‘Ô ne mone samaritain a na mbia nsisim a jôé wo’?”
49 Yésus a nga yalane na: “Mbia nsisim a nji jôé ma, ve ma ve Ésa wom ésemé* a mi mia biasé ma.
50 Ve mamien, me nji jeñe duma dam; a ne Zambe nnye a yi na me bi duma, a nnye a ne ntyi’i mejô.
51 Ma bele fo’o ane ma jô mia na, nge môt a tôñe mejô mam, a ye ke yen awu môs éziñ.”
52 Bejuif be nga jô nye na: “Éyoñe ji nje bia kôme yeme na mbia nsisim a jôé wo. Abraham a nga wu, bekulu mejô fe be nga wu, ve wo wo jô na, ‘Nge môt a tôñe mejô mam, a ye ke tyek awu môs éziñ.’
53 Ô nji dañ ésa wongan Abraham nnye a nga wu, sa nalé? Bekulu mejô fe be nga wu. Wo simesane na ô ne za?”
54 Yésus a nga yalane na: “Nge ma ve mamiene duma, duma dam é nji bo jôm éziñ. A ne Ésa wome nnye a ve ma duma nyu mia jô na, a ne Zambe wônan.
55 Ve mi nji yeme nye, ve ma, ma yeme nye a nge ma jô na, me nji yeme nye ma ye bo ane mia, nlaa minsos. Ve ma yeme nye a ma tôñe mejô mé.
56 Abraham ésa wônan a nga vak abui ajô ya na, a ye yene môse wom, a a nga yene wô a vak.”
57 Ane bejuif be nga jô nye na: “Ô ngenane te bi mimbu 50, nde ô ne ke ôsu a jô aya na, ô nga yen Abraham?”
58 Yésus a nga jô be na: “Ma bele fo’o ane ma kate mia na, ôsusua na Abraham a bialé me mbe.”
59 Nde be nga to’é meko’o na be lume nye me, ve Yésus a nga sobô a kôlô Temple.
Notes
^ Nkobô Grec, “minsôn.”
^ Éfia Grec, pornéïa. Lañe’e Atinane bifia.
^ Nalé a tinane na, éyoñ a nga laane minsos ajô Zambe.
^ Nge ke, “duma.”
