Jean 1:1-51
1 Atata’a Ajôô a mbe, a Ajôô a mbe a Zambe, a Ajôô a mbe zambe.*
2 Nyuna a mbe atata’a a Zambe.
3 Biôme bise bi nga téban a zene jé, a nge ô vaa nye, teke to’o jôme jia é nga téban.
Jôm é nga téban
4 a zene jé é ne ényiñ, a ényiñ é nga bo éfufup asu bôt.
5 A éfufube ja faé dibi été, ve dibi é nji dañe je.
6 A nga bo na, môt éziñ a mbe valé, Zambe nnye a nga lôme nye, jôé dé é mbe na, Jean.
7 Môt ate a nga so ane ngaa na, a kañete bôt ajô ya éfufup, ndemben avale bôt ése é ne buni a zene jé.
8 A nji be éfufup éte, ve a mbe na, a kañete bôt ajô ya éfufup éte.
9 Nya éfufubu a ve avale bôt ése éfufup, a mbe a mbeme so si nyu.*
10 A mbe si nyu, a si nyu é nga téban a zene jé, ve si nyu é nji yeme nye.
11 A nga so nlame wé, ve bôte ya nlame wé be nji kañese nye.
12 Ve, e bôte bese be nga kañese nye, a nga ve be ngule ya bo bone be Zambe, amu be mbe be liti’i na, ba buni éyôlé jé.
13 A be nga bialé sa ke a metyi nge nkômbane ya minsôn, nge nkômbane ya bôt, ve a zene ya Zambe.
14 Nde Ajôô a nga bo nsôn a tabe be bia, a bi nga yen étôto’o jé, étôtok aval ane ji atyi’i mone da so be ésa a a mbe njalan a beta mvame Zambe, a benya mejôô.
15 (Jean a nga kañete ajô dé, ôwé, a nga yôtane na: “Nyuna a mbe nyu me nga jô nye na, ‘Môt a zu ma mvus a keya ma ôsu, amu a nga taté téban a ma.’”)
16 A amu a mbe njalan a beta mvam a benya mejôô, bia ke ôsu a nyoñe beta mvam.
17 Amu Metiñe me Moïse me nga veban a zene ya be Moïse, beta mvam a benya mejôô be nga so a zene ya be Yésus Krist.
18 Teke môt éziñ a nga yene Zambe môs éziñ; atyi’i mona Zambe é too fefel Ésa,* nde é nga timine Nye.*
19 Nyuna a ne mame Jean a nga jô éyoñe bejuif be nga lôme beprêtre a belévite be so’o Jérusalem, be zu sili nye na: “Ô ne za?”
20 A a nga meme de, nde fe a nji sôô de, a jô’ô na: “Me nji bo Krist.”
21 A be nga sili nye na: “Ô ne ñhe za? Ye ô ne Élie?” A nga yalane na: “Me nji bo nye.” “Ye ô ne nkulu mejô?” A nga yalane na: “Momo!”
22 Nde be nga jô nye na: “Ô ne ñhe za? Kate’e bia, ndembene bia ye ve bôte ba te lôme bia éyalan. Womiene wo jô na ô ne za?”
23 A nga yalane na: “Me ne tyiñe môt a yôtane nkôte si fo’o ve avale nkulu mejô Ésaïe a nga jô na, ‘Sôané zene Yéhôva.’”*
24 Bôte be nga ke nlôman, be mbe nsamba bepharisien.
25 Nde be nga sili nye a jô nye na: “Nde, amu jé wo du bôte nge ô nji bo Krist, nge Élie, nge Nkulu mejô?”
26 Jean a nga yalane be na: “Ma du bôte mendim été. Nyu a tele zañe jenan, nnye mi nji yem,
27 nyu a zu ma mvus, me nji bo môt a yiane tiine nye minkole besilefas.”
28 Mame mete me nga bobane Béthanie, e Jourdain yat, vôme Jean a mbe a du bôt.
29 Môs ô nga tôé valé, a nga yene Yésus a za’a be nye, ane a nga jô na: “Tama yenan, Ntômba Zambe wo vaa minseme mi bôte ba nyiñe si!
