Jean 14:1-31
14 “Te tyelane minleme yôp. Lita’ane na mia buni Zambe, lita’ane fe na mia buni ma.
2 Nda Ésa wom é bili abui bevôme ya tabe. Nge nalé momo, me nga ye kate mia de. Amu ma ke na me ke kôme mia vôme ya tabe.*
3 Nde fe nge ma ke na me ke kôme mia vôme ya tabe, ma ye beta so, a mamiene ma ye nyoñe mia nda, ndembene mia fe mi ne tabe vôme me ne.
4 A vôme ma ke mia yeme zene ya wôé.”
5 Thomas a nga jô nye na: “A Tate bi nji yeme vôme wo ke. Nde bi ne yeme zene ya wôé aya?”
6 Yésus a nga jô nye na: “Me ne zen, benya mejôô a ényiñ. Teke môt a ne zu be Ésa wom, nge a teke lôte be ma.
7 Nge mia mi nga yeme ma, mia ye fe yem Ésa wom; ataté éyoñe ji, mia yeme nye a mi yeneya nye.”
8 Philippe a nga jô nye na: “A Tate, liti‘i bia Ésa wôé, abim éte da yiane bia.”
9 Yésus a nga jô nye na: “A Philippe, abim ayap éyoñe me tabeya a mia di, ô ngenane teke ma yem? Nyu ase a yeneya ma, a yeneya fe Ésa wom. Nde ô ne jô aya na, ‘Liti’i bia Ésa’?
10 Ye ô nji buni na ma a Ésa wome bi ne jôme jia, a na Ésa wom a ma bi ne jôme jia? Mame ma kate mia me nji so be mamien, ve Ésa wome bia nye bi ne jôme jia nnye a bo mame mé.
11 Buna’ané éyoñe ma kate mia na, ma a Ésa wome bi ne jôme jia, a na, Ésa wom a ma bi ne jôme jia, nge nalé momo, buna’ané amu mame mia yene me bo’o amu nkômbane wé.
12 Ma bele fo’o ane ma jô na, nyu ase a liti na a buni ma, a ye fe bo mame ma bo; a ye bo mame ma dañe ma, amu ma ke be Ésa wom.
13 Nde fe, jôm ése mia sili e jôé dam, ma ye bo de, ndemben Ésa wom a ne bi duma a zene ya be Mon.
14 Nge mia sili jôm éziñ e jôé dam, ma ye bo je.
15 “Nge mia nye’e ma, mia ye tôñe metiñe mam.”
16 A ma ye ye’elan Ésa wom a a ye ve mia mvolô* mfe na a tabe a mia nnôm éto,
17 nsisime ya benya mejôô, ñwô si nyu é vo’o bi amu é nji yene wô, nge yeme wô. Mia yeme wô amu wo tabe a mia, a ô ne be mia.
18 Ma ye ke li’i mia étam.* Ma ye beta zu be mia.
19 A li’iya fo’o ve mone nté, si nyu ja ye ke beta yene ma, ve mi mia ye yene ma amu ma nyiñ, a mia ye nyiñ.
20 Môs ôte, mia ye yeme na ma a Ésa wome bi ne jôme jia, a na mia a ma bi ne jôme jia.
21 Môt ase a bili metiñe mam a tôñe me a ne nyu a nye’e ma, aval éte fe môt ase a nye’e ma, Ésa wom a ye nye’e nye a ma ye nye’e nye a bo na a kôme ma yem.”
22 Judas, sa ke Iscariot, a nga jô nye na: “A Tate, amu jé wo yi na bia bi kôme yeme wo, sa ke bôte ya si nyu?”
23 Yésus a nga jô nye na: “Nge môt a nye’e ma, a ye tôñe mejô mam, a Ésa wom a ye nye’e nye, a bia ye so be nye a kôm étaba’a* be nye.
24 Môt ase a nji nye’e ma, a tôñe ki mejô mam. Mejô mia wô’ô me nji bo émam, ve me ne ma me Ésa wom, nyu a nga lôme ma.
25 “Ma kate mia mame ma nté me ngenan a mia.
26 Ve mvolô, mfufube nsisim, nyu Ésa wom a ye lôme mia e jôé dam, nnye a ye ye’ele mia mame mese, a bo na mi simesane mame mese me nga kate mia.
27 Ma li’i mia mvo’é été, ma ve mia mvo’é jam. Me nji ve mia je avale si nyu ja ve je. Te tyelane minleme yôp, nge bo na minleme mienane mi ko woñ.
28 Mia te wô’ô me jô’ô na, ‘Ma ke, a ma ye beta so be mia.’ Nge mia nye’e ma, mia ye va’a na ma ke be Ésa wom, amu Ésa wom a dañe ma.
29 Nde, ma te kate mia de ôsusua na da boban, ndembene mi ne buni de éyoñe da ye boban.
30 Ma ye ke beta kobô mia ayap éyoñ, amu njôô ya si nyu a zu. A nji bi ngul* éziñe be ma.
31 Ve, mfa’a ya na bôte ya si be yeme na ma nye’e Ésa wom, ma bo fo’o ve aval Ésa wom a nga jô ma na me bo. Kôla’ané si, bi kôlô va.
Notes
^ Nkobô Grec, “abui bitaba’a.”
^ Nge ke, “mvolô minlem.”
^ Nge ke, “ane bobenyui.”
^ Nge ke, “vôme ya tabe.”
^ Nge ke, “tyiñ.”
