Jean 5:1-47
5 Mvuse ya valé, abô’ô bejuif é nga bo a Yésus a nga bet, a ke e Jérusalem.
2 A nga bo na, e Jérusalem bebé mbé mintômba, piscine a mbe valé, be loone nye nkobô Hébreu na, Bethzatha. Piscine ate a mbe mbôma’ane a mimbala’a mi si mitan a mekôn.
3 Vôm ate, abui minkôkon é mbe, mindindim, miñyeyem, a bôte be mbe ñyemelane mo a mebo be mbe be bôô si valé.
4 *——
5 Ve môte wua a mbe valé, a mbe a koneya tañe mimbu 38.
6 Éyoñ a nga yene môt ate a bôô valé, a yeme’e fe na, a koneya ayap, Yésus a nga sili nye na: “Ye wo kômbô bo mvo’é?”
7 Nkôkon ô nga yalane nye na: “A Monti, me nji bi môt a ne futi ma piscine été éyoñe mendime ma fô’ôsan, ve nté me ngenane me kelek, môte mbok a tyi’i ma ôsu.”
8 Yésus a nga jô nye na: “Tebe’e tetele, ô to’é énoñe nkôkone* jôé a wulu.”
9 Été été môt a nga bo mvo’é, ane a nga be’e énoñe nkôkone* jé a taté na a wulu.
Môs ôte ô mbe môse Sabbat.
10 Nde bejuif be nga taté na ba jô môt a nga bo mvo’é na: “A ne môse Sabbat, ye atiñe da kañese na ô be’e énoñe nkôkone* jôé?”
11 Ve a nga yalane be na: “Môt a te saé ma nnye fe a te jô ma na, ‘Toko’é énoñe nkôkone* jôé a wulu.’”
12 Be nga sili nye na: “Za a ne môt a te jô wo na, ‘Toko’é je a wulu’?”
13 Ve môt a nga bo mvo’é a nji be a yeme’e za a nga saé nye, amu Yésus a nga jañe nsamba bôt ô mbe valé.
14 Mvuse mame mete, Yésus a nga koone nye Temple a jô nye na: “Éyoñe ji ô ntoo mvo’é, te beta bo nsem éziñ, ndembene mbia jam a ye ke kui be wo.”
15 Ane môt a nga kôlô valé a ke kate bejuif na a mbe Yésus nnye a nga saé nye.
16 Ajô te nde bejuif be mbe be tibili’i de Yésus, amu a nga bo mame mete môse Sabbat.
17 Ve a nga yalane be na: “Ésa wom a ngenan a saék azukui éyoñe ji, nde ma fe ma ke ôsu a saé.”
18 Ajô te nde bejuif be nga taté na, ba jeñe mezene mese na be wôé nye, amu nge ô vaa na a nga tyam atiñe Sabbat, a nga loone fe Zambe na Ésa wé a bo ve ane ba Zambe be ne nkôñe wua.
19 Nde Yésus a nga yalane be na: “Ma bele fo’o ane ma jô mia na, Mon a vo’o ki bo ve mone jame wua a nkômbane wé émien. Ve fo’o ve jam a yen Ésa a bo’ok, amu mame mese Ésa a bo Mone fe a bo me avale da.
20 Amu Ésa a nye’e Mon a liti fe nye mame mese émien a bo a ye fe liti nye mame ma dañe malé mete, ndembene mia ye kam.
21 Fo’o ve aval Ésa a wômôlô miñwuan a bo na mi nyiñ, aval éte fe Mon a bo na môt ase a kômbô bo na a nyiñ, a nyiñ.
22 Amu Ésa a ne te tyi’i môt ajô, ve a nga ve Mon ésaé ése ya tyi’i bôte mejô,
23 ndembene bôte bese be ne semé Mon aval ane ba semé Ésa. Môt ase a nji semé Mon a semé ki Ésa a nga lôme nye.