30 Nyuna a ne môte me nga kobô mia ajô dé na: ‘Môt a zu ma mvus a keya ma ôsu amu a nga taté nyiñ a ma.’
31 To’o me nji be me yeme’e nye, ve jam é nga bo na, me du bôte mendim é mbe na, Israël a yeme nye.”
32 Jean a nga kañete fe a jô’ô na: “Me nga yene nsisim ô sisi’i ane zum ô so’o yôp, a nsisim ôte ô nga tabe a nye.
33 To’o me nji be me yeme’e nye, ve nyu a nga lôme ma na, me du bôte mendim a nga jô ma na, ‘Môt ase wo ye yene nsisim ô sisik a tabe be nye, a ne nyu a du bôt a mfufube nsisim.’
34 A ma te yene de, a kañete na nyuna a ne Mona Zambe.”
35 Môs ô mbe ô tôé valé, Jean a mbe a tele a beyé’é bé bebaé,
36 a nté a mbe a yene’e ane Yésus a wulu, a nga jô na: “Tama yenan, Ntômba Zambe!”
37 Éyoñe beyé’é bebaé be nga wôk ane a jô de, be nga tôñe Yésus.
38 Ane Yésus a nga tyiñelan a yen ane ba tôñe nye, a nga sili be na: “Za mia jeñ?” Ane be nga jô nye na: “A Rabbi (éyoñe ba kôñelane nalé a tinane na, “A Ñye’ele”) nne ô too vé?”
39 A nga jô be na: “Za’ané, a mia ye yen.” Nde be nga ke a yene vôm a nga too, a be nga tabe a nye môs ôte, a mbe bebé mewolo menyine ya mame ngô’é.*
40 André monyañe Simon Pierre, a mbe môte wua ya bôte bebaé be nga wô’ô jame Jean a nga jô a tôñe Yésus.
41 Ane a nga taté ke koone monyañe Simon a jô nye na: “Bi yeneya Messie” (nalé a tinan éyoñe ba kôñelane na, “Krist”)
42 a nga kee nye be Yésus. Éyoñe Yésus a nga yene nye, a nga jô nye na: “Ô ne Simon, mone Jean; wo ye loobane na Céphas” (nnye ba kôñelane na, “Pierre”).
43 Môs ô nga tôé valé, Yésus a mbe a kômbô’ô ke Galilée. Nde a nga ke koone Philippe a jô nye na: “Za’a bo ñyé’é wom.”
44 Philippe a mbe môte ya Bethsaïda tison André ba Pierre.
45 Philippe a nga koone Nathanaël a jô nye na: “Bi yeneya nyu Moïse a nga jô nye Metiñe me Moïse, a mejô bekulu mejô na a ne: Yésus mone Joseph ya Nazareth.”
46 Ve Nathanaël a nga jô nye na: “Ye mbamba jam éziñ a ne so Nazareth?” Philippe a nga jô nye na: “Za’ak a yenek.”
47 Yésus a nga yene Nathanaël a za’a be nye, nde a nga jô mfa’a wé na: “Yene’e nya mone ya Israël a ne teke medu’an.”
48 Nathanaël a nga sili nye na: “Aval avé wo yeme ma?” Yésus a nga yalane nye na: “Ôsusua na Philippe a loone wo, éyoñ ô mbe ô too élé figuier si, me nga yene wo.”
49 Nathanaël a nga jô nye na: “A Rabbi ô ne Mona Zambe, ô ne Njô bôte ya Israël.”
50 Yésus a nga yalane nye na: “Ye wo buni amu ma te kate wo na, ma te yene wo élé figuier si? Wo ye yene mame me ne anen a dañe malé.”
51 A nga jô nye na: “A bôt, ma bele fo’o ane ma kate mia na, mia ye yene yôp é yoo a beéngele be Zambe be bete’e a sis, e be Mona môt.”
Notes
^ Nge ke, “a mbe ane Zambe.”
^ Lañe’e Atinane bifia, “Si nyu.”
^ Nge ke, “Ésa wé tôé.”
^ Nge ke, “Zambe.”
^ Lañe’e Atinane bifia.
^ Nkobô Grec, “awolo awômô.”