24 Ma bele fo’o ane ma jô mia na, môt ase a wô’ô mejô mam a buni fe Nyu a nga lôme ma, a bili ényiñe ya nnôm éto, nde fe a nji tyi’ibane mejô, ve a kôlôya awu a ke ényiñ.
25 “Ma bele ane ma jô mia na awolo da zu a é ntoo, éyoñe bewu ba ye wô’ô tyiñe Mona Zambe, a ba be nga vô’ôlô a bo mewôk, ba ye nyiñ.
26 Amu, fo’o ve aval Ésa a bili ényiñe be émien, nde fe a nga bo na, Mon a bi ényiñe be émien.
27 A a nga ve nye ngule ya tyi’i mejô amu a ne Mona môt.
28 Te boané fe’e ne vema ajô di, amu awolo da zu, éyoñe bôte bese be ne mesoñe Zambe a simesane* ba ye wô’ô tyiñe jé
29 a kui atan, ba be nga bo mbamba be mame ba ye wômô asu ényiñ, a ba be nga bo mbia be mame ba ye wômô asu ntyi’ane mejô.
30 Me vo’o bo mone jame wua a nkômbane wome mamien, ve ma tyi’i mejô avale ma wôk Ésa wom a jô’ôk. A ntyi’ane mejô wom ô ne zôsô amu ma jeñe sa ke nkômbane wome mamien, ve nkômbane nyu a nga lôme ma.
31 “Nge ma étame ma kañete ajô dam, nkañete wom ô nji bo été.
32 Môte mfe a kañete ajô dam a ne, a ma yeme na nkañete wé mfa’a wom ô ne été.
33 Mi nga lôme môte be Jean, a nkañete a nga bo ô ne été.
34 A nji bo amu na ma yi nkañete wo so be môt, ve ma jô mame ma na mi bi ényiñ.
35 Môt ate a mbe lambe a yôñ a faé, a e mon étun éyoñ, mi nga kômbô vak abui éfufube jé été.
36 Ve nkañete a nga kañete wo dañe wu Jean, amu mame mebien Ésa wom a nga jô na me bo, mame mete mme ma bo, a ma bo’olô na, Ésa wom a nga lôme ma.
37 A Ésa wom émien a nga lôme ma, a nga kobô ajô dam. Mi nji wô’ô tyiñe jé môs éziñ, nge yen asu dé,
38 a mejô mé me nji tabe minleme mienan été, amu mi nji buni môt émien a nga lôm.
39 “Mia fa’a Mintilan, amu mia buni na mia ye bi ényiñe ya nnôm éto a zen éte, ve Mintilane mite mibiene* mmie mia kañete ajô dam.
40 Ve mi nji kômbô zu be ma na mi bi ényiñ.
41 Me nji kañese duma da so be bôt,
42 ve ma kôme yeme na, mi nji bi nye’ane Zambe be mia.
43 Me nga so e jôé Ésa wom, ve mi nji buni ma. Nge môte mfe a nga so e jôé dé émien, mi nga ye buni môt ate.
44 Aval avé mi ne buni éyoñe mia kañese duma da so be môt ase ya be mia, a mi teke jeñe duma da so be Zambe?
45 Te mia buni na ma ye somane mia be Ésa wom, môte wua nnye a somane mia, Moïse, nnye mi too nye ndi.
46 Nya ajôô a ne na, nge mi nga buni Moïse, mi nga ye fe buni ma, amu a nga tili ajô dam.
47 Ve nge mi nji buni mam a nga tili, aval avé mia ye buni mame ma jô?”
Notes
^ Minnôme mimvulekane bekalate miziñe mi nji bi éfus éte, da kôme fo’o yené na, é nji bo ngabe ya mimfufube mintilan.
^ Nge ke, “énoñ.”
^ Nge ke, “énoñ.”
^ Nge ke, “énoñ.”
^ Nge ke, “énoñ.”
^ Nalé a tinane na, mesoñe me bôte be nga wu a be ne ôsimesane Zambe.
^ Nalé a tinane na, mejô me Zambe.
